អភិបាលរដ្ឋអ៊ីនឌីយ៉ាណា (Indiana) លោក Eric Holcomb កំពុងធ្វើទស្សនកិច្ចនៅតៃវ៉ាន់ ដែលនេះជាដំណើរទស្សនកិច្ចលើកទី៣ហើយនៅក្នុងខែនេះ សម្រាប់គណៈប្រតិភូអាមេរិកបន្ទាប់ពីប្រធានសភាអាមេរិកលោកស្រី Nancy Pelosi បានបំពេញទស្សនកិច្ចរយៈពេលខ្លីនៅតៃវ៉ាន់ដែលបានធ្វើឱ្យប្រទេសចិនខឹងសម្បារយ៉ាងខ្លាំង ព្រោះចិនបានចាត់ទុកតៃវ៉ាន់ថាជាទឹកដីរបស់ខ្លួន។
ក្រោយពេលមួយសប្តាហ៍បន្ទាប់ពីដំណើរទស្សនកិច្ចរបស់លោកស្រី Pelosi គឺមានសមាជិកសភាអាមេរិកចំនួន ៥ រូបទៀត ដឹកនាំដោយសមាជិកព្រឹទ្ធសភា គឺលោក Ed Markey ក៏បានទៅបំពេញទស្សនកិច្ចនៅតៃវ៉ាន់នេះផងដែរ។
លោក Holcomb ដែលជាអភិបាលរដ្ឋ អ៊ីនឌីយ៉ាណា គ្រោងនឹងជួបក្រុមតំណាងឱ្យក្រុមហ៊ុនផលិតបន្ទះឈីបរបស់តៃវ៉ាន់មួយចំនួននៅក្នុងដំណើរទស្សនកិច្ចនេះ នៅចំពេលមានការពង្រីកទំនាក់ទំនងរវាងរដ្ឋរបស់លោក និងកោះតៃវ៉ាន់ដែលជាមូលដ្ឋានរបស់ក្រុមហ៊ុនផលិតបន្ទះឈីបធំជាងគេបំផុតក្នុងពិភពលោក។
អត្ថបទគួរអាន
លោកស្រី សៃ អ៊ីនវេន មេដឹកនាំតៃវ៉ាន់បាននិយាយថា សន្តិសុខសេដ្ឋកិច្ច គឺជាសសរស្តម្ភដ៏សំខាន់នៃសន្តិសុខជាតិ និងក្នុងតំបន់។ តៃវ៉ាន់មានឆន្ទៈ និងអាចពង្រឹងកិច្ចសហប្រតិបត្តិការជាមួយដៃគូប្រជាធិបតេយ្យក្នុងការកសាងខ្សែចង្វាក់ផ្គត់ផ្គង់ប្រកបដោយនិរន្តរភាពសម្រាប់ការផលិតផ្គត់ផ្គង់បន្ទះឈីបបែបប្រជាធិបតេយ្យ។
លោកស្រី សៃ បាននិយាយថា រដ្ឋ Indiana របស់អាមេរិក បានត្រៀមខ្លួនក្លាយជាមជ្ឈមណ្ឌលសម្រាប់បច្ចេកវិទ្យាបន្ទះឈីបបន្ទាប់ពីការចុះហត្ថលេខាឱ្យចូលជាធរមាននូវច្បាប់មួយ របស់សហរដ្ឋអាមេរិកស្ដីពីការឧបត្ថម្ភធនដល់ឧស្សាហកម្មផលិតបន្ទះឈីបក្នុងស្រុក ខណៈដែលសហរដ្ឋអាមេរិកបាននិងកំពុងប្រកួតប្រជែងជាមួយក្រុមហ៊ុនរបស់ចិន និងប្រទេសផ្សេងទៀត។ សូមបញ្ជាក់ថា ពេលនេះក្រុមហ៊ុន TSMC ដែលជាក្រុមហ៊ុនផលិតបន្ទះឈីបធំបំផុតរបស់តៃវ៉ាន់ កំពុងសាងសង់រោងចក្រមួយក្នុងតម្លៃ ១២ពាន់លានដុល្លារនៅរដ្ឋ Arizona សហរដ្ឋអាមេរិកផងដែរ៕
អត្ថបទ៖ សុខ ជា
