អង្គការ OPEC និងសម្ព័ន្ធមិត្ត រួមមានទាំងប្រទេសរុស្ស៊ី បានសម្រេចកាត់បន្ថយ ការផ្គត់ផ្គង់ប្រេង រយៈពេល ៣ខែ ពោលគឺពេញមួយត្រីមាសទី ១ ឆ្នាំ ២០២០ ដើម្បីជួយស្រោចស្រង់ដល់តម្លៃទីផ្សារប្រេង ដែលរងប៉ះពាល់ដោយ ភាពទន់ខ្សោយនៃសេដ្ឋកិច្ចសកល និងការស្តុកទុកប្រេង នៅមានលើសពីតម្រូវការទីផ្សារ ហើយក្រុមអ្នកផលិតប្រេងទាំងអស់នេះ នឹងជជែកគ្នាជាថ្មីម្តងទៀត នៅក្នុងខែមីនា ដើម្បីកំណត់គោលការណ៍ថ្មី។
លោក អាឡិចសានដឹ ណូវ៉ាក រដ្ឋមន្រ្តីក្រសួងថាមពលរុស្ស៊ី បានបញ្ជាក់ថា ក្រុមប្រទេសផលិតប្រេងជាង ២០ប្រទេសនេះ នឹងកាត់បន្ថយការផលិត ៥សែនបារ៉ែលក្នុងមួយថ្ងៃបន្ថែមទៀត សម្រាប់ត្រីមាសទី ១ ឆ្នាំ២០២០ ដែលធ្វើឲ្យការកាត់បន្ថយសរុបកើនដល់ ១,៧ លានបារ៉ែលក្នុងមួយថ្ងៃ ដែលស្មើនឹង ១,៧% នៃតម្រូវការប្រេងទូទាំងសកលលោក។
អត្ថបទទាក់ទង!
នាឱកាសនោះដែរ ប្រទេសអារ៉ាប៊ីសាអ៊ូឌីត ដែលជាប្រទេសផ្គត់ផ្គង់ប្រេងឆៅឈានមុខគេក្នុងពិភពលោក បានស្ម័គ្រចិត្តកាត់បន្ថយការផ្គត់ផ្គង់ប្រេងឆៅ ប្រមាណ ៤សែនបារ៉ែលក្នុងមួយថ្ងៃ ដែលធ្វើឲ្យការកាត់បន្ថយសរុបកើនដល់ ២,១ លានបារ៉ែលក្នុងមួយថ្ងៃ។
អ្នកជំនាញអះអាងថា ការកាត់បន្ថយនេះ អាចនឹងផ្តល់ផលប្រយោជន៍ដល់ អាមេរិក ច្រើនជាងគេ ដោយសារតែអាមេរិក មិនមានសម្ព័ន្ធមិត្តជាមួយ កិច្ចព្រមព្រៀងផ្គត់ផ្គង់ប្រេង ណាមួយនោះទេ។
ក្រោយការសម្រេចកាត់បន្ថយការផ្គត់ផ្គង់នេះ តម្លៃប្រេងឆៅនៅលើទីផ្សារអន្តរជាតិ បានកើនឡើងបន្តិច ដូចជា ទីផ្សារ Brent របស់អង់គ្លេស កើនឡើង ២% ខណៈទីផ្សារអាមេរិក West Texas Intermediate កើនឡើង ២% ដូចគ្នា។
សូមជម្រាបថា គិតត្រឹមថ្ងៃទី ១០ ខែ ១២នេះ តម្លៃប្រេងឆៅនៅលើទីផ្សារអន្តរជាតិ បានថយចុះបន្តិចមកវិញ សម្រាប់ការលក់ និងចែកចាយក្នុងខែមករា និងខែកុម្ភៈ ខាងមុខ ដូចជា ទីផ្សារ Brent របស់អង់គ្លេស ថយចុះ ១៤សេន មកនៅត្រឹម ៦៤ដុល្លារ ២៥សេន ក្នុងមួយបារ៉ែល ខណៈទីផ្សារអាមេរិកប្រេង West Texas Intermediate ថយចុះ ១៨សេន មកនៅត្រឹម ៥៩ដុល្លារ ក្នុងមួយបារ៉ែល៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
