សាលាតន្ត្រីស៊ីមហ្វូនី ប្រគំតន្ត្រីប្រចាំឆ្នាំ ឲ្យសិស្សបញ្ចេញសមត្ថភាព និងបង្កើនភាពក្លាហាន

លោកស្រី ហ៊ុន ជាឡេង អគ្គនាយិកាសាលាតូរ្យតន្រ្តី និង សិល្បៈ ស៊ីមហ្វូនី (Simphony School of Music & Art) បានថ្លែងក្នុងពិធីប្រគំតន្រ្តីនេះថា សាលាតូរ្យតន្ដ្រី និងសិល្បៈ ស៊ីមហ្វូនី តែងតែធ្វើកម្មវិធីប្រគំតន្ដ្រីប្រចាំឆ្នាំ ដើម្បីជំរុញឲ្យសិស្សបានបញ្ចេញសមត្ថភាពរបស់ពួកគេ ដែលបានខិតខំសិក្សានៅពេលកន្លងមក និងដើម្បីផ្តល់ឱកាសឲ្យឪពុកម្តាយ និងអាណាព្យាបាលសិស្ស បានឃើញ និងស្តាប់ពីស្នាដៃ និងភាពក្លាហានរបស់កូន ឬចៅៗរបស់ពួកគាត់ ដែលបានឡើងលើឆាកដ៏ទំនើបរបស់សាលា។ 

លោកស្រី ហ៊ុន ជាឡេង ថ្លែងយ៉ាងដូច្នេះថា៖ «ការប្រគុំតន្រ្តីនេះ មានអត្ថប្រយោជន៍ជាច្រើន ដោយធ្វើឲ្យសិស្សបានបញ្ចេញសមត្ថភាពដែលគាត់បានរៀនជាច្រើនឆ្នាំ ជូនដល់អាណាព្យាបាលរបស់ពួកគេ និងធ្វើឲ្យសិស្សខិតខំប្រឹងប្រែង និងយកចិត្តទុកដាក់ក្នុងពេលរៀនសូត្រ និងប្រើពេលវេលាហាត់សម ដើម្បីយកមកសម្ដែងនៅពេលមានកម្មវិធីប្រគំតន្រ្តី»។   

បើតាមអគ្គនាយិកាខាងលើ ការប្រគំតន្រ្តីលើកនេះ ក៏ជាជំនួយបន្ថែមដល់សិស្ស ដែលធ្វើឲ្យសិស្សបានដឹងពីចំណុចខ្លាំង ចំណុចខ្សោយ និងភាពខ្វះខាតរបស់ខ្លួន ដើម្បីមានការប្រុងប្រយ័ត្ន និងកែតម្រូវនៅថ្ងៃក្រោយ សម្រាប់អភិវឌ្ឍន៍សមត្ថភាពឲ្យកាន់តែពូកែថែមទៀត ព្រមទាំងធ្វើឲ្យសិស្សបានបន្ធូរអារម្មណ៍តាមរយៈសកម្មភាពសម្តែងលើឆាកផងដែរ។

កុមារី ហ៊ុន ពេជ្រមុន្នីវល្ល័ក កូនសិស្សនៅសាលាតន្ដ្រី និងសិល្បៈ ស៊ីមហ្វូនី ដែលធ្លាប់ទទួលបានពានមាសពីកម្មវិធី Asia Pacific Arts Festival នៅសៀមរាប និងសិង្ហបុរីនាពេលកន្លងមក បានថ្លែងរៀបរាប់ទាំងរីករាយ ថា៖ «ខ្ញុំចូលចិត្តព្យ៉ាណូតាំងពីតូច ហើយខ្ញុំបានលេងភ្លេងតាំងពីអាយុ៥ឆ្នាំ។ ហើយនៅពេលខ្ញុំបានលេង​ព្យ៉ាណូ ខ្ញុំមានអារម្មណ៍សប្បាយចិត្ត  និងធូរស្រាល។ នៅពេលខ្ញុំទទួលបានពានមាសហ្នឹង មានន័យថា ខ្ញុំត្រូវតែខិតខំខ្លាំងថែមទៀត»។    

សូមបញ្ជាក់ថា សាលា Simphony បានបង្កើតឡើងតាំងពីឆ្នាំ២០១០មកម៉្លេះ ដើម្បីធ្វើជាថ្នាលបណ្ដុះ សិល្បករ និងតន្ត្រីករវ័យក្មេងៗនៅកម្ពុជា ដោយមានសាស្ដ្រាចារ្យសុទ្ធសឹងមានបទពិសោធន៍ ក្នុងការ បង្រៀនរយៈពេល៥ឡើងទៅ ដែលមានមកពីប្រទេសជប៉ុន ឥណ្ឌូនេស៊ី អាមេរិក តៃវ៉ាន់ ហ្វីលីពីន អង់គ្លេស ស្លូវ៉ាគី និងបារាំង។ សាលាតន្ត្រី Simphony ទីតាំងទីមួយស្ថិតនៅផ្ទះលេខ ២៤៣ ផ្លូវ ៥១ (Pasteur) សង្កាត់បឹងកេងកង១ ខណ្ឌចំការមន រាជធានីភ្នំពេញ និងទីតាំងទី២ ស្ថិតនៅជាន់​ទី២ក្នុងផ្សារទំនើបអ៊ីអនសាខាខណ្ឌសែនសុខ។ ទំនងទំនងទូរស័ព្ទលេខ៖ ០១២ ៩០០ ៥៨៣,០២៣ ៧២៧ ៣៤៥៕