ថ្លែងនៅឯការដ្ឋានសាងសង់ពហុកីឡដ្ឋានជាតិ ក្នុងខណ្ឌជ្រោយចង្វារ សម្តេច ហ៊ុន សែន បានបង្ហាញនូវព័ត៌មានលម្អិតអំពីការចាប់ខ្លួនមន្រ្តីសុរិយោដីខេត្តពោធិ៍សាត់ ចំនួន ៣នាក់ កាលពីសប្តាហ៍មុន ដែលបានទាមទារលុយចំនួន១០ម៉ឺនដុល្លារពីមន្រ្តីបង្កប់របស់អង្គភាពប្រឆាំងអំពើពុករលួយ ជាថ្នូរនឹងច្បាប់សាងសង់។
សម្តេច ហ៊ុន សែន បានមានប្រសាសន៍ដូច្នេះថា ៖ «ចាប់ពីថ្ងៃនេះទៅ បញ្ជូនអង្គភាពប្រឆាំងអំពើពុករលួយ ចាប់យកត្រង់ៗតែម្ដង។»
សម្តេច ហ៊ុន សែន បានបន្តថា មន្រ្តីទាំងបីនាក់នោះ បានទារលុយចំនួន៥ម៉ឺនដុល្លារ ពីរោងចក្រជាថ្នូរនឹងច្បាប់សាងសង់ គឺជារោងចក្រដែលសម្តេចគ្រោងនឹងទៅធ្វើពិធីបើក ដូច្នេះហើយ សម្តេចបានបញ្ជាឲ្យអង្គភាពប្រឆាំងអំពើពុករលួយបើកការស៊ើបអង្កេត។
យោងតាមសម្តេច ហ៊ុន សែន នៅពេលដែលអង្គភាពប្រឆាំងអំពើពុករលួយបានបញ្ជូនមន្រ្តីខ្លួនទៅស៊ើបដោយក្លែងបន្លំជាម្ចាស់ក្រុមហ៊ុន អ្នកទាំងនោះបានដំឡើងការទាមទាររបស់ខ្លួន ពី ៥ម៉ឺនដុល្លារទៅ ១០ម៉ឺនដុល្លារ។
អត្ថបទទាក់ទង
សម្តេច ហ៊ុន សែន បានអះអាងដូច្នេះថា ៖ «ដល់គេសុំសាងសង់ វាទារលុយគេ ដំបូង ត្រឹមតែ ៥ម៉ឺនទេ វាយឺតការអាហ្នឹង។ ដល់ក្រោយមក ខ្ញុំធ្វើការនឹងអង្គភាពប្រឆាំងអំពើពុករលួយ ឱម យិនទៀង ដើម្បីស្រាវជ្រាវ។ គេឲ្យមន្រ្តីចូលទៅក្លែងបន្លំធ្វើជាអ្នកម្ចាស់ក្រុមហ៊ុន អានោះវាឡើងថ្លៃមួយជាពីរ ពី ៥ម៉ឺន ទៅ ១០ម៉ឺន [ដុល្លារ]។»
មន្រ្តីសុរិយោដីទាំងនោះ បានទារឲ្យកក់ ៥ម៉ឺនដុល្លារមុន ហើយភ្នាក់ងារស៊ើបអង្កេតនោះ ដែលបង្កប់ជាម្ចាស់ក្រុមហ៊ុន ក៏ព្រមបង់ប្រាក់កក់ ហើយក៏បានធ្វើការចាប់ខ្លួនតែម្តងមក។ នេះបើយោងតាម សម្តេច ហ៊ុន សែន។
សម្តេច ហ៊ុន សែន មានប្រសាសន៍ដូច្នេះថា ៖ «កក់រួចហើយ យកមកបណ្តោយ។ ថ្ងៃក្រោយ ឲ្យរាង អភិក្រមទី៥ ត្រូវបានអនុវត្ត អត់មានលើកលែង។»
សម្តេច ហ៊ុន សែន ក៏បានបញ្ជាឲ្យ មិនត្រឹមតែដកតំណែងអ្នកទាំងនេះទេ តែគឺត្រូវពិនិត្យលើការដកហូតទ្រព្យសម្បតិ ផងដែរ។
លោក វឌ្ឍនា សារពង្ស ឬដែលគេស្គាល់ច្រើនថាជា លោក វិល្លាម និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ពីគណបក្សខ្មែរក្រោក បានបញ្ចេញទស្សនៈនៅលើហ្វេសប៊ុកគាត់ ថា រីករាយចំពោះយន្តការនេះ ហើយថា ការបោសសម្អាតធ្វើឲ្យកម្ពុជាចំណេញបានលើសលុប ចំណេញជាងមាន EBA រាប់រយដង។
លោក វឌ្ឍនា សារពង្ស បានសរសេរដូច្នេះថា ៖ «បច្ចុប្បន្ន ពលរដ្ឋរស់មិនបានសុខទេ ដោយសារពួកទុច្ចរិតជ្រកក្រោមផ្លាកជាមន្ត្រីកំពុងពើងទ្រូងយ៉ាងសម្បើមក្នុងការប្រើប្រាស់មុខងាររបស់ខ្លួនដែលត្រូវបម្រើសេវាសាធារណៈទៅបំផ្លិចបំផ្លាញសង្គមដើម្បីបម្រើមហិច្ឆតាខ្លួនឯង»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
