របាយការណ៍ព័ត៌មានបានផ្សាយថា រុស្ស៊ីហាក់កំពុងផ្ដោតការវាយប្រហារទៅលើហេដ្ឋារចនាសម្ព័ន្ធយោធារបស់អ៊ុយក្រែន ដោយមានសេចក្ដីរាយការណ៍ពីការផ្ទុះគ្រាប់នៅតាមព្រលានយន្តហោះ ទីបញ្ជាការយោធា និងឃ្លាំងយោធានៅក្នុងប្រទេសអ៊ុយក្រែន ។
នៅវេលាម៉ោងប្រហែល ៥ព្រឹក (ម៉ោងនៅអ៊ុយក្រែន) ក្នុងពេលតែប៉ុន្មាននាទីប៉ុណ្ណោះបន្ទាប់ពីលោក ពូទីន ថ្លែងសុន្ទរកថាខ្លីមួយដែលផ្សាយតាមទូរទស្សន៍រុស្ស៊ី គេបានឮសំឡេងផ្ទុះគ្រាប់នៅក្បែរទីក្រុងសំខាន់ៗរបស់អ៊ុយក្រែន រួមទាំងទីក្រុង គីវ ផងដែរ ។
ក្រសួងមហាផ្ទៃអ៊ុយក្រែន បានរាយការណ៍ថា ប្រទេសរបស់លោកកំពុងរងការវាយប្រហារដោយមីស៊ីលបាលីស្ទិកនិងមីស៊ីលប្រដេញ ដោយមើលទៅ យោធារុស្ស៊ីហាក់ផ្ដោតការវាយប្រហារទៅលើហេដ្ឋារចនាសម្ព័ន្ធក្បែរក្រុងសំខាន់ៗ រួមមាន ក្រុង គីវ, Kharkiv, Mariupol និង Dnipro ។
សង្គ្រាមរុស្ស៊ី-អ៊ុយក្រែន៖ អត្ថបទទាក់ទង
ស្របពេលជាមួយគ្នានេះដែរ សារព័ត៌មានអង់គ្លេស ប៊ីប៊ីស៊ី បានដកស្រង់ប្រសាសន៍របស់ប្រធានាធិបតីអ៊ុយក្រែន ដែលនិយាយថា អ៊ុយក្រែននឹងប្រយុទ្ធដើម្បីការពារខ្លួនដោយខ្លួនឯង ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡិនស្គី បានព្រមានថា រុស្ស៊ីអាចនឹងបញ្ឆេះសង្គ្រាមដ៏ធំមួយនៅអឺរ៉ុប និងបានអំពាវនាវដល់ប្រជាជនរុស្ស៊ីឱ្យប្រឆាំងជំទាស់នឹងសង្គ្រាមនេះ ។ លោកបាននិយាយថា រុស្ស៊ីមានទាហានជិត ២សែននាក់ និងយានចម្បាំងរាប់ពាន់គ្រឿងនៅលើព្រំដែនរបស់អ៊ុយក្រែន ។
ថ្លែងជាភាសារុស្ស៊ី លោក ហ្សេឡិនស្គី បានអំពាវនាវដល់ពលរដ្ឋរុស្ស៊ីឱ្យជំទាស់នឹងសង្គ្រាម ដោយនិយាយថា ប្រជាជនរុស្ស៊ីកំពុងត្រូវបានគេកុហកអំពីបញ្ហានៅអ៊ុយក្រែន ។ លោកនិយាយថា «តើអ្នកណាអាចបញ្ឈប់សង្គ្រាមនេះបាន ? គឺប្រជាជន ។ ប្រជាជនគឺស្ថិតក្នុងចំណោមអ្នកទាំងអស់គ្នានេះហើយ» ។
គួរបញ្ជាក់ថា សេចក្ដីរាយការណ៍ព័ត៌មានបានផ្សាយថា លោកប្រធានាធិបតីអ៊ុយក្រែនបានខិតខំស្វះស្វែងជួយចរចាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ប៉ុន្តែ ការខិតខំនេះត្រូវបរាជ័យដោយសារតែគ្មានការឆ្លើយតបពីលោក ពូទីន ៕
