តើអ្នកបានអានអត្ថបទនេះ ឬនៅ?
កំណើននៃការដឹកជញ្ជូនទំនិញឆ្លងកាត់នេះ បានជំរុញឲ្យប្រាក់ចំណូលរបស់កំពង់ផែស្វយ័តក្រុងព្រះសីហនុមួយនេះ មានទឹកប្រាក់ជាង ៥២លានដុល្លារអាមេរិក ធៀបនឹងឆ្នាំ២០១៦ ដែលមានត្រឹមតែជាង ៤៣លានដុល្លារអាមេរិកតែប៉ុណ្ណោះ។ នេះបើយោងតាមរបាយការណ៍ប្រចាំឆ្នាំ២០១៧ របស់ក្រសួងសាធារណការនិងដឹកជញ្ជូន។
បើនិយាយពីកុងតឺន័រឆ្លងកាត់កំពង់ផែនេះ មានចំនួនប្រមាណ ៤៥ម៉ឺន TEUs មានកំណើនប្រមាណ១៤% និងមានទំនិញឆ្លងកាត់សរុបប្រមាណជាង ៤លាន ៣សែនតោនក្នុងឆ្នាំ២០១៧។
ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានលើកឡើងក្នុងសន្និបាតបូកសរុបលទ្ធផលការងារឆ្នាំ២០១៧ និងទិសដៅការងារឆ្នាំ២០១៨ កាលពីពេលថ្មីៗនេះ ថា ទិសដៅឆ្នាំ២០១៨ សម្រាប់កំពង់ផែស្វយ័តក្រុងព្រះសីហនុ គឺបន្តជំរុញនិងកៀរគរវិនិយោគិនឲ្យមកវិនិយោគតំបន់សេដ្ឋកិច្ចពិសេសក្រុងព្រះសីហនុ និងបន្តសាងសង់ចំណតកំពង់ផែកុងតឺន័រ ប្រវែង ៣៥០ម៉ែត្រ និង ជម្រៅ ១៤ម៉ែត្រ និងបំពាក់គ្រឿងចក្រលើកដាក់កុងតឺន័របន្ថែមទៀត។
បើតាមរបាយការណ៍កំពង់ផែស្វយ័តក្រុងព្រះសីហនុ នាពេលកន្លងមក បានអះអាងថា ទាំងប្រាក់ចំណូល និងកុងតឺន័រឆ្លងកាត់កំពង់ផែ មានកំណើនចន្លោះពី ១០ ទៅដល់ជាង ១៥% នៅក្នុង រយៈពេល៥ឆ្នាំចុងក្រោយនេះ។
កាលពីពាក់កណ្តាលឆ្នាំ២០១៧ កំពង់ផែស្វយ័តក្រុងព្រះសីហនុបានចុះបញ្ជីក្នុងផ្សារមូលប័ត្រកម្ពុជា ខណៈដែលទឹកប្រាក់ដែលបានទទួលពីការលក់មូលប័ត្រដែលមានប្រមាណជិត ៣០លានដុល្លារ ត្រូវថ្នាក់ដឹកនាំជាន់ខ្ពស់កំពង់ផែនេះ នឹងយកទៅអភិវឌ្ឍកំពងផែនេះបន្ត ដើម្បីជំរុញផលិតភាព តម្លៃប្រកួតប្រជែងដល់អ្នកប្រើបាស់ ឲ្យស្របតាមបទដ្ឋានអន្តរជាតិ ដែលអាចប្រកួតប្រជែងជាមួយប្រទេសក្នុងតំបន់បាន៕
