ប៉ុន្មានឆ្នាំចុងក្រោយនេះ ខេត្តព្រះសីហនុប្រែប្រួលអ្វីខ្លះ?
បកទៅមើលពីអតីតកាលបន្តិច គេនៅចាំបានថា កាលពី ៣ទៅ៤ ឆ្នាំមុន ប្រមុខរាជរដ្ឋាភិបាលកម្ពុជា ធ្លាប់បានប្រកាសចាត់ទុកថា ខេត្តព្រះសីហនុគឺជាក្បាលនាគសេដ្ឋកិច្ចដ៏សំខាន់របស់កម្ពុជា ហើយរាជរដ្ឋាភិបាលក៏មានគោលដៅ នឹងកែប្រែខេត្តព្រះសីហនុ ឲ្យដូចទៅនឹងទីក្រុងស៊ិនជិនប្រទេសចិនផងដែរ។ ប៉ុន្ដែ ប៉ុន្មានឆ្នាំក្រោយមក ការអភិវឌ្ឍខេត្តព្រះសីហនុ ត្រូវបានគេមើលឃើញថា ហាក់ដើរទៅរករូបភាពខុសពីការរំពឹងទុក ពោលគឺអគារកាស៊ីណូបានកើតឡើងរីកដូចផ្សិត រហូតត្រូវបានសារព័ត៌មានបរទេសធំៗមួយចំនួនដូចជា Reuters និង Straitstimes ជាដើមបានផ្សាយថា ខេត្តព្រះសីហនុ នឹងក្លាយជាទីក្រុងម៉ាកាវទី២។
តួយ៉ាង គិតត្រឹមខែកក្កដាឆ្នាំ២០១៩ កន្លងទៅនេះ ចំនួនកាស៊ីណូនៅក្នុងខេត្តព្រះសីហនុ បានកើនឡើងដល់ទៅ ៦២ កន្លែង ក្នុងនោះ កាន់កាប់ដោយជនជាតិចិន មានចំនួន ៧៧%។ នេះបើតាមទិន្នន័យពីស្នងការខេត្តព្រះសីហនុ ដែលត្រូវបានផ្សព្វផ្សាយបន្តដោយសារព័ត៌មានក្នុងស្រុក។
អត្ថបទទាក់ទង!
យ៉ាងណាក៏ដោយចុះ មកទល់បច្ចុប្បន្ននេះ ក្រុងព្រះសីហនុ ហាក់វិលមកស្ងប់ស្ងាត់វិញ ក្រោយពេលដែលរាជរដ្ឋាភិបាលបានប្រកាសបិទល្បែងភ្នាល់តាមអនឡាញ។ ប៉ុន្ដែ ការចាកចេញរបស់ជនជាតិចិន ក្រោយពីការប្រកាសនេះ វាក៏បានបន្សល់ទុកនូវបញ្ហាទីផ្សារលក់ និងជួលអចលនទ្រព្យក្នុងខេត្តនេះ ដែលធ្លាប់តែឡើងប៉ោងខ្លាំង បែរមកដាំក្បាលស្រុតចុះមកវិញយ៉ាងខ្លាំងផងដែរ។ ក៏ប៉ុន្ដែ អ្នកជំនាញអចលនទ្រព្យលោក ច្រឹក សុខនីម ប្រធានសមាគមភ្នាក់ងារវាយតម្លៃអចលនវត្ថុកម្ពុជា បានបញ្ជាក់ថា តម្លៃអចលនទ្រព្យនៅខេត្តព្រះសីហនុ បច្ចុប្បន្ននេះ ដ្បិតតែថយចុះ មកនូវទ្រឹងក្ដី ប៉ុន្ដែ វាក៏នៅតែជាតម្លៃមួយខ្ពស់ដដែល បើធៀបនឹងតម្លៃដែលមិនទាន់មានការវិនិយោគផុសផុលខ្លាំងកាលពីមុន។
ឯកឧត្តម វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានទទួលស្គាល់ថា វិស័យសំណង់ និងអចលនទ្រព្យនៅខេត្តព្រះសីហនុ ពិតជាមានផលប៉ះពាល់មួយចំនួន ក្រោយពីមានការបិទល្បែងភ្នាល់តាមអនឡាញមែន។ ប៉ុន្ដែ លោកថា ជាជំហានដំបូង វាប៉ះពាល់មែន តែលោកជឿជាក់ថា ក្រោយពីរាជរដ្ឋាភិបាលបានដាក់វិធានការសមស្របជាបន្តបន្ទាប់ នោះខេត្តព្រះសីហនុនឹងវិលទៅរកការអភិវឌ្ឍប្រសើរឡើងវិញ ខណៈដែលបច្ចុប្បន្ននេះ រាជរដ្ឋាភិបាលបាននិងកំពុងរៀបចំប្លង់មេអភិវឌ្ឍន៍ទីក្រុងព្រះសីហនុនេះ ឲ្យមានលក្ខណៈដូចទៅនឹងទីក្រុងស៊ិនជិនប្រទេសចិនដែរ។
ឯកឧត្តម វង្សី វិស្សុត បានមានប្រសាសន៍ថា «វិធានការទី១ គឺការសង់ហេដ្ឋារចនាសម្ព័ន្ធដ៏ច្រើនលើសលុបរបស់រាជរដ្ឋាភិបាលនៅក្នុងទីក្រុងនេះ ក្លាយជាការទាក់ទាញមួយ ប៉ុន្ដែលើសពីហ្នឹងទៀត យើងកំពុងរៀបចំគេហៅថា Master Plan សម្រាប់អភិវឌ្ឍខេត្តកំពង់សោមឲ្យទៅជាខេត្តតំបន់សេដ្ឋកិច្ចពិសេស មានលក្ខណៈដូចទៅនឹងទីក្រុងស៊ិនជិនអញ្ចឹង។ បើយើងចង់ឲ្យកំពង់សោមដូចស៊ិនជិន មិនមែនកាស៊ីណូទេ វាត្រូវជាទីក្រុងឧស្សាហកម្ម វាជាទីក្រុងសេវាកម្មផ្នែកបច្ចេកវិទ្យា បច្ចេកទេស និងទេសចរណ៍។»
ខេត្តព្រះសីហនុ នឹងក្លាយជាច្រមុះសេដ្ឋកិច្ចថ្មីមួយរបស់កម្ពុជា
បើតាមការអះអាងរបស់ ឯកឧត្តម វង្សី វិស្សុត ប្លង់មេអភិវឌ្ឍន៍ក្រុងព្រះសីហនុនេះ មិនមែនចេះតែរៀបចំឲ្យតែបាននោះទេ ពោលគឺរាជរដ្ឋាភិបាលបានជួលអ្នកជំនាញខាងគូរប្លង់មេពីទីក្រុងស៊ិនជិន ប្រទេសចិន មកដោយផ្ទាល់ដើម្បីរៀបចំការងារនេះ។ ដូច្នេះ នៅពេលអនាគតខាងមុខ ខេត្តព្រះសីហនុនេះ នឹងក្លាយជាច្រមុះសេដ្ឋកិច្ចដ៏សំខាន់របស់កម្ពុជា ដើម្បីអាចនាំចេញទំនិញផ្ទាល់ទៅកាន់ទីផ្សារបរទេស លែងពឹងតែលើច្រកប្រទេសវៀតណាម ឬថៃ ទៀតហើយ។
ឯកឧត្តម វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្
(រូបភាព៖ ហេង ភារម្យ)
«យើងជួលអ្នកដែលរៀបចំ (ផែនការមេ) Master Plan ស៊ិនជិនតែម្ដងមកធ្វើនៅនេះ យើងមិនដូចស៊ិនជិនទេ ប៉ុន្ដែ លំអាន លំនាំការគិតគូរ (ដូចទៅនឹងទីក្រុងស៊ិនជិន) ។ Master Plan គឺការរៀបចំតំបន់ជាសេដ្ឋកិច្ចពិសេស គឺពហុបំណង ទៅជាប៉ូលសេដ្ឋកិច្ចមួយដ៏ខ្លាំង ជាប៉ូលសេដ្ឋកិច្ចមួយ ដែលបម្រើឲ្យមូលដ្ឋានផលិតកម្មសម្រេចរបស់ជាតិកម្ពុជាយើង ក្នុងការនាំចេញ ក្នុងការគ្រប់គ្រងសេដ្ឋកិច្ចទាំងមូល។ »
ឯកឧត្តម បន្ថែមទៀតថា «យើងថាយើងមានច្រកបីធំ ទៅតាមប៉ោយប៉ែត អាហ្នឹងយើងភ្ជាប់ខ្លួនទៅបណ្ដាញផលិតកម្ម តាមប្រើច្រមុះដង្ហើមថៃ។ ទៅវៀតណាម ប្រើច្រមុះវៀតណាម ប៉ុន្ដែកំពង់សោមច្រមុះខ្លួនឯង។ ... ដូច្នេះ Master Plan ហ្នឹងជា (គ្រោងការ) BluePrint មួយសំខាន់ណាស់ សម្រាប់ Define កំណត់ (ទិសដៅ) Direction កំណត់ការអភិវឌ្ឍរបស់កំពង់សោមក្នុងរយៈ១០ ទៅ២០ឆ្នាំទៀត។»
បើតាមការអះអាងរបស់ ឯកឧត្តម វង្សី វិស្សុត លោកជឿជាក់ថា នឹងមានការផ្ទេរឧស្សាហកម្មផលិតពីក្រៅប្រទេសមកកាន់ខេត្តព្រះសីហនុ នៅពេលដែលប្លង់មេបានរៀបចំរួច និងប្រព័ន្ធហេដ្ឋារចនាសម្ព័ន្ធនានា ដូចជាផ្លូវ ទឹកភ្លើង កំពង់ផែជាដើមត្រូវបានស្ថាបនារួចរាល់។
សូមជម្រាបថា កាលពីពេលថ្មីៗនេះ រាជរដ្ឋាភិបាលកម្ពុជា ក៏ទើបតែបានបើកការដ្ឋានសាងសង់ផ្លូវចំនួន ៣៤ ខ្សែ នៅក្នុងខេត្តព្រះសីហនុ ដែលសុទ្ធសឹងជាផ្លូវដែលមានគុណភាពខ្ពស់បំផុត នៅកម្ពុជា ដោយគម្រោងនេះ រដ្ឋបានចំណាយថវិកាអស់ប្រមាណ ២០០ លានដុល្លារអាមេរិក។ ផ្លូវ ទាំង ៣៤ខ្សែនេះ ត្រូវបានរដ្ឋាភិបាលចាត់ទុកថា គឺជាការរួមចំណែកដ៏សំខាន់ក្នុងការធ្វើឲ្យសម្រេចបាននូវចក្ខុវិស័យឆ្នាំ២០៣០ របស់រដ្ឋាភិបាលក្នុងការអភិវឌ្ឍខេត្តព្រះសីហនុ។
ក្រៅពីនេះ ក៏នៅមានគម្រោងផ្លូវល្បឿនលឿនលើកដំបូងរបស់កម្ពុជា តភ្ជាប់ពីរាជធានីភ្នំពេញ ទៅកាន់ខេត្តព្រះសីហនុ ដែលបច្ចុប្បន្ននេះ កំពុងដំណើរការសាងសង់ និងគ្រោងបញ្ចប់នៅមុនខែកញ្ញាឆ្នាំ២០២២ខាងមុខ។ ហេដ្ឋារចនាសម្ព័ន្ធទាំងនេះ ក៏ត្រូវបានគេមើលឃើញថា នឹងក្លាយជាការបន្ថែមនូវភាពទាក់ទាញ និងប្រឡាក់ក្រឡាកាន់តែខ្លាំងថែមទៀត សម្រាប់បម្រើដល់ការវិនិយោគ សេដ្ឋកិច្ច ពាណិជ្ជកម្មរបស់កម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
