ការសម្រេចលាលែងពីតំណែងរបស់ប្រធានាធិបតី និងនាយករដ្ឋមន្ត្រី ស្រីលង្កាបច្ចុប្បន្ននេះ គឺធ្វើឡើងបន្ទាប់ពីក្រុមបាតុករបានសម្រុកចូលលំនៅដ្ឋានរបស់របស់ពួកគេ ដើម្បីតវ៉ាប្រឆាំងនឹងការដឹកនាំរបស់រដ្ឋាភិបាលបច្ចុប្បន្ន និងទាមទារឲ្យក្បាលម៉ាស៊ីនដឹកនាំរដ្ឋាភិបាលទាំងពីរនាក់នេះ ត្រូវចុះចេញពីតំណែងឲ្យបានឆាប់បំផុត នៅចំពេលដែលសេដ្ឋកិច្ចនៃប្រទេសស្រីលង្កាកំពុងដាំក្បាលចុះកាន់តែខ្លាំងហើយនាពេលនេះ។ នេះបើតាមការរាយការណ៍ដោយសារព័ត៌មានអន្តរជាតិធំៗ។
ប្រធានាធិបតីស្រីលង្កា លោកហ្កូតាបាយ៉ា រ៉ាចាប៉ាស្កា (Gotabaya Rajapaksa) គ្រោងនឹងលាលែងពីតំណែងនៅថ្ងៃពុធសប្តាស៍នេះហើយ ខណៈដែលពេលនេះ ស្រីលង្កាចាប់ផ្តើមអស់ប្រេងឥន្ធនៈ អាហារ និងរបស់ប្រើប្រាស់ចាំបាច់ផ្សេងទៀត ដោយសារតែវិបត្តិសេដ្ឋកិច្ចដ៏អាក្រក់បំផុតមិនធ្លាប់មានចាប់តាំងពីប្រទេសនេះ ទទួលបានឯករាជ្យពីចក្រភពអង់គ្លេសក្នុងឆ្នាំ ១៩៤៨ មក។
ទោះយ៉ាងណា ប្រធានសភាស្រីលង្កា លោក ម៉ាហីនដា (Mahinda Yapa Abeywardena) បាននិយាយនៅក្នុងសេចក្តីថ្លែងការណ៍មួយថា សភាស្រីសង្កានឹងប្រជុំឡើងវិញនៅថ្ងៃសុក្រសប្ដាហ៍នេះ ហើយនឹងបោះឆ្នោតជ្រើសរើសប្រធានាធិបតីថ្មី ប្រាំថ្ងៃក្រោយបន្ទាប់ពីការប្រជុំនេះ។
ទោះជាយ៉ាងណា មេដឹកនាំនៃក្រុមបាតុករបាននិយាយថា អ្នកតវ៉ានឹងនៅកាន់កាប់លំនៅដ្ឋានរបស់ប្រធានាធិបតី និងនាយករដ្ឋមន្ត្រីនៅទីក្រុងកូឡុំបូ រហូតដល់មេដឹកនាំទាំងពីរលាលែងពីតំណែងយ៉ាងពិតប្រាកដ។
ក្នុននោះដែរ មន្ត្រីប៉ូលីសបានគូសបញ្ជាក់ថា ក្រុមបាតុករបានរកឃើញប្រាក់ប្រហែល 50,000 ដុល្លារ នៅឯគេហដ្ឋានរបស់ប្រធានាធិបតីកាលពីថ្ងៃទី៩ ខែកក្កដា។ ហើយវីដេអូក្មេងៗរាប់លុយបានល្បីពេញបណ្ដាញសង្គមតែម្តង។
អត្ថបទគួរអាន
ដោយឡែក អគ្គលេខាធិការអង្គការសហប្រជាជាតិលោកអានតូនីអូ ហ្កូថើរេស (Antonio Guterres) បានអំពាវនាវឱ្យមានការផ្លាស់ប្តូររដ្ឋាភិបាលស្រីសង្កាដោយរលូន និង «ដំណោះស្រាយប្រកបដោយសន្តិវិធី» ក្នុងការឆ្លើតតបនឹងវិបត្តិសេដ្ឋកិច្ចដ៏ធ្ងន់ធ្ងរនេះ។
លើសពីនេះទៅទៀត មេដឹកនាំមកគណបក្សប្រឆាំងលោកសាជីថ ព្រីម៉ានដាសា (Sajith Premadasa) ដែលទទួលបានអាសនៈចំនួន ៥៤ កៅអីនៅក្នុងសភាក្នុងចំណោមអាសនៈសរុប ២២៥ នោះ បាននិយាយថា ខ្លួនបានត្រៀមខ្លួនរួចជាស្រេច ដើម្បីឈានជើងចូលជារដ្ឋាភិបាលថ្មីរបស់ប្រទេសស្រីសង្កា។
លោកបានថ្លែងច្បាស់ៗថា៖ «ក្នុងនាមយើងជាបក្សប្រឆាំងបានត្រៀមខ្លួនជាស្រេចក្នុងការផ្តល់ភាពជាអ្នកដឹកនាំ ដើម្បីដឹកនាំប្រទេសមកកាន់ស្ថិរភាព និងវឌ្ឍភាពសេដ្ឋកិច្ចឡើងវិញ ហើយយើងនឹងតែងតាំងប្រធានាធិបតីថ្មី នាយករដ្ឋមន្ត្រីថ្មី ព្រមទាំងបង្កើតរដ្ឋាភិបាលដ៏មានសមត្ថភាពមួយ»។
លោក Rajapaksa និង លោក រ៉ានីល មិនស្ថិតនៅក្នុងលំនៅដ្ឋានរបស់ពួកគេទេ នៅពេលដែលក្រុមបាតុករបានសម្រុកចូលទៅក្នុងអគារ។ ហើយផ្ទះឯកជនរបស់នាយករដ្ឋមន្ត្រីលោក រ៉ានីល នៅតំបន់ជាយក្រុង Colombo ដ៏ធំស្កឹមស្កៃនោះ ក៏ត្រូវបានក្រុមបាតុករដុតបំផ្លាញកាលពីថ្ងៃទី ៩ខែកក្កដាផងដែរ ហើយក្នុងនោះ ជនសង្ស័យបីនាក់ត្រូវបានប៉ូលីសចាប់ខ្លួន។
គួររំលឹកត្រួសៗថា សេដ្ឋកិច្ចស្រីលង្កាពឹងផ្អែកយ៉ាងខ្លាំងទៅលើវិស័យទេសចរណ៍ តែដោយសារតែមានការរាតត្បាតយ៉ាងធ្ងន់ធ្ងរដោយជំងឺកូវីដ១៩ ព្រមទាំងបំណុលជាតិបានកើនឡើង គួបផ្សំនឹងសម្ពាធសេដ្ឋកិច្ចពិភពលោកផងនោះ បានធ្វើប្រជាជនជនទាំង ២២ លាននាក់នៃប្រទេសកោះមួយនេះ ជួបប្រទះនឹងវិបត្តិធ្ងន់ធ្ងរជាច្រើនរាប់ចាប់តាំងពីកង្វះខាតប្រេងឥន្ធនៈ អតិផរណាក្នុងស្រុក រហូតដល់វិបត្តិថាមពលជាដើម៕
