កត្តាអ្វីខ្លះជំរុញឲ្យតម្លៃប្រេងឆៅហក់ឡើងដល់៨០ដុល្លារក្នុងមួយធុងបារ៉ែលនៅសប្ដាហ៍នេះ?

តម្លៃប្រេងឆៅពិភពលោកបានបន្ដហក់ឡើងបន្ថែមទៀតនៅដើមសប្ដាហ៍នេះ ដោយគិតត្រឹមថ្ងៃពុធសប្ដាហ៍នេះ តម្លៃប្រេងឆៅនៅអង់គ្លេសបានហក់ឡើងដល់ ៨០ដុល្លារអាមេរិកក្នុងមួយធុងបារ៉ែល ជាតម្លៃខ្ពស់បំផុតគិតតាំងពីខែវិច្ឆិកាឆ្នាំ២០២១មក។ តម្លៃប្រេងឆៅហក់ឡើងខ្ពស់នេះ នៅគ្រាដែលអង្គការប្រទេសផលិត និងនាំចេញប្រេង OPEC+ បានយល់ព្រមរក្សាការបង្កើនការផលិតប្រេងតាមផែនការដូចដែលបានគ្រោងទុកសម្រាប់ខែកុម្ភៈឆ្នាំ២០២២ ដោយផ្អែកទៅលើស្ថានភាពអូមីក្រុងអាចមានផលប៉ះពាល់តិចតួចចំពោះតម្រូវការប្រើប្រាស់ប្រេង។

កម្មករដើរពិនិត្យមើលធុងដាក់ប្រេងឆៅ

តម្លៃប្រេងនៅអង់គ្លេសគិតត្រឹមថ្ងៃពុធសប្ដាហ៍នេះ បានហក់ឡើង ជាង១ដុល្លារបន្ថែមទៀត ឬស្មើនឹង១,៣% ដែលបានធ្វើឲ្យប្រេងមួយធុងបារ៉ែលមានដល់ ៨០ដុល្លារអាមេរិក។ ដោយឡែក ទីផ្សារប្រេងឆៅនៅអាមេរិកវិញបានកើនឡើង ៩១សេន ឬស្មើនឹង១,២%ទៀត ដែលបាននាំឲ្យតម្លៃប្រេងកើនដល់ប្រមាណ៧៧ដុល្លារក្នុងមួយធុងបារ៉ែល។

តម្លៃប្រេងហក់ឡើងនេះ ក្រោយមានកិច្ចប្រជុំមួយរបស់អង្គការ OPEC+ ដែលបានយល់ព្រមរក្សាផែនការបង្កើនការផលិតប្រេងបន្ថែមក្នុងមួយថ្ងៃ ៤០ម៉ឺនបារ៉ែល នៅក្នុងខែកុម្ភៈខាងមុខនេះ។ សេតវិមានអាមេរិក បានស្វាគមន៍ចំពោះការសម្រេចចិត្តរបស់ OPEC+នេះ ដើម្បីបន្ដការបង្កើនផលិតកម្មប្រេង ដែលនឹងជួយគាំទ្រដល់ការងើបឡើងវិញនៃសេដ្ឋកិច្ចពិភពលោក។

អ្នកជំនាញបានព្យាករថា អង្គការ OPEC+ នឹងបន្ដបង្កើនការផលិតប្រេងថែមទៀតនៅប៉ុន្មានខែខាងមុខនេះ ហើយកំណើនតម្រូវការនឹងមានធម្មតាឡើងវិញ តម្លៃប្រេងក៏ថមថយចុះមកវិញដែរ។ តាមការព្យាករ តម្លៃប្រេងនៅចុងឆ្នាំ២០២២ សម្រាប់ទីផ្សារអង់គ្លេសអាចនឹងមាននៅត្រឹមតែ ៦០ដុល្លារអាមេរិកក្នុងមួយធុងបារ៉ែល៕