អ្នកចំណូលមធ្យមនិងខ្ពស់កំពុងចាប់ផ្ដើមចាយលុយលើស្រាប្រណីតនិងម្ហូបថ្លៃៗ

បច្ចុប្បន្ន ស្រាប្រណីតនិងម្ហូបថ្លៃៗនៅក្នុងទីផ្សារកម្ពុជាបាននិងកំពុងមានការពេញនិយមគួរឲ្យកត់សម្គាល់ពីសំណាក់ប្រជាជនដែលមានចំណូលមធ្យមឡើងទៅ ខណៈដែលអ្នកជំនាញមានបទពិសោធន៍នៃការនាំចូល និងចែកចាយភេសជ្ជៈប្រភេទស្រាប្រណីត និងប្រភេទសាច់សត្វថ្លៃៗសម្រាប់ធ្វើម្ហូប បញ្ជាក់ថា ការនិយមនេះគឺដោយសារតែមានបម្រែបម្រួលរចនាសម្ព័ន្ធប្រជាសាស្ត្រ និងកំណើនជីវភាពប្រជាជន និងសេដ្ឋកិច្ចក្នុងប្រទេស។

លោក Vincent NG នាយកប្រតិបត្តិនៃក្រុមហ៊ុននាំចេញនាំចូល Auskhmer ដែលជាក្រុមហ៊ុនផ្តល់សេវាកម្មផ្គត់ផ្គង់និងចែកចាយប្រភេទស្រាប្រណីត និងគ្រឿងទេសសម្រាប់ម្ហូបអឺរ៉ុប និងប្រភេទសាច់សម្រាប់ម្ហូបក្នុងភោជនីយដ្ឋានលំដាប់ខ្ពស់ បានលើកឡើងថា ប្រទេសកម្ពុជាជាប្រទេសដែលមានទីផ្សារថ្មីលើផ្នែកនេះ។ ចំណែកឯបម្រែបម្រួលនៃរចនាសម្ព័ន្ធប្រជាសាស្ត្រ ការកើនឡើងនៃប្រជាជនថ្នាក់កណ្តាល បានធ្វើឲ្យទីផ្សារមួយនេះ កំពុងតែរីកលូតលាស់ខ្លាំងគួរឲ្យកត់សម្គាល់។

ក្នុងរបាយការណ៍សិក្សាស្តីពីទីផ្សារភោជនីយដ្ឋានដែលចេញផ្សាយដោយ Park Cafe កាលពីឆ្នាំ២០១៥ បានលើកឡើងថា ការចំណាយដ៏ច្រើនបំផុតមួយក្នុងចំណោមការចំណាយសំខាន់ៗផ្សេងៗ របស់ប្រជាជនក្រុងភ្នំពេញ គឺទៅលើម្ហូបអាហារ និងផលិតផលទាក់ទងនឹងម្ហូបអាហារ និងការចំណាយផ្សេងទៀត ដូចជា ការបរិភោគតាមភោជនីយដ្ឋាន ផ្សារទំនើប និងកន្លែងទេសចរណ៍សំខាន់ៗ។

របាយការណ៍ដដែលបានបន្ថែមថា សម្រាប់ទីផ្សារនៃផ្នែកម្ហូបអាហារ និងសេវាកម្មនៅមានទំហំធំក្នុងចំណោមប្រជាជនថ្នាក់កណ្តាល និងប្រជាជនថ្នាក់ខ្ពស់ នៅមានទំហំធំ ស្របពេលការកើនឡើងនៃទំនោររបស់អតិថិជនទម្លាប់ខ្លួនទៅនឹងជីវិតរស់នៅបែបបស្ចិមប្រទេស ក៏បានជំរុញឲ្យប្រជាពលរដ្ឋ ចំណាយច្រើនទៅម្ហូបអាហារ ភេសជ្ជៈដែលមានស្តង់ដារអនាម័យ ប្រណីតភាព និងមានភាពស៊ីវិល័យ។ ជាទូទៅ ការចំណាយរបស់ប្រជាជនក្រុងភ្នំពេញថ្នាក់កណ្តាល និងថ្នាក់ខ្ពស់ ក្នុងមួយថ្ងៃ សម្រាប់ម្ហូបអាហារ និងភេសជ្ជៈមានទំហំប្រមាណច្រើនជាង ១,៥លានដុល្លារក្នុងមួយថ្ងៃ។

លោក Vicent NG នាយកប្រតិបត្តិនៃក្រុមហ៊ុននាំចេញនាំចូល Auskhmer

ស្របពេលកំណើននៃការចាយវាយរបស់ប្រជាជនសម្រាប់ម្ហូបអាហារដែលមានស្តង់ដារខ្ពស់ អនាម័យ និងភាពស៊ីវិល័យ លោក Vincent NG បានបន្ថែមថា ប្រជាជនកម្ពុជាកំពុងតែមានទំនោរនៃការទទួលទានម្ហូបអាហារបែបប្រណីត និងប្រភេទស្រាប្រណីត ដែលមានដូចជា ស្រាទំពាំងបាយជូរ ស្រាក្រហម វិស្គីជាដើម។

លោក Vincent NG នាយកប្រតិបត្តិនៃក្រុមហ៊ុននាំចេញនាំចូល Auskhmer បានលើកឡើងយ៉ាងដូច្នេះថា "រហូតមកដល់បច្ចុប្បន្ននេះ ទីផ្សាររបស់យើងកំពុងតែរីកលូតលាស់។ ចំណែកឯ សេដ្ឋកិច្ចកម្ពុជាកំពុងតែមានកំណើនយ៉ាងលឿនក្នុងតំបន់ រួមទាំងកំណើននៃប្រជាជនថ្នាក់កណ្តាលផងដែរ។ ការបរិភោគអាហាររបស់ប្រជាជន ក៏ចាប់ផ្តើមមានទំនោរទៅរកម្ហូបប្រណីត និងប្រភេទស្រាប្រណីត។ ដូចនេះហើយ បានជាទីផ្សារមួយនេះ បានកំពុងលូតលាស់ខ្លាំង។ AusKhmer យើងវិញ ក៏បាននាំចូលប្រភេទស្រា និងម្ហូបប្រណីតសម្រាប់ទីផ្សារកម្ពុជាដែលមានគុណភាពល្អ និងតម្លៃសមរម្យ យើងក៏បានពង្រីកការនាំចូលប្រភេទស្រាប្រណីតដែលមានរសជាតិផ្សេងៗគ្នាសម្រាប់ប្រជាជនកម្ពុជា និងទីផ្សារកម្ពុជាផងដែរ”។

ស្របពេលដែលមានកំណើននៃទំនោរនេះ ប្រភេទហាងដែលផ្គត់ផ្គង់ស្រាប្រណីតដូចគ្នានេះ ក៏បានចាប់ផ្តើមមានការកើនឡើងជាបន្តបន្ទាប់ផងដែរ។ ការកើនឡើងនេះ ត្រូវបានលោក Vicent យល់ឃើញថា នេះជាការបង្ហាញពីភាពរឹងមាំនៃទីផ្សារមួយនេះ។

ក្នុងរបាយការណ៍សិក្សាស្តីពីទីផ្សារភោជនីយដ្ឋានដដែល ក៏បានលើកឡើងថា ប្រជាជនថ្នាក់កណ្តាលនិងថ្នាក់ខ្ពស់ ក្នុងទីក្រុងភ្នំពេញ បានចំណាយប្រាក់សរុបប្រមាណ ២០០ ទៅ ៣០០លានដុល្លាក្នុងមួយខែៗ ទៅលើម្ហូបអាហារ និងផលិតផលទាក់ទងនឹងម្ហូបអាហា ភេសជ្ជៈ និងការចំណាយលើការបរិភោគតាមភោជនីយដ្ឋាន ផ្សារទំនើប ជាដើម។

ទំហំនៃការចំណាយនេះ ត្រូវបានគេមើលឃើញថា នឹងនៅតែបន្តកើនឡើងជាលំដាប់។

រហូតដល់បច្ចុប្បន្ន ដោយបានមើលឃើញពីទំហំទីផ្សារនេះ ក្រុមហ៊ុននាំចេញនាំចូល Auskhmer ដែលមានបទពិសោធន៍ជាង ១៥ឆ្នាំ លើផ្នែកនេះ បានផ្គត់ផ្គង់ប្រភេទស្រាប្រណីតៗ ប្រមាណជាង ៣ពាន់ប្រភេទផ្សេងៗគ្នា ប្រភេទគ្រឿងទេស និងសាច់ សម្រាប់ម្ហូបអឺរ៉ុប ជាច្រើនមុខ ទៅកាន់ភោជនីយដ្ឋានធំៗ ភោជនីយដ្ឋានបែប Fast Food សណ្ឋាគារធំៗ និងផ្សារទំនើបជាច្រើនផងដែរ៕