តម្លៃលុយបាតថៃ បានងើបឡើងខ្ពស់ដល់ទៅ ៣០,២២ បាត ក្នុងមួយដុល្លារអាមេរិក ហើយអ្នកវិភាគមួយចំនួនរពឹងថា លុយបាតនឹងកើនឡើងថ្លៃ ដល់ ៣០ បាត ក្នុងមួយដុល្លារ នៅឆ្នាំក្រោយ។
លោក វិចិត្រ ប្រាក់កុប កុសល ប្រធានសមាគមទីភ្នាក់ងារទេសចរណ៍ថៃ បានបញ្ជាក់ប្រាប់កាសែតបាងកកប៉ុស្ដិ៍ថា វិស័យទេសចរណ៍ អាចនឹងបាត់បង់ឱកាសល្អ ដើម្បីទាក់ទាញភ្ញៀវទេសចរ មកកាន់ប្រទេសថៃ នាអំឡុងរដូវសម្បូរភ្ញៀវ ចាប់ពីខែវិច្ឆិកា ដល់ខែធ្នូ ដែលវាអាចនឹងមានភ្ញៀវតិចជាងគោលដៅដែលរាជរដ្ឋាភិបាលបានកំណត់នៅឆ្នាំនេះ។
អត្ថបទទាក់ទង!
លោក វិចិត្របាន គូសបញ្ជាក់ទៀតថា «យើងមិនមានការគ្រប់គ្រងលើកត្តាខាងក្រៅដូចជា បញ្ហាសង្គ្រាមពាណិជ្ជកម្មអាមេរិក និងចិន នោះទេ ប៉ុន្ដែ រដ្ឋាភិបាល និងធនាគារថៃ អាចជួយដោះស្រាយបញ្ហា ដោយការទម្លាក់ការប្រាក់ទាប ដើម្បីជួយដល់ប្រតិបត្តិករ ក្នុងវិស័យទេសចរណ៍ និងការនាំចេញ។»
ប្រធានសមាគភ្នាក់ងារទេសចរណ៍ថៃរូបនេះ បានលើកឡើងទៀតថា ការពន្យាពេលនៃការការលើកលែងទិដ្ឋាការមកដល់ តម្លៃ ២ពាន់បាត ប្រមាណ ៦៦ដុល្លារអាមេរិក គឺនឹងជួយរក្សាបានចំនួនភ្ញៀវទេសចរចិន នៅឆ្នាំនេះ បើទោះបីជា ប្រាក់យ័នចិន មានការចុះខ្សោយក៏ដោយ។
ប្រាក់បាតថៃ បានឡើងថ្លៃ ពី ៣៣,១៣ បាត ក្នុងមួយដុល្លារអាមេរិក ចាប់ពីខែចុងខែតុលា ឆ្នាំ២០១៨មក មកដល់ ៣០,២២ បាត ក្នុងមួយដុល្លារអាមេរិក នៅចុងឆ្នាំនេះ នេះបើតាមធនាគារកណ្ដាលថៃ។
អ្នកជំនាញមើលឃើញថា ប្រសិនបើប្រាក់បាត ឡើងដល់ ៣០ បាតក្នុងមួយដុល្លារអាមេរិក នោះ វិស័យទេសចរណ៍ថៃ នឹងកាន់តែត្រូវរងផលប៉ះពាល់ ដោយភ្ញៀវទេសចរចូលក្នុងប្រទេសថៃ មានចំនួនទាប តែនឹងកើនឡើងជនជាតិថៃ ធ្វើដំណើរចេញទៅក្រៅប្រទេសវិញ។
បញ្ហារូបិយវត្ថនេះ បានធ្វើឲ្យក្រុមប្រឹក្សាទេសចរណ៍ថៃ បន្ទាបព្យាករណ៍សម្រាប់ភ្ញៀវទេសចរមកដល់ នៅឆ្នាំនេះ មកនៅត្រឹម ៣៩,៧ លាននាក់ ខណៈដែលពីមុនព្យាករថា ទទួលបានភ្ញៀវទេសចរ ៤០,១ លាននាក់។
របាយការណ៍ពីក្រសួងទេសចរណ៍ និងកីឡាថៃ បានឲ្យដឹងថា ចំនួនទេសចរអន្តរជាតិដែលបានធ្វើដំណើរទៅកាន់ប្រទេសថៃ ក្នុងរយៈពេល ៩ខែ ឆ្នាំនេះ បានកើនឡើងដល់ ២៩,៥សែននាក់ កើន ៣,៥% ធៀបនឹងរយៈពេលដូចគ្នាកាលពីឆ្នាំមុន ដែលបានផ្ដល់ចំណូលប្រមាណ ១,៤២ ទ្រីលានបាត ប្រមាណជា ៤៧ ពាន់លានដុល្លារអាមេរិក កើនឡើង ៣,៥%។ ក្នុងរយៈពេល ៩ខែ ឆ្នាំនេះដែរថា ថៃបានទទួលបានភ្ញៀវទេសចរចិន ប្រមាណ ៨,៥ លាននាក់ កើនឡើង ១,៧% ខណៈដែល ទេសចរពីទ្វីបអឺរ៉ុប ធ្លាក់ចុះ១,៨%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
