ឯកឧត្តមបានថ្លែងបែបនេះនៅក្នុងសិក្ខាសាលាស្តីពីការលើកកម្ពស់ការចូលរួមប្រកបដោយប្រសិទ្ធភាពក្នុងការងារកូដិចនៅកម្ពុជា ដោយមានការចូលរួមពីតំណាងក្រសួង ស្ថាប័នពាក់ព័ន្ធពីវិស័យសាធារណៈ និងឯកជន ដែលទាក់ទងនឹងវិស័យកសិកម្ម បរិស្ថាន ពាណិជ្ជកម្ម និងឧស្សាហកម្មផងដែរ។ឯកឧត្តម ប៉ាន សូរស័ក្តិ បានបញ្ជាក់ថា « ការចូលរួមរបស់កម្ពុជា នៅក្នុងកិច្ចការកូដិចនៅមានកម្រិត ទាំងនៅក្នុង ក្របខ័ណ្ឌកូដិចជាតិ ទាំងនៅក្នុងក្របខ័ណ្ឌកូដិចអន្តរជាតិ ដែលចំបាច់ត្រូវតែពង្រឹង ដើម្បីធានាបាននូវការយល់ដឹង និងការចូលរួមប្រកបដោយប្រសិទ្ធភាព ទាំងការគ្រប់គ្រង និងទាំងការងារបច្ចេកទេសវិទ្យាសាស្ត្រ។ ការផ្សាភ្ជាប់គ្នារវាងពាណិជ្ជកម្ម និងសុវត្ថិភាពម្ហូបអាហារ អាចត្រូវបានបង្ហាញច្បាស់ណាស់ នៅក្នុងកិច្ចព្រមព្រៀងស្ដីពីវិធានការអនាម័យ និងភូតគាមអនាម័យ (SPS) របស់អង្គការពាណិជ្ជកម្មពិភពលោក»។
អត្ថបទគួរអាន
ឯកឧត្តម ផាន អូន អគ្គនាយករងនៃអគ្គនាយកដ្ឋានកាំកុងត្រូល បានបញ្ជាក់ដែរថា ស្តង់ដាកូដិចជាតិ និងអន្តរជាតិនេះ មានសារៈសំខាន់ណាស់ជាពិសេសនៅក្នុងឧស្សាហកម្មផលិតចំណីអារហារ។
លោក អាឡិចហ្សង់ ហ្វីន តំណាងអង្គការស្បៀង និងកសិកម្មនៃអង្គការសហប្រជាជាតិបានឲ្យដឹងថា ការបង្កើនសមត្ថភាពយល់ដឹងដល់មន្ត្រី ស្ថាប័នពាក់ព័ន្ធ ពិតជាមានសារៈសំខាន់ណាស់ ពីដំណើរការប្រព្រឹត្តទៅនៃកិច្ចការ កូដិចជាតិ ដើម្បីជំរុញការចូលរួមរបស់កម្ពុជា ឱ្យបានសកម្ម និងមានប្រសិទ្ធភាព នៅក្នុងដំណើរការរៀបចំអភិវឌ្ឍន៍ស្តង់ដារគុណភាព និងសុវត្ថិភាពម្ហូបអាហារ។
តម្លៃស្នូលនៃកូដិច គឺការបង្កើតស្តង់ដារលើមូលដ្ឋានវិទ្យាសាស្ត្រ និងសមស្រប តាមគោលបំណងប្រើប្រាស់ ដោយឈរលើទស្សនៈ ប្រកបដោយបរិយាប័ន្ន កិច្ចសហការ ការឯកភាព និងតម្លាភាព។ ជាមួយគ្នានេះដែរ រាជរដ្ឋាភិបាលកម្ពុជា ក៏មានគោលដៅយុទ្ធសាស្ត្រ បង្កើនផលិតភាព និងប្រសិទ្ធភាពសេដ្ឋកិច្ច លើកកម្ពស់ឧត្តមភាព និងជំរុញនវានុវត្តន៍ ដែលក្នុងនោះ ការបន្តជំរុញ ការរៀបចំស្តង់ដារទំនិញ សេវា និងការគ្រប់គ្រងការលើកកម្ពស់គុណភាព គឺជាគោលនយោបាយ អាទិភាព៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
