ក្រោយមក នៅអំឡុងខែ ក្រុមហ៊ុនរ៉ូយ៉ាល់រ៉េលវេបាននាំចូលរថភ្លើងថ្មីចំនួន៣គ្រឿងទៀតពីប្រទេសម៉ិចស៊ីកូ ជំនួសឲ្យរថភ្លើងចាស់ដែលឧស្សាហ៍មានបញ្ហានោះ។ រថភ្លើងថ្មីនេះ ទោះបីជាមិនទំនើបដូចរថភ្លើងនៅប្រទេសមួយចំនួនក្នុងតំបន់អាស៊ីក៏ពិតមែន តែក៏អាចដាត់ទុកថា គ្រាន់បើជាងរថភ្លើងចាស់ពីមុន ព្រោះបានបំពាក់នូវឧបករណ៍ទំនើបៗជាងមុន ហើយមានម៉ាស៊ីនត្រជាក់ប្រសើរជាងមុនដែរ។ បែបនេះក្តី ក៏នៅតែមិនសូវមានអ្នកជិះដដែល។
ថ្មីៗនេះក្រុមការងារសារព័ត៌មានអេឡិចត្រូនិចខេមបូណូមីស បានធ្វើដំណើរតាមរថភ្លើងជាថ្មីម្តងទៀត ដោយបានជិះរថភ្លើងថ្មីនេះ សង្កេតឃើញថា មានអ្នកជិះតែ២នាក់ប៉ុណ្ណោះ មួយជើង គឺជាកងរាជអាវុធហត្ថម្នាក់ អ្នកយកព័ត៌មានរបស់ខេមបូណូមីសម្នាក់ ក្រៅពីនេះ គឺបុគ្គលិករបស់ក្រុមហ៊ុនរ៉េលវ៉េ៣នាក់ ខណៈដែលទូររថភ្លើងនីមួយៗអាចផ្ទុកមនុស្សបានពី ៤០ ទៅ៥០នាក់ឯណោះ។
អត្ថបទទាក់ទង!
តាមការសាកសួរខ្លះៗទៅកាន់អ៊ំស្រីម្នាក់ ដែលជាបុគ្គលិកដើរតាមរថភ្លើង(ប្រ៊ូររថភ្លើង) បាននិយាយថា ចាប់តាំងពីប្តូររថភ្លើងថ្មីមកនៅតែដដែល ពោលគឺ មិនសូវមានអ្នកជិះ ។ ក្នុងលក្ខខណ្ឌសុំមិនបញ្ចេញឈ្មោះ អ៊ំស្រីបានរៀបរាប់ថា កាលពីយកមកលើកដំបូង រថភ្លើងថ្មីក៏ឧស្សាហ៍មានបញ្ហាដែរ ដោយពេលខ្លះជ្រុះកាងពេលកំពុងបើកបរ ពេលខ្លះត្រូវខូចកណ្តាលផ្លូវក៏មាន តែក្រោយមកទៀតក៏លែងសូវមានបញ្ហា ក្រោយពីជាងជំនាញរបស់ក្រុមហ៊ុនឧស្សាហ៍ត្រួតពិនិត្យ ។ អ៊ំស្រីបានបន្ថែមថា ចាប់ពីថ្ងៃច័ន្ទ ដល់ថ្ងៃសុក្រ គឺមិនសូវមានអ្នកជិះទេ ដោយថ្ងៃខ្លះ ២ទៅ៣នាក់ ហើយថ្ងៃខ្លះទៀត គ្មានមនុស្សជិះសោះក៏មាន។ សម្រាប់ថ្ងៃសៅរ៍និងអាទិត្យ ហាក់គ្រាន់បើបន្តិច។
ពលរដ្ឋរស់នៅ និងប្រកបរបររកទទួលទាននៅតាមបណ្តោយផ្លូវភ្លើង ដែលចេញចូលព្រលានយន្តហោះ ហាក់មានគំនិតវិជ្ជមានច្រើនចំពោះរថភ្លើងថ្មីនេះ។
រថភ្លើថ្មី ដែលទើបនាំចូលមក
ខណ្ឌពោធិ៍សែនជ័យបានរៀបរាប់ថា រថភ្លើងចេញចូលព្រលានយន្តហោះថ្មីនេះហាក់ប្រសើរជាងមុន។ ប្រសើរព្រោះតែមិនសូវបានបង្កគ្រោះថ្នាក់ និងមិនសូវមានសំលេងរំខានដូចរថភ្លើងចាស់ តែគាត់សង្កេតឃើញថានៅតែគ្មានអ្នកជិះដដែល ។
ចំណែកលោក ផល្លា ជាម្ចាស់ហាងកាហ្វេ ដែលមានទីតាំងនៅតាមបណ្តោយផ្លូវរថភ្លើងដែរនោះ បានឲ្យដឹងថា តាំងពីរថភ្លើងថ្មីនេះ ដំណើរការមក លោកមិនទាន់លឺថាមានបង្កបញ្ហាអ្វីធំដុំដូចរថភ្លើងចាស់ទេ ដោយលោកគិតថា រថភ្លើងថ្មីនេះ មានហ្វ្រាំងត្រឹមត្រូវ ដែលអាចគ្រប់គ្រងស្ថានការណ៍បានទាន់ពេលវេលា បើសិនមានឧបសគ្គនៅខាងមុខ។
អត្ថបទពិសេស!
ស្រដៀងគ្នានេះដែរ លោក សេរី ដែលឧស្សាហ៍មកទទួលទានការហ្វេនៅហាងរបស់លោក ផល្លា បានយល់ឃើញថា ការធ្វើដំណើរតាមរថភ្លើង គឺមានលក្ខណៈងាយស្រួលជាងធ្វើដំណើរដោយរថយន្ត និងម៉ូតូ ព្រោះអាចកាត់បន្ថយការកកស្ទះចរាចរណ៍ ចំណេញពេលវេលា និងមានផាសុកភាពផងដែរ។ តែអ្វី ដែលជាបញ្ហាចំពោះលោកនិងពលរដ្ឋដទៃទៀតនោះគឺ តម្លៃនិងចំណត។ លោកបានបន្តថា តម្លៃ១ម៉ឺនរៀល សម្រាប់ការធ្វើដំណើរ គឺថ្លៃបន្តិចសម្រាប់ពលរដ្ឋដែលមានកម្រិតជីវភាពមធ្យមដូចលោក។ មួយវិញទៀត ដោយសារ រថភ្លើងនេះមានចំណតតែ ២គឺនៅស្ថានីយ៍និងនៅព្រលានហោះតែម្តង ដែលពិបាកឲ្យពលរដ្ឋដំណើរទៅ បើសិនជាគាត់ចង់ជិះ ទាល់ទៅស្ថានីយ៍ ទើបពលរដ្ឋមិនសូវចាប់អារម្មណ៍ជិះ។
តាមការសំណូមពររបស់ពលរដ្ឋទាំង៣នាក់នេះ គឺចង់ឲ្យមានការបញ្ចុះតម្លៃសំបុត្រ និងរៀបចំឲ្យមានចំណតច្រើនដូចរថយន្តក្រុងសាធារណៈ ទើបអាចមានពលរដ្ឋចាប់អារម្មណ៍ធ្វើដំណើរតាមមធ្យោបាយនេះច្រើនបាន ។ ម្យ៉ាងវិញទៀត ពួកគាត់ក៏ស្នើឲ្យមានការផ្សព្វផ្សាយឲ្យបានទូលំទូលាយជាងមុន ជុំវិញតម្លៃសេវា និងពេលវេលាចេញដំណើររបស់រថភ្លើង ដើម្បីលើកទឹកចិត្តឲ្យពលរដ្ឋប្រើប្រាស់សេវាសាធារណៈមួយនេះ ឲ្យកាន់ច្រើន ក្នុងន័យអាចកាត់បន្ថយការកកស្ទះចរាចរណ៍នៅលើផ្លូវគោក។
ជាការពិតណាស់ មានប្រទេសជាច្រើននៅក្នុងតំបន់អាស៊ី បានរៀបចំឲ្យមានការធ្វើដំណើរតាមរថភ្លើងទាំងលើអាកាស លើដី និងក្រោមដីជាដដើម ដើម្បីបញ្ជៀសការកកស្ទះនៅលើផ្លូវគោក ដែលការធ្វើដំណើរតាមរថភ្លើងនេះគឺ មានតម្លៃសមរម្យសម្រាប់ពលរដ្ឋដែលមានកម្រិតជីវភាពមធ្យម និងទាប ដោយមានពលរដ្ឋជាច្រើនគាំទ្រផងដែរ។ ចុះចំនែករថភ្លើងដឹកអ្នកដំណើរនៅកម្ពុជាវិញ នឹងមានជោគវាសនាបែបណា បើសព្វថ្ងៃមិនសូវមានអ្នកជិះផងនោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
