ការប្រកាសចេញពីរាជវាំង Buckingham នៃចក្រភពអង់គ្លេសបានបញ្ជាក់ថា ព្រះមហាក្សត្រីអេលីហ្សាបែត បានធ្វើតេស្តវិជ្ជមានចំពោះកូវីដ-១៩ ដែលបង្កឲ្យមានការភ្ញាក់ផ្អើលយ៉ាងខ្លាំងដល់ពលរដ្ឋអង់គ្លេស។ យ៉ាងណាមិញ ពេលនេះរោគសញ្ញារបស់ព្រះមហាក្សត្រីអាលីហ្សាបែត គឺមានកម្រិតស្រាលដូចជាជម្ងឺផ្ដាសាយ ហើយគេរំពឹងថា អាការៈរបស់ព្រះអង្គនឹងប្រសើរឡើង ក្នុងសប្តាហ៍ខាងមុខនេះ។ ព្រះមហាក្សត្រីអាលីហ្សាបែតកំពុងសម្រាកព្យាបាល និងទទួលបានការយកចិត្តទុកដាក់យ៉ាងខ្លាំងពីអ្នកជំនាញផ្នែកវេជ្ជសាស្ត្រ។
ព្រះមហាក្សត្រីអាលីហ្សាបែត គឺបានតេស្ដវិជ្ជមាននៅក្រោយ ព្រះរាជបុត្រាច្បង និងជារាជទាយាទ គឺព្រះអង្គម្ចាស់ ឆាលី បានតេស្ដឃើញវិជ្ជមានកូវីដ១៩ កាលពីថ្ងៃទី ១០ ខែកុម្ភៈ បន្ទាប់ពីបានជួបជាមួយនឹងព្រះមហាក្សត្រីអាលីហ្សាបែតកាលពីថ្ងៃទី ៨ ខែកុម្ភៈ។
សូមបញ្ជាក់ថា ព្រះមហាក្សត្រី អាលីហ្សាបែត ដែលមានព្រះជន្ម ៩៦ ឆ្នាំ បានចាក់វ៉ាក់សាំងលើកដំបូងក្នុងខែមករា ឆ្នាំ ២០២១ ហើយត្រូវបានគេជឿថាម្ចាស់ក្សត្រីបានចាក់វ៉ាក់សាំងជាបន្តបន្ទាប់ទៀតផងដែរ។
អត្ថបទគួរអាន
នៅចំថ្ងៃជាមួយគ្នានេះដែរ កំពូលតារាចម្រៀង ចាស្ទីនប៊ីប៊័រ ក៏ត្រូវបានរាយការណ៍ថា បានឆ្លងកូវីដ១៩កម្រិតស្រាលដែរ។ យ៉ាងណាមិញ ក្រោយរកឃើញថា កំពូលតារាចម្រៀងរូបនេះបានឆ្លងជំងឺករណីកូវីដ១៩ ភ្លាមៗនោះការប្រគុំតន្ត្រីរបស់លោកដែលនឹងត្រូវធ្វើឡើងនូវថ្ងៃអាទិត្យនោះ ក៏បានត្រូវបានពន្យារពេលដល់ថ្ងៃទី ២៨ ខែមិថុនាវិញ។
សូមបញ្ជាក់ថា តាំងពីមានផ្ទុះរាលដាលកូវីដ១៩មក មានបុគ្គលល្បីៗ និងឥស្សរជនជាន់ខ្ពស់ជាច្រើនសុទ្ធតែបានឆ្លងកូវីដ១៩ រួមទាំងអតីតប្រធានធិបតីអាមេរិកលោកដូណាល់ត្រាំ និងប្រធានាធីបតីបារាំងក៏ធ្លាប់បានឆ្លងមេរោគរាតត្បាតសកលនេះផងដែរ។
គួរជម្រាបថា ចាប់តាំងពីលេចឡើងនូវមេរោគ បំប្លែងអូមីក្រុងមក គេមើលឃើញថា បើទោះបីជាវាមិនបង្កឱ្យមានករណីធ្ងន់ធ្ងរក៏មិនមែន តែករណីឆ្លងប្រចាំថ្ងៃនៅតែបន្ដមានការកើនឡើងគួរឱ្យកត់សម្គាល់។ ជាក់ស្ដែង គិតមកត្រឹមពេលនេះ ករណីឆ្លងសរុបនៅទូទាំងពិភពលោកកើនឡើងដល់ ៤២៤លានករណី និងស្លាប់សរុបជិត ៦លាននាក់ហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
