អ្វីដែលគួរឲ្យកត់សម្គាល់ក្នុងរយៈពេល ៩ខែដើមឆ្នាំ ២០១៨នេះ តួលេខវិនិយោគមកពីប្រទេសចិន ឈរនៅលំដាប់ថ្នាក់កំពូលគេបង្អស់ ក្នុងចំណោមវិនិយោគក្រៅប្រទេស និងក្នុងស្រុក ដែលរូមចំណែកប្រមាណ ៦៧ភាគរយនៃទុនវិនិយោគសរុបចំនួន ៤.៧០០ លានដុល្លារអាមេរិក ខណៈការវិនិយោគក្នុងស្រុក (កម្ពុជា) ដែលជាម្ចាស់ផ្ទះផ្ទាល់តែម្តង បានឈរនៅលំដាប់ថ្នាក់កំពូលទី ២ ដែលមានប្រមាណ ២៦ភាគរយនៃទុនវិនិយោគសរុបនៅក្នុង ៩ខែ ឆ្នាំនេះ។
បើយើងមើលពីគម្រោងវិនិយោគឃើញថា កើនចំនួន ២៨គម្រោង ក៏ប៉ុន្តែ ទុនវិនិយោគមានការថយចុះប្រមាណ ១.៣០០លានដុល្លារអាមេរិក បើធៀបនឹងរយៈពេលដូចគ្នាកាលពីឆ្នាំ ២០១៧។
អត្ថបទទាក់ទង!
ជុំវិញទៅនឹងតម្លៃទុនវិនិយោគថមថយចុះនេះដែរ ត្រូវបានមន្ត្រីនៃក្រុមប្រឹក្សាអភិវឌ្ឍន៍កម្ពុជា ប្រាប់សារព័ត៌មានខេមបូណូមីស ឲ្យដឹងថា ការវិនិយោគនៅក្នុងឆ្នាំនេះ ហាក់បីដូចជា មានភាពពុះកញ្ជ្រោលជាងឆ្នាំមុនៗ បើទោះបីជា ទុនវិនិយោគថមថយចុះក៏ដោយ ប៉ុន្តែបើមើលទៅលើគម្រោងវិនិយោគវិញមានការកើន ២៨គម្រោងឯណោះ។
យ៉ាងណាក៏ដោយ ការថមថយនេះ ដោយសារតែក្នុងរយៈពេល ៩ខែឆ្នាំនេះ មានគម្រោងវិនិយោគតូចៗ និង ទឹកប្រាក់វិនិយោគតិចជាងឆ្នាំមុន។
ដោយឡែក សម្រាប់តែនៅក្នុងខែ កញ្ញា ឆ្នាំ ២០១៨នេះ ក្រុមប្រឹក្សាអភិវឌ្ឍន៍កម្ពុជា បានសម្រេចអនុញ្ញាតឲ្យក្រុមហ៊ុនធ្វើការវិនិយោគលើគម្រោងថ្មីចំនួន ២៩គម្រោង ដែលមានទុនវិនិយោគជាង ៤៣០ លានដុល្លារអាមេរិក និងអាចបង្កើតការងារជាង ៣ម៉ឺនកន្លែង។
ក្នុងនោះដែរ គម្រោងដែលមានសកម្មភាពវិនិយោគក្រៅតំបន់សេដ្ឋកិច្ចពិសេស រាប់បញ្ចូលទាំង គម្រោងថ្មី និងគម្រោងពង្រីកផលិតកម្ម សរុបមាន ១៨គម្រោង និងទុនវិនិយោគជាង ៣៨០លានដុល្លារអាមេរិក។ រីឯ គម្រោងវិនិយោគក្នុងតំបន់សេដ្ឋកិច្ចពិសេស ដែលជាគម្រោងថ្មី មាន ១១គម្រោង សរុបទុនវិនិយោគជិត ៥០លានដុល្លារអាមេរិក។
អ្វីដែលគួរឲ្យកត់សម្គាល់គឺ គម្រោងថ្មីទាំង ២៩គម្រោង ដែលត្រូវបានអនុញ្ញាតក្នុងខែកញ្ញានេះ គឺស្ថិតនៅក្នុងវិស័យឧស្សាហកម្ម និងកម្មន្តសាលទាំងអស់ ពោលគឺ ពុំមានគម្រោងវិនិយោគក្នុង វិស័យផ្សេងៗឡើយដូចជា វិស័យកសិកម្ម កសិ-ឧស្សាហកម្ម ទេសចរណ៍ និង ហេដ្ឋារចនាសម្ព័ន្ធ ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
