ពិភពលោកកំពុងបារម្ភ ក្រោយរកឃើញមេរោគកូវីដ-១៩បំប្លែងថ្មីនៅអាហ្រ្វិកខាងត្បូង

បន្ទាប់ពីរកឃើញមេរោគថ្មីនេះ វិទ្យាស្ថានជាតិអាហ្រិកសម្រាប់ជំងឺឆ្លង បាននឹងកំពុងធ្វើការយ៉ាងសកម្មជាមួយនឹងប្រព័ន្ធឃ្លាំមើល ដើម្បីតាមដាន និងស្វែងយល់បន្ថែមពីមេរោគបំប្លែងថ្មីនេះ ក៏ដូចជាផលប៉ះពាល់ដែលអាចកើតមាន។

វិទ្យាស្ថានជាតិអាហ្រ្វិកសម្រាប់ជំងឺឆ្លង បានរាយការណ៍ថា សញ្ញាដំបូងពីមន្ទីរពិសោធន៍រោគវិនិច្ឆ័យបង្ហាញថា មេរោគបំប្លែងថ្មីនេះបានកើនឡើងយ៉ាងលឿននៅក្នុងខេត្ត ហ្គោតេង (Gauteng) ប្រទេសអាហ្វ្រិកខាងត្បូង ពោល គឺគេជឿថា ៩០% នៃករណីឆ្លងថ្មីនៅក្នុងខេត្តនេះ អាចជាមេរោគកូវីដ១៩បំប្លែងថ្មីប្រភេទ B.1.1.529  ហើយមេរោគនេះ ត្រូវបានគេដាក់ការសង្ស័យថាកំពុងមានវត្តមាននៅក្នុងខេត្តចំនួន ៨ ផ្សេងទៀតរបស់ប្រទេសនេះផងដែរ។

ក្រៅពីប្រទេសអាហ្វ្រិកខាងត្បូង មេរោគបំប្លែងថ្មីនេះ ក៏ត្រូវបានរកឃើញនៅក្នុងប្រទេសបូតស្វាណា និង ក្រុងហុងកុងផងដែរ ខណៈករណីនៅហុងកុងត្រូវបានរកឃើញលើអ្នកធ្វើដំណើរមកពីអាហ្វ្រិកខាងត្បូងតែម្ដង។

តែយ៉ាងណាមិញ គេមិនទាន់ឃើញមានការប៉ាន់ប្រមាណណាមួយដែលបង្ហាញអំពីវិសាលភានៃមេរោគថ្មីនេះ  អាចចម្លងបានលឿន ឬ អាចកាត់ផ្ដាច់ប្រព័ន្ធការពាររបស់វ៉ាក់សាំងដែលពិភពកំពុងប្រើប្រាស់សព្វថ្ងៃនេះនៅឡើយទេ ព្រោះថាវាលឿនពេកក្នុងការផ្តល់ការវាយតម្លៃផ្អែកលើភស្តុតាងនៃហានិភ័យរបស់មេរោគនេះ។

គួរជម្រាបថា ក្រោយពីអាហ្វ្រិកខាងត្បូង បានប្រកាសរកឃើញមេរោគបម្លែងថ្មីនេះ អង់គ្លេសបានដាក់ការព្រួយបារម្ភកាន់ខ្លាំងឡើង ខណៈស្ថានភាពកូវីដ១៩នៅតំបន់អឺរ៉ុបផ្ទាល់ក៏កំពុងតែកើនឡើងហួសកំណត់ត្រា។ ជាក់ស្ដែង អង់គ្លេសបានដាក់ចេញជាបន្ទាន់នូវវិធានការរឹតបន្តឹងការធ្វើដំណើរ និងហាមឃាត់ការហោះហើរជាបណ្តោះអាសន្នពីអាហ្វ្រិកខាងត្បូង និងប្រទេសជិតខាងចំនួន ៥ ផ្សេងទៀត ចាប់ពីថ្ងៃសុក្រនេះតទៅ។ 

សូមរំឮកថា មេរោគបំប្លែងថ្មី B.1.1.529  ជាមេរោគទី ២ ដែលត្រូវបានរកឃើញនៅអាហ្រ្វិកខាងត្បូង បន្ទាប់ពីរកឃើញមេរោគបំប្លែងថ្មី បេតា កាលពីឆ្នាំមុន ហើយវាក៏ជាមេរោគដែលWHO មានការព្រួយបារម្ភផងដែរ ពីព្រោះវាមានសមត្ថភាពអាចចម្លងបានលឿន ខណៈវ៉ាក់សាំងមានប្រសិទ្ធភាពតិចតួចប្រឆាំងនឹងមេរោគបេតានេះ៕

អត្ថបទ ស៊ើង និមល់