យ៉ាងណាមិញ កាលពីថ្ងៃទី ២០ ខែមេសានេះ ធនាគារជាតិ បានចេញសេចក្ដីអំពាវនាវថ្មីមួយទៀត ដោយបានស្នើដល់ខាងគ្រឹះស្ថានធនាគារ និងមីក្រូហិរញ្ញវត្ថុ ឲ្យមានការយោគយល់ និងផ្តល់ការអនុគ្រោះបន្ថែមដល់អតិថិនជន ដែលជាកូនបំណុលរបស់ខ្លួន នៅអំឡុងពេលវិបត្តិកូវីដ-១៩នេះ។ ក្នុងនោះ ធនាគារជាតិ បានស្នើដល់គ្រឹះស្ថានធនាគារ និងមីក្រូហិរញ្ញវត្ថុ បន្ធូរបន្ថយកម្រៃសេវាផ្សេងៗពាក់ព័ន្ធនឹងឥណទាន និងលើកលែងការផាកពិន័យចំពោះអតិថិជនរហូតដល់ដាច់ឆ្នាំ២០២០។
លោក ចាន់ មង្គល អ្នកយកសារព័ត៌មាន របស់ខេមបូណូមីស បានជួបជាមួយ លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា ដើម្បីពិភាក្សាជុំវិញប្រធានបទ «តើគ្រឹះស្ថានមីក្រូហិរញ្ញវត្ថុបាននិងកំពុងអនុវត្តជួយសម្រួលបន្ទុកកូនបំណុលរបស់ខ្លួនបានកម្រិតណា នៅអំឡុងពេលមានបញ្ហាកូវីដ-១៩នេះ?»
លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា
(ខេមបូណូមីស)
លោក ចាន់ មង្គល ៖ តើខាងសមាគមយល់ឃើញយ៉ាងដូចម្ដេចដែរ ចំពោះសេច្ដីស្នើសុំថ្មី ពីសំណាក់ធនាគារជាតិនេះ? ហើយមើលគ្រឹះស្ថានមីក្រូហិរញ្ញវត្ថុដែលជាសមាជិករបស់សមាគម អាចនឹងអនុវត្តបានក្នុងកម្រិតណាដែរ?
លោក កាំង តុងងី ៖ សមាគមមីក្រូហិរញ្ញវត្ថុកម្ពុជា សូមស្វាគមន៍ចំពោះសេចក្តីអំពាវនាវនេះ ដោយសារកន្លងមកសមាជិករបស់យើង ដែលរួមមានគ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យាហិរញ្ញវត្ថុ (បង់រំលោះ) និងគ្រឹះស្ថានឥណទានជនបទ បាននិងកំពុងចូលរួមជួយអតិថិជនរបស់គាត់ ដើម្បីឆ្លងកាត់គ្រាដ៏លំបាកនេះ។ តាមរបាយការណ៍ដែលសមាគមទទួលបាន សមាជិករបស់យើងសុទ្ធតែបានចូលរួមយ៉ាងសកម្មក្នុងការបន្ធូរបន្ថយ និងរៀបចំឥណទានឡើងវិញជូនដល់អតិថិជន ដែលរងផលប៉ះពាល់ធ្ងន់ធ្ងរពីជំងឺកូវីដ១៩។
អត្ថបទគួរអាន!
លោក ចាន់ មង្គល ៖ កន្លងមកខាងធនាគារជាតិ ក៏ដូចជារាជរដ្ឋាភិបាល បានចេញសេចក្ដីអំពាវនាវម្ដងជាពីរដង អំពីការស្នើឲ្យគ្រឹះស្ថានធនាគារ និងមីក្រូហិរញ្ញវត្ថុ បន្ធូរបន្ថយការបង់ប្រាក់ និងពន្យារពេលសងជាដើម។ តើមកទល់ពេលនេះ ខាងសមាជិករបស់សមាគមប៉ុន្មានស្ថាប័នដែរ ដែលបានអនុវត្តតាមការស្នើសុំនេះ ហើយអនុវត្តបានក្នុងកម្រិតណាដែរ?
លោក កាំង តុងងឺ ៖ធនាគារជាតិនៃកម្ពុជាបានផ្តើមវិធានការសម្រាប់គ្រឹះស្ថានធនាគារ និងហិរញ្ញវត្ថុ ស្តីពីការពារផល់ប៉ះពាល់ជាអវិជ្ជមានបណ្តាលមកពីការីករាលដាលនៃវីរុសកូវីដ-១៩ កាលពីថ្ងៃទី៥ ខែមីនា។ នាថ្ងៃទី២៧ ខែមីនា ធនាគារជាតិនៃកម្ពុជាបានចេញសារាចរណ៍បន្ថែម ដើម្បីជួយពង្រឹងបន្ថែមនូវគោលនយោបាយ និងនិតិវិធីឥណទានរៀបចំឡើងវិញ ព្រមទាំងកំណត់ច្បាស់លាស់នូវព្រំដែន នៃប្រភេទអតិថិជន ក្នុងវិស័យអាទិភាព ក្នុងការគាំពារអតិថិជន ដែលរងផលប៉ះពាល់ពីការរីករាលដាលនៃវីរុសកូវីដ-១៩។
កន្លងមកសមាគមបានអំពាវនាវដល់គ្រឹះស្ថានមីក្រូហិរញ្ញវត្ថុ ដែលជាសមាជិក ឲ្យជួយសម្រួល និងមានភាពទន់ភ្លន់ ជាមួយអតិថិជនតាមស្ថានភាពជាក់ស្តែង ចំពោះអតិថិជន ដែលរងផលប៉ះពាល់ខ្លាំង និងពិតប្រាកដ។ ទន្ទឹមនឹងនេះ យើងបានធ្វើការប្រជុំផ្សព្វផ្សាយដល់សមាជិក ឲ្យអនុវត្តនូវវិធានការ រួមទាំងសារាចរណ៍ណែនាំរបស់ធនាគារជាតិនៃកម្ពុជា ក៏ដូចជាបន្ត តាមដានដោយយកចិត្តទុកដាក់ខ្ពស់លើបញ្ហារបស់អតិថិជន និងគាំទ្រសមាជិកក្នុងការធានាឲ្យបាននូវផែនការបន្តអាជីវកម្មរបស់ខ្លួន និងការការពារការរីករាលដាលវីរុសកូវីដ-១៩ នៅក្នុងស្ថាប័នសមាជិក និងតំបន់ប្រតិបត្តិការរបស់ខ្លួន រួមទាំងពិនិត្យទៅលើវិធាននានា ក្នុងការទប់ស្កាត់ផលប៉ះពាល់អវិជ្ជមាន ផ្សេងៗទៀតដែលអាចកើតមានលើវិស័យហិរញ្ញវត្ថុ។
សមាជិកភាគច្រើនសុទ្ធតែបានចូលរួមយ៉ាងសកម្មក្នុងការបន្ធូរបន្ថយ និងរៀបចំឥណទានឡើងវិញជូនដល់អតិថិជន ដែលរងផលប៉ះពាល់ធ្ងន់ធ្ងរពីជំងឺកូវីដ-១៩ លើកលែងតែសមាជិកមួយចំនួនតូច ដែលអតិថិជនគាត់មិនសូវរងផលប៉ះពាល់ធ្ងន់ធ្ងរ ហើយមិនបានស្នើសុំការសម្របសម្រួល។
លោក ចាន់ មង្គល៖ តើសមាគមមានបានធ្វើការសិក្សា ឬវាយតម្លៃអំពីផលប៉ះពាល់នៃវិបត្តិកូវីដ-១៩ ចំពោះវិស័យមីក្រូហិរញ្ញវត្ថុនៅកម្ពុជាដែរទេ?
លោក កាំង តុងងី ៖ ក្នុងដំណាក់កាលនេះ យើងនៅមិនទាន់អាចវាយតម្លៃផលប៉ះពាល់រួមមកលើវិស័យទាំងមូលបានឡើយ។ កូវីដ-១៩ គឺជាបញ្ហាសកល ហើយកម្ពុជា រួមទាំងវិស័យមីក្រូហិរញ្ញវត្ថុ ក៏មិនអាចចៀសផុតពីផលប៉ះពាល់នេះបានដែរ ប៉ុន្តែសមាគមបានប៉ាន់ប្រមាណថា ផលប៉ះពាល់នឹងស្ថិតក្នុងកម្រិតដែលអាចគ្រប់គ្រងបាន។ គិតត្រឹមថ្ងៃ២៤ ខែមេសា ឆ្នាំ២០២០ ស្ថានភាពវិស័យមីក្រូហិរញ្ញវត្ថុ នៅមានស្ថានភាពធម្មតានៅឡើយ។ ការស្នើសុំប្រាក់កម្ចី ក៏ដូចជាការដាក់ប្រាក់បញ្ញើ នៅមានចរន្តជាធម្មតា។
លោក ចាន់ មង្គល ៖ តើមកទល់ពេលនេះ ខាងមីក្រូហិរញ្ញវត្ថុមានការរឹតត្បិតលើការផ្ដល់កម្ចី ទៅកាន់អតិថិជនដែរទេ ពិសេសក្នុងវិស័យទេសចរណ៍ ព្រោះថា លទ្ធភាពសងត្រឡប់របស់អតិថិជននៅក្នុងវិស័យនេះ ត្រូវបានគេមើលឃើញថា កំពុងនឹងមានជួបបញ្ហាខ្លាំងជាងគេនៅអំឡុងវិបត្តិកូវីដ-១៩នេះ។
លោក កាំង តុងងឺ ៖ ដរាបណានៅអតិថិជនមានតម្រូវការ គ្រឹះស្ថានមីក្រូហិរញ្ញវត្ថុនឹងនៅតែបន្តផ្តល់បា្រក់កម្ចីជូនអតិថិជន ឲ្យតែអតិថិជនមានលក្ខខណ្ឌគ្រប់គ្រាន់តាមគោលការណ៍របស់គ្រឹះស្ថាននីមួយៗ។ ឧទាហរណ៍ លទ្ធភាពសងត្រឡប់មកវិញ គោលដៅក្នុងការប្រើប្រាស់ប្រាក់កម្ចី ទ្រព្យបញ្ចាំ។ល។ បើមិនមានប្រាក់កម្ចី គ្រឹះស្ថានក៏មិនមានផលចំណេញដែរ។
លោក ចាន់ មង្គល ៖ ខ្ញុំសូមសួរសំណួរចុងក្រោយ វាហាក់ខុសពីប្រធានបទបន្ដិច ប៉ុន្ដែ វាទាក់ទងនៅក្នុងបញ្ហាវិបត្តិកូវីដ-១៩នេះដែរ ឃើញថា អំឡុងពេលនេះ មានក្រុមហ៊ុន និងរោងចក្រជាច្រើននៅកម្ពុជា បានកាត់បន្ថយចំនួនបុគ្គលិក និងមានខ្លះទៀត កាត់ប្រាក់ខែបុគ្គលិកក្នុងចំនួនណាមួយ តើចំពោះគ្រឹះស្ថានមីក្រូហិរញ្ញវត្ថុវិញ មកទល់នឹងពេលនេះ មានការអនុវត្តបែបនេះដែរទេ?
លោក កាំង តុងងឺ ៖ ជាគោលការណ៍ និងការប្តេជ្ញារបស់សមាជិកសមាគមមីក្រូហិរញ្ញវត្ថុកម្ពុជា យើងនឹងបន្តចូលរួមដោះស្រាយ និងជួយដល់អតិថិជន ដែលរងផលប៉ះពាល់ធ្ងន់ធ្ងរជាក់ស្តែង ដើម្បីឆ្លងកាត់គ្រាដ៏លំបាកនេះ។
សូមបញ្ជាក់ដែរថា ទិន្នន័យ ពីសមាគមមីក្រូហិរញ្ញវត្ថុកម្ពុជា បង្ហាញថា វិស័យមីក្រូហិរញ្ញវត្ថុ គិតត្រឹមដំណាច់ឆ្នាំ២០១៩ គ្រឹះស្ថានមីក្រូហិរញ្ញវត្ថុនៅកម្ពុជាបានផ្តល់ឥណទាន ជាង៧ប៊ីលានដុល្លា ដល់ប្រជាពលរដ្ឋខែ្មរប្រមាណជាង ២,២លាននាក់។ ក្នុងនោះ មានប្រមាណ ៨០ភាគរយជាស្ត្រី។ ចំណែកឥណទានតាមវិស័យនីមួយៗរួមមាន៖ ឥណទានគ្រួសារ៣៥% , ឥណទានកសិកម្ម២០% , ឥណទានពាណិជ្ជកម្ម ១៨% , ឥណទានសេវាកម្ម ១៤% , ដឹកជញ្ជូន ៦% , សំណង ៣% និងវិស័យផ្សេងៗទៀត ៤%។
គ្រឹះស្ថានមីក្រូហិរញ្ញវត្ថុទទួលបានប្រាក់បញ្ញើសរុបប្រមាណ ៣,៦ប៊ីលានដុល្លា ពីអ្នកបញ្ញើសរុប ២,៧លាននាក់ តាមរយៈការិយាល័យតំណាងចំនួនប្រមាណ ១.៤០០កន្លែង និងមានបុគ្គលិកបម្រើការងារសរុបប្រមាណ ៣៤.០០០នាក់ នៅទូទាំង ២៥ រាជធានី-ខេត្ត នៃព្រះរាជាណាចក្រកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
