ក្រុមហ៊ុន Oxley Gem ប្រកាសបញ្ចប់កិច្ចសន្យាម៉ៅការ​សាងសង់​គម្រោងអគារ The Peak ជាមួយ ក្រុមហ៊ុន Sino Great Wall និងតែងតាំងដៃគូម៉ៅការសាងសង់ថ្មី

តាម​សេចក្ដី​ប្រកាស​ព័ត៌មាន​របស់ក្រុមហ៊ុន Oxley Gem បាន​ឲ្យដឹងថា ដោយ ​ការប្តេជ្ញាចិត្តយ៉ាងខ្ជាប់ខ្ជួន​ចំពោះព្រះរាជាណាចក្រ​កម្ពុជា ជាដៃគូយុទ្ធសាស្ត្រ និង ជាវិនិយោគិន​នៃគម្រោងអភិវឌ្ឍន៍ The Peak នេះ  ក្រុមហ៊ុន Oxley Gem បានចេញ​លិខិតបញ្ចប់កិច្ច​សន្យា​ម៉ៅការសាងសង់​ជាមួយក្រុមហ៊ុន​ Sino Great Wall International Engineering Co, Ltd (“ SINO”) ​នៅថ្ងៃទី១៤ ខែតុលា ឆ្នាំ២០១៩ រួចហើយ​ ក្នុងបំណងអនុញ្ញាត​ឱ្យអ្នកម៉ៅការ​ដ៏សំខាន់​ដែលមាន​សមត្ថភាព និងមានហិរញ្ញវត្ថុ​អាចបន្តការស្ថាបនា​គម្រោងនេះ​ដោយរលូន ដោយមិនមាន​ការបញ្ឈប់​ការងារសាងសង់​ឡើយ។

ក្រោមហ៊ុន Oxely Gem បានសង្តត់ធ្ងន់ថា «នេះគឺជាការ​សម្រេចចិត្ត​ជាយុទ្ធសាស្ត្រ​របស់យើង ដែលបាន​សម្រេច​​អនុវត្តបន្ទាប់​ពីការខិតខំរួមគ្នា​ក្នុងការជួយ​ក្រុមហ៊ុន​ SINO ប៉ុន្តែក្រុមហ៊ុន SINO មិនបានបង្ហាញ​លទ្ធផល​ប្រតិកម្ម​តបមកវិញ​គួរឱ្យកត់សម្គាល់​ទេ»។ ​

ក្នុងករណីសម្រេច​ធ្វើដូច្នេះ ក្រុមហ៊ុន Oxley Gem បានចេញមុខ​ធានា​ថា គ្មានការ​ពន្យារពេល​ហួសហេតុ​ពេកណាមួយ ត្រូវកើតឡើង​ខុសពីផែនការ​នៃការបញ្ចប់​ការសាងសង់​គម្រោងនេះ និងការប្រគល់​ជូនដល់អតិថិជន ជូនដល់ដៃគូ និងវិនិយោគិន​ ​ផ្ទុយពីកាលបរិច្ឆេទ​ដែលបានចុះ​ក្នុងកិច្ចព្រមព្រៀង​ឡើយ។

បច្ចុប្បន្ន ក្រុមហ៊ុន Oxley Gem កំពុងធ្វើការ​យ៉ាងជិតស្និទ្ធ​ជាមួយក្រុមហ៊ុន​ស៊ីណូ​ដើម្បីធានា ថាបុគ្គលិក និងអ្នកម៉ៅ​ការរង​ទាំងអស់​ទទួលបាន​ប្រាក់ខែ​ត្រឹមត្រូវ​សម្រាប់ការងារ​ដែលបានធ្វើ។ ក្រុមហ៊ុន Oxley Gem ​នៅតែស្ថិត​ជាអាទិភាព​ខ្ពស់បំផុត​ក្នុងការ​ការពារផលប្រយោជន៍​របស់ភាគី​រងគ្រោះ​ពីផលប៉ះពាល់​នានា​បើមានជាអាទិ៍។ 

ជាមួយគ្នានេះក្រុមហ៊ុន Oxley Gem ក៏បានទទួល​ការបញ្ជាក់ថាដែរ «អ្នកម៉ៅការ​សំខាន់ថ្មី​របស់​យើង នឹងត្រូវមកជួប​ជាមួយភាគី​រងគ្រោះទាំងអស់ ដើម្បីពិនិត្យ​មើលវិសាលភាព​ការងារ​របស់ពួកគេ​ និងចរចាកិច្ចសន្យា​ការងារ​ថ្មីជាមួយពួកគេ​ក្នុងកម្រិត​ល្អបំផុត»។

ក្នុងនាមក្រុមហ៊ុន និងភាគីពាក់ព័ន្ធ​ទាំងអស់​ដែលជាប់ពាក់ព័ន្ធ​នឹងគម្រោងអភិវឌ្ឍន៍ The Peak ក្រុមហ៊ុន បានបញ្ជាក់ថា នឹងមិនឲ្យ​មានផលប៉ះពាល់ការងារ ដោយសារ​ការបញ្ចប់​ក្រុមហ៊ុន SINO និងការជំនួស​ដោយអ្នកម៉ៅ​ការថ្មី​ឡើយ៕