នៅក្នុងវីដេអូដែលមានរយ:ពេល១នាទី៥០វិនាទី ហើយដែលបង្ហោះលើទំព័រហ្វេសប៊ុកស្ថានទូតអាមេរិកនៅកម្ពុជា លោក W.Patrick Murphy បាននិយាយទាំងភាសាខ្មែរនិងអង់គ្លេសផងថា លោកមាន«កិត្តិយស» ដែលបានត្រូវតែងតាំងជាឯកអគ្គរដ្ឋទូតថ្មី។
លោក W.Patrick Murphy បាននិយាយដូច្នេះថា «កិច្ចសហប្រតិបត្តិការរវាងសហរដ្ឋអាមេរិកនិងកម្ពុជា រួមមាន ការអភិវឌ្ឍ ពាណិជ្ជកម្ម សុខភាពសាធារណៈ ការអនុវត្តច្បាប់ ការអភិរក្សវប្បធម៌ និងការផ្លាស់ប្តូរគ្នារវាងប្រជាជននិងប្រជាជន។»
លោក W.Patrick Murphy បាននិយាយបន្តដូច្នេះថា «ខ្ញុំប្តេជ្ញាចិត្តជួយប្រទេសយើងទាំងពីរពង្រឹងចំណងមិត្តភាពទាំងនេះ និងជួយគាំទ្រដល់ប្រទេសកម្ពុជាមួយ ដែលមានឯករាជ្យនិងប្រជាធិបតេយ្យ ប្រកបដោយភាពរឹងមាំល្អ និងវិបុលភាព។»
អត្ថបទទាក់ទង
លោក W.Patrick Murphy បានបញ្ចប់សាររបស់លោកជាមួយនឹងពាក្យជាភាសាខ្មែរថា «ជួបគ្នាឆាប់ៗនេះ។»
ព្រឹទ្ធសភាសហរដ្ឋអាមេរិកនៅថ្ងៃទី២ ខែសីហា បានអនុម័តបេក្ខភាពលោក W. Patrick Murphy ឲ្យក្លាយជាឯកអគ្គរដ្ឋទូតវិសាមញ្ញនិងពេញសមត្ថភាពរបស់ប្រទេសខ្លួន ប្រចាំនៅប្រទេសកម្ពុជា បន្ទាប់ពីអវត្តមានអ្នកការទូតជាច្រើនខែមក។
មុនការងារជាឯកអគ្គរដ្ឋទូត, លោក W. Patrick Murphy គឺជាឧការីរងទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក ហើយក៏ធ្លាប់ធ្វើការនៅស្ថានទូតអាមេរិកប្រចាំទីក្រុងបាងកក និងប្រទេសមីយ៉ាន់ម៉ា ផងដែរ។
ទំនាក់ទំនងរវាងកម្ពុជានិងអាមេរិក ហាក់មិនសូវល្អប៉ុន្មានទេ ក្នុងរយៈពេលប៉ុន្មានឆ្នាំចុងក្រោយនេះ ក្រោយពីទីក្រុងវ៉ាស៊ីនតោន បានរិះគន់ការបោះឆ្នោតនៅកម្ពុជា កាលពីឆ្នាំ២០១៨ ថា មិនសេរីនិងយុត្តិធម៌ នៅក្នុងចំណោមការរិះគន់លើស្ថានភាពសិទ្ធិមនុស្ស និងនយោបាយផ្សេងៗទៀត៕
