លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណៈការ និងដឹកជញ្ជូន បានបញ្ជាក់ប្រាប់សារព័ត៌មាន ខេមបូណូមីសថា ក្រោយពីបានឃើញការផ្សព្វផ្សាយព្រោងព្រាត អំពីព័ត៌មានទាក់ទងនឹងគម្រោងស្ពានកម្ពុជា-កូរ៉េ អរិយក្សត្រ ដោយសារព័ត៌មានក្នុងស្រុកមួយចំនួនរួចមក លោកបានឆ្លងទៅថ្នាក់លើនៃក្រសួងសាធារណៈការ និងដឹកជញ្ជូនដើម្បីសាកសួរលម្អិតអំពីរឿងនេះ។ ថ្នាក់ដឹកនាំ ក្រសួងអះអាងថា មិនទាន់មានទទួលបានព័ត៌មានអ្វីអំពី គម្រោងនេះនៅឡើយទេ ហើយលោកក៏មិនដឹងថា ក្រុមសារព័ត៌មានទាំងនោះ បានព័ត៌មានពីណាមក និងរូបភាពគម្រោងនោះពីណាមកដែរ ពោលគឺចេះតែយកចុះផ្សាយដោយគ្មានការពិត ដើម្បីបានតែប្រយោជន៍ផ្ទាល់ខ្លួនប៉ុណ្ណោះ។
អត្ថបទទាក់ទង!
លោក ហ៊ាង សុទ្ធាយុត្តិ បានមានប្រសាសន៍ថា «ចំពោះករណីហ្នឹង យើងមិនទាន់មានព័ត៌មានអីទេ ខ្ញុំបានឆ្លងថ្នាក់ដឹកនាំហើយ គ្មានព័ត៌មានផ្លូវការណាមួយចេញ ហើយក៏គ្មានទាន់មានការសិក្សាណាមួយ ដែលយើងអាចធ្វើការចែករំលែក ឬផ្សព្វផ្សាយបានដែរ វាទើបនៅក្នុងជំហានដំបូងនៅឡើយ។ អញ្ចឹងអ្នកដែលផ្សព្វផ្សាយនេះ គឺធ្វើឲ្យបំពុលបរិយាកាសសង្គម ហើយដើម្បីគ្រាន់តែកេងយកចំណេញខ្លួនឯង មានបុរី មានអី នៅហ្នឹងទេ អញ្ចឹងជារឿងមួយខុសទាំងស្រុងតែម្ដង!»។
បើតាមមន្ត្រីក្រសួងសាធារណៈការ និងដឹកជញ្ជូនរូបនេះ បើយោងតាមនីតិវិធីច្បាប់ ក្រសួងសាធារណៈការ អាចនឹងធ្វើការរាយការណ៍ទៅកាន់ក្រសួងព័ត៌មាន ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុជាដើម ដើម្បីចាត់វិធានការទៅតាមផ្លូវច្បាប់ ចំពោះការការផ្សព្វផ្សាយព័ត៌មានប្រាសចាកការពិតនេះ។
លោក សុទ្ធាយុត្តិ បញ្ជាក់ទៀតថា «គាត់សុទ្ធតែដាក់ Advertisement (ទទួលផ្សាយពាណិជ្ជកម្មលើគេហទំព័រ) អីទៀត និយាយទៅ! បើគាត់រកស៊ីបែបហ្នឹង ខ្ញុំគិតថា គាត់អាចប្រឈម ជាពិសេស ជាមួយនឹងក្រសួងសេដ្ឋកិច្ច និងហិរញ្ញវត្ថុ ក្រសួងដែនដី នគរូបនីយកម្ម និងសំណង់ ក្រសួងព័ត៌មាន ហើយវាប៉ះដល់ក្រសួងខ្ញុំទៀត (ក្រសួងសាធារណៈការ) បាទ! ប៉ះពាល់ហ្នឹងធំណាស់ ហើយវាធ្វើឲ្យដីហ្នឹងឡើងថ្លៃ អត់មានហេតុផល។ យើងមិនទាន់ដឹងថា គេកំណត់ គេព្រម (សាងសង់គម្រោងស្ពាន) ធ្វើកម្រិតប៉ុនណា អីប៉ុនណាផង យើងមានការចុះផ្សាយអញ្ចឹង វាជារឿងខុសឆ្គង ខុសឆ្គងមែនទែនតែម្ដង»។
បើតាមមន្ត្រី ក្រសួងសាធារណៈការដដែលនេះ បានគូសបញ្ជាក់ដែរថា ក្រសួង ស្នើឱ្យម្ចាស់គេហៈទំព័រ ដែលបានផ្សព្វផ្សាយពីរឿងការសាងសង់ស្ពានអរិយក្សត្រនេះ ឲ្យធ្វើការដករឿងនេះចេញជាបន្ទាន់ ដើម្បីកុំឲ្យសាធារណជនទូទៅ មានការយល់ច្រឡំ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
