ដ្បិតថា ការដាំដុះដើមច័ន្ទក្រឹស្នា នៅកម្ពុជា មានជាយូរឆ្នាំមកហើយក៏ពិតមែន ប៉ុន្ដែ ការបង្កើតរោងចក្រកែច្នៃដោយប្រើប្រាស់បច្ចេកវិទ្យាទំនើប ក្នុងការទាញយកទិន្នផលពីដើមរុក្ខជាតិដ៏ពិសេសមួយនេះ នៅមិនទាន់មាននៅឡើយទេ។
លោក សៀន ហ្គុ នាយកក្រុមហ៊ុន First Capital Global ដែលមានមូលដ្ឋាននៅប្រទេសថៃ បានលើកឡើងនៅក្នុងកម្មវិធីការចុះអនុស្សរណៈយោគយល់គ្នាជាមួយនឹងក្រុមហ៊ុន ធូបច័ន្ទក្រឹស្នាខ្មែរ និងម្ចាស់ចម្ការច័ន្ទក្រឹស្នា ថា បន្ទាប់ពីការចុះអនុស្សរណៈនេះទៅ ក្រុមហ៊ុននិងម្ចាស់ចម្ការនឹងធ្វើការរួមគ្នាដើម្បីអភិវឌ្ឍលើគម្រោងច័ន្ទក្រឹស្នា ដែលបាននិងកំពុងដាំដុះនៅកម្ពុជាប្រមាណ ១លានដើម និងឈានទៅបង្កើតរោងចក្រចម្រាញ់ប្រេងច័ន្ទក្រឹស្នានៅថ្ងៃខាងមុខផងដែរ។
លោក សៀន ហ្គុ បន្ថែមថា ជំហានដំបូងនៃការវិនិយោគរបស់ក្រុមហ៊ុនលោក នឹងចំណាយទុនប្រមាណ១០០លានដុល្លារ លើការមើលថែទាំដើមច័ន្ទក្រឹស្នា ជាមួយនឹងការប្រើប្រាស់បច្ចេកវិទ្យាទំនើប ហើយបច្ចេកទេសទាំងនោះ ត្រូវការទាមទារពេលវេលាច្រើនគួរសមដែរ មុននឹងអាចប្រមូលផលបានពីដើមច័ន្ទក្រឹស្នាទាំងនោះបាន។ ដោយឡែក សម្រាប់ការបង្កើតរោងចក្រវិញ គឺនឹងត្រូវធ្វើឡើងនៅ ៦ខែ ក្រោយពីដើមច័ន្ទក្រឹស្នាទាំងនោះ ត្រូវបានចុះមើលថែទាំ។
លោកបានគូសបញ្ជាក់ថា ក្រុមហ៊ុននឹងចុះសិក្សាមើលទីតាំងបន្ថែមនៅខេត្តព្រះសីហនុ ខណៈដែលម្ចាស់ចម្ការច័ន្ទក្រឹស្នានៅតំបន់នោះ ក៏បានណែនាំទីតាំងមួយចំនួននៅទីនោះសម្រាប់ការបើករោងចក្រផងដែរ។
ដើមរុក្ខជាតិ ច័ន្ទក្រឹស្នា។
តើអ្នកបានអានអត្ថបទនេះឬនៅ?
នាយកក្រុមហ៊ុនរូបនេះ បានបង្ហើបឲ្យដឹងទៀតថា ដើម្បីអាចធ្វើការចម្រាញ់ប្រេងពីដើមច័ន្ទក្រឹស្នានៅកម្ពុជា យ៉ាងហោចណាស់ ត្រូវការរយៈពេល៩ខែ ពោលគឺ៤ខែ ចំណាយពេលលើការថែទាំ ផ្សាំ ដោយប្រើប្រាស់បច្ចេកវិទ្យាទំនើប និងសល់ពេល ៥ខែទៀត សម្រាប់សិក្សាមើលទីតាំង និងបង្កើតរោងចក្រ។
រីឯរដ្ឋមន្ត្រីក្រសួងពាណិជ្ជកម្ម ក៏បានផ្ដល់អនុសាសន៍ដល់ក្រុមហ៊ុននេះឲ្យទៅរកមើលទីតាំងនៅខេត្តព្រះសីហនុដែរ ព្រោះខេត្តនេះងាយក្នុងការដឹកទំនិញចេញទៅមកក្រៅប្រទេស។
លោកស្រី នួន ប៊ុនណា ម្ចាស់ចម្ការដាំដើមច័ន្ទក្រឹស្នា ប្រមាណ២០ម៉ឺនដើម នៅខេត្តព្រះសីហនុ បានលើកឡើងថា ប្រជាជនខ្មែរមួយចំនួនបានដាំដុះដើមច័ន្ទក្រឹស្នានេះជាយូរមកហើយ តែនៅខ្វះបច្ចេកទេសក្នុងការថែទាំ និងបច្ចេកទេសកែច្នៃក្នុងការប្រមូលផល និងទីផ្សារមិនសូវជាមានសម្បូរនោះទេ។ ដូច្នេះហើយ ក៏បានធ្វើឲ្យអ្នកដាំដើមក្រឹស្នាខ្លះ សម្រេចចិត្តឈូសដើមក្រឹស្នាចោល មកដាំដំណាំផ្សេងក៏មានដែរ។
ប៉ុន្ដែ នៅពេលមានក្រុមហ៊ុនចូលមកវិនិយោគលើដំណាំនេះ លោកស្រីជឿជាក់ថា នឹងធ្វើឲ្យអ្នកដាំដើមច័ន្ទក្រឹស្នាមានភាពរីករាយឡើងវិញ ខណៈទីផ្សារក៏មានកាន់តែប្រសើរឡើង។ លោកស្រីបានគូសបញ្ជាក់ទៀតថា បច្ចុប្បន្ន ការដាំដុះច្រើនមាននៅខេត្តព្រះសីហនុ និងតាមបណ្ដាខេត្តផ្សេងទៀត ដែលមានសរុបប្រមាណ ១លានដើម។ លោកស្រីបន្ថែមថា ការដាំដុះដើមរុក្ខជាតិមួយនេះ ក៏មានការគាំទ្រ និងលើកទឹកចិត្តពីសំណាក់រាជរដ្ឋាភិបាលផងដែរ ហើយកម្ពុជាក៏បានផលិតធូបពីដើមច័ន្ទក្រឹស្នានេះ ប៉ុន្មានឆ្នាំមកហើយដែរ ដែលភាគច្រើនលក់ក្នុងស្រុក និងមានចំនួនតិចតួចបំផុតបាននាំចេញទៅក្រៅ។
ទោះយ៉ាងណា ក្រុមហ៊ុន First Capital Global នៅមិនទាន់បានប្រកាសបញ្ជាទិញដើមច័ន្ទក្រឹស្នា១លានដើមនោះ ពីប្រជាជន និងសម្រេចថាទិញក្នុងតម្លៃប៉ុន្មាននៅឡើយទេ ខណៈដែលអ្នកដាំដើមរុក្ខជាតិមួយនេះ មាននៅបណ្ដាខេត្តផ្សេងៗគ្នា និងមិនទាន់មានចងក្រងជាសមាគមនៅឡើយ។ តែយ៉ាងណា បើតាមការអះអាងពីលោកស្រី នួន ប៊ុនណា ប្រសិនបើម្ចាស់ចម្ការអាចលក់បានក្នុងតម្លៃ១ដើម ៥០ដុល្លារ ក៏ជាតម្លៃសមរម្យដែរ។
ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានលើកឡើងថា ដើមច័ន្ទក្រឹស្នានេះ គឺជាដំណាំប្រវត្តិសាស្ត្រមួយសម្រាប់កម្ពុជា ប៉ុន្ដែ កម្ពុជានៅមានទីផ្សារតូចនៅឡើយ។ ដ្បិតថា ការចាប់ផ្ដើមពង្រីកទីផ្សាររបស់ដើមច័ន្ទក្រឹស្នានៅកម្ពុជា ហាក់នៅដើរក្រោយគេបន្ដិចក្ដី ប៉ុន្ដែ រាជរដ្ឋាភិបាលនឹងខិតខំប្រឹងប្រែងជំរុញការងារនេះបន្ថែមទៀត ព្រោះវាជាផ្នែកមួយ ជួយដល់កសិករខ្នាតតូច និងមធ្យម ក៏ដូចជាបង្កើតឱកាសការងារជូនប្រជាពលរដ្ឋនៅជនបទ សំដៅចូលរួមកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិផងដែរ។
ឯកឧត្តមបន្តថា បច្ចុប្បន្ន កម្ពុជាក៏បាននាំចេញផលិតផលធូបមួយចំនួន ដែលធ្វើឡើងពីដើមច័ន្ទក្រឹស្នានេះទៅកាន់ទីផ្សារបរទេសផងដែរ ហើយក្រោយពីមានរោងចក្រចម្រាញ់ប្រេងច័ន្ទក្រឹស្នានេះ នឹងធ្វើឲ្យការនាំចេញផលិតផលនេះ នឹងកាន់តែមានវិសាលភាពធំជាងមុនថែមទៀត។
សូមជម្រាបថា ការដាំដើមច័ន្ទក្រឹស្នានេះ ត្រូវប្រើប្រាស់ពេលវេលាប្រមាណ៦ ទៅ ៧ឆ្នាំ ទើបអាចប្រមូលផលបាន ហើយបើតាមការលើកឡើងពីក្រុមហ៊ុន ដែលគ្រោងនឹងបើករោងចក្រចម្រាញ់ប្រេងច័ន្ទក្រឹស្នានៅកម្ពុជា បានឲ្យដឹងថា ប្រេងរុក្ខជាតិនេះអាចយកទៅប្រើប្រាស់បានច្រើន ដូចជា កែច្នៃជាទឹកអប់ ធូប ផលិតផលថែរក្សាស្បែក និងធ្វើជាឱសថជាដើម។ រីឯទីផ្សារដែលមានតម្រូវការខ្លាំងនោះ គឺនៅប្រទេសចិននិងប្រទេសនៅអារ៉ាប់រួម៕
