បណ្ឌិត ផុន ណារិន នាយកវិទ្យាស្ថានពាណិជ្ជសាស្រ្តអេស៊ីលីដា (AIB) បានឲ្យដឹងថា នៅក្នុងឆ្នាំ២០២០កន្លងទៅ ទោះមានវិបត្តិកូវីដ១៩ ហើយត្រូវរៀនតាមប្រព័ន្ធអនឡាញក៏ដោយ តែចំនួន សិក្ខាកាម ដែលបានទៅបណ្តុះបណ្តាលនៅវិទ្យាស្ថានមានការកើនឡើងដល់ជាង២០០% បើធៀបនឹងឆ្នាំ២០១៩។
លោកនាយកវិទ្យាស្ថានពាណិជ្ជសាស្រ្តអេស៊ីលីដា បានបន្ថែមថា ៖« សហគ្រិនពីខាងក្រៅ ដែលមករៀនជាមួយ(AIB) ២០១៩-២០២០ហ្នឹង គឺមានការកើនឡើង លើសគ្នាស្ទើរតែ២ដង មានន័យថា នៅក្នុងឆ្នាំ២០២០ ត្រឹមតែខែ៣ គឺមុនពេលសាលាបិទដោយសារកូវីដ គឺមានសិក្ខាកាមដែលចុះឈ្មោះមករៀននៅសាលាផ្ទាល់បាន ២ពាន់នាក់ ក្រោយមកកូវីដ យើងរៀនតាមអនឡាញ អញ្ចឹងអនឡាញ បានជាង១ពាន់នាក់ទៀត សរុបបានជាង ៣.៦០០នាក់ ដូចនេះបើគិតជាភាគរយកើនឡើងប្រមាណជាង២០០% សម្រាប់អ្នកខាងក្រៅដែលមករៀនវគ្គបណ្តុះបណ្តាលខ្លីនៅស្ថាប័នយើង»។
អត្ថបទទាក់ទង!
ចំពោះការបើកថ្នាក់បរិញ្ញាបត្រជាន់ខ្ពស់ ឬអនុបណ្ឌិតរបស់វិទ្យាស្ថាននាពេលនេះដែរ ត្រូវបានបណ្ឌិត ផុន ណារិន បានបញ្ជាក់ថា និស្សិតដែល បញ្ចប់ថ្នាក់បរិញ្ញាបត្រពីវិទ្យាស្ថានពាណិជ្ជសាស្រ្តអេស៊ីលីដា (AIB) មានជាង៥០%ហើយ ដែលនឹងបន្តបរិញ្ញាបត្រជាន់ខ្ពស់ជាមួយវិទ្យាស្ថាន ហើយបន្ថែមពីនេះទៀត ក៏មានការសំណូមពរពីសិក្ខាកាមចម្រុះ ដែលបានស្នើមកកាន់វិទ្យាស្ថានឲ្យបើកថ្នាក់អនុបណ្ឌិតផងនោះ ទើបវិទ្យាស្ថាន សម្រេចបើកថ្នាក់បរិញ្ញាបត្រជាន់ខ្ពស់ទៅលើជំនាញសំខាន់ៗទាំង៣នេះ ដើម្បីបន្តបណ្តុះបណ្តាលធនធានមនុស្សប្រកបដោយគុណភាព។ក្រៅពីនេះ វិទ្យាស្ថានក៏បានផ្តល់អាហារូបករណ៍ ២០% ដល់អ្នកដែលមានបំណងចង់សិក្សាថ្នាក់បិរញ្ញាបត្រជាន់ខ្ពស់នៅវិទ្យាស្ថានពាណិជ្ជសាស្រ្តអេស៊ីលីដាផងដែរ។
បណ្ឌិត ផុន ណារិន នាយកវិទ្យាស្ថានពាណិជ្ជសាស្រ្តអេស៊ីលីដា (AIB)
គូសបញ្ជាក់ថា ថ្វីត្បិតទើបតែ ដំណើរការក្នុងរយៈពេលខ្លីមែន តែគេសង្កេតឃើញថា វិទ្យាស្ថានពាណិជ្ជសាស្រ្តអេស៊ីលីដា បានរីកដុះដាលយ៉ាងលឿន ដោយក្នុងនោះគ្រាន់តែរយៈពេល៤ឆ្នាំមកនេះ វិទ្យាស្ថាន បានបណ្តុះបណ្តាលសិក្ខាកាម ដែលមកពីស្ថាប័នផ្សេងៗក៏ដូចជាស្ថាប័នដៃគូប្រមាណ៧០ម៉ឺននាក់ និងនិស្សិតដែលសិក្សាថ្នាក់បរិញ្ញាបត្រជាង២ពាន់នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
