ការក្ស័យធនរបស់ហាងលក់រាយ Sears នេះ ក៏បានធ្វើឲ្យមានការភ្ញាក់ផ្អើល និងមន្ទិលសង្ស័យពីអនាគតអាជីវកម្មលក់រាយវ័យចំណាស់ៗរបស់អាមេរិកផងដែរ ខណៈដែលបច្ចុប្បន្នការទិញលក់ទំនិញតាមប្រព័ន្ធអ៊ីនធើណែត កំពុងមានការពេញនិយមកាន់តែខ្លាំង។
បើតាមសំណុំឯកសារដែលក្រុមហ៊ុននេះ បានដាក់ស្នើដើម្បីប្រកាសក្ស័យធន បានបង្ហាញឲ្យដឹងថា ក្នុងផែនការ មានហាងលក់ទំនិញ យីហោ Sears រហូតដល់ចំនួន ១៤២ ហាងបន្ថែមទៀត នឹងត្រូវបិទទ្វារនាពេលខាងមុខដ៏ខ្លីនេះ ខណៈចំណូលក្រុមហ៊ុននេះ បានធ្លាក់ចុះអស់រយៈពេល ១ទសវត្សរ៍មកហើយ និងមានសាខារាប់រយហាងរួចទៅហើយ ត្រូវបានបិទទ្វារនាពេលកន្លងមក។
អត្ថបទទាក់ទង!
ក្រុមហ៊ុនលក់រាយដ៏ធំរបស់អាមេរិក Sears Holdings នេះ ត្រូវបានគេដឹងថា មានទ្រព្យសកម្ម ដែលបានចុះបញ្ជីសរុបប្រមាណ ៦,៩ពាន់លានដុល្លារអាមេរិក និងបំណុលវិញ មានរហូតដល់ ជាង ១១,៣ ពាន់លានដុល្លារអាមេរិក ពោលគឺបំណុលមានច្រើនជាងទ្រព្យសកម្មរហូតដល់ ជាង ៤ពាន់លានដុល្លារអាមេរិកទៅហើយ។
ការដួលរលំរបស់ក្រុមហ៊ុន Sears Holdingនេះ មិនត្រឹមតែធ្វើឲ្យប៉ះពាល់ដល់ទីផ្សារលក់រាយរបស់អាមេរិកនោះទេ ប៉ុន្ដែ ក៏បានជះឥទ្ធិពលនៅបណ្ដាប្រទេសមួយចំនួន ដែលស្ថិតក្រោមការវិនិយោគដោយក្រុមហ៊ុននេះផងដែរ។
ជាក់ស្ដែង នៅប្រទេសវៀតណាម ក្រុមហ៊ុន Sears បានវិនិយោគរួមគ្នាជាមួយនឹង ក្រុមហ៊ុន Roebuck និង ក្រុមហ៊ុនKmart នៅប្រទេសវៀតណាម ហើយក្រុមហ៊ុនទាំងបីនេះ បានក្លាយជាក្រុមហ៊ុនមេ របស់ក្រុមហ៊ុនវាយនភ័ណ្ឌវៀតណាម Thanh Cong ព្រមទាំងបាន រួមចំណែក ៧% នៃប្រាក់ចំណូល របស់ក្រុមហ៊ុន វាយនភ័ណ្ឌនេះជារៀងរាល់ឆ្នាំ។
បើតាម សារព័ត៌មានវៀតណាម Express បានឲ្យដឹងថា យ៉ាងហោចណាស់ ក្រុមហ៊ុន Sears របស់អាមេរិកនេះ នៅជំពាក់បំណុលក្រុមហ៊ុនវាយនភ័ណ្ឌវៀតណាម Thanh Cong ប្រមាណ ៤លានដុល្លារអាមេរិកទៀត ក្រោយពីការប្រកាសក្ស័យធននេះ។
បើតាមការប្រកាសរបស់ក្រុមហ៊ុន Sears គេគ្រោងនឹងលក់ទ្រព្យសកម្មរបស់ខ្លួន និងចាប់ផ្ដើមបិទហាងហាងដែលមិនផ្ដល់ប្រាក់ចំណេញ ប្រមាណ ១៤២ ហាង នៅចុងឆ្នាំនេះ ហើយក្រុមហ៊ុននេះ ក៏មានបំណងធ្វើការរៀបចំឡើងវិញ នូវហាងលក់រាយតូចៗរបស់ខ្លួន ដែលមានប្រមាណ ៧០០ ហាង ដែលជាហាងល្អបំផុតរបស់ក្រុមហ៊ុននេះផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
