គណៈកម្មការត្រួតពិនិត្យសុវត្ថិភាពចំណីអាហារ និង ឪសថរបស់ថៃ ហៅកាត់ថា FDA កន្លងមកបានអនុញ្ញាតឲ្យក្រុមហ៊ុន ស្យាមបាយអូសាយអិន (Siam Bioscience) សហការជាមួយក្រុមហ៊ុន AstraZeneca ក្នុងការផលិតវ៉ាក់សាំងកូវីដ-១៩ក្នុងប្រទេសថៃផ្ទាល់តែម្តង។
បើតាមរដ្ឋាភិបាលថៃ ភាគីទាំងពីរជាអ្នកដើរតួនាទីយ៉ាងសំខាន់ ដើម្បីផ្តល់ការផ្គត់ផ្គង់វ៉ាក់សាំងប្រកបដោយសុវត្ថិភាព និង ដើម្បីគាំទ្រដល់យុទ្ធនាការចាក់វ៉ាក់សាំងនៅក្នុងប្រទេសថៃដែលកំពុងតែអូសបន្លាយដោយសារតែការរីករាលដាលនៃកូវីដ-១៩ រលកទី៣។
លោក ជេម ធីក (James Teague) ប្រធានតំណាងក្រុមហ៊ុន AstraZeneca ប្រចាំនៅប្រទេសថៃបាននិយាយថា កិច្ចសហការផលិតរវាងក្រុមហ៊ុនថៃ និង អង់គ្លេសនេះ មិនត្រឹមតែធានាបានពីការចាក់វ៉ាក់សាំងបានគ្រប់គ្រាន់នៅក្នុងប្រទេសថៃនោះទេ ថែមទាំងអាច ដើរតួនាទីសំខាន់ដើម្បីគាំទ្រដល់ប្រទេសក្បែរខាងក្នុងតំបន់ផ្សេងទៀត ក្នុងការទប់ស្កាត់ និង ប្រឆាំងជាមួយជំងឺកូវីដ-១៩។
អត្ថបទទាក់ទង
បើតាមក្រសួងសុខាភិបាលថៃ វ៉ាក់សាំង AsrtraZeneca ដែលផលិតនៅថៃ នឹងត្រូវផ្តើមប្រើប្រាស់ពីថ្ងៃទី៧ ខែមិថុនាតទៅ សម្រាប់ពលរដ្ឋចំនួន ១៦លាននាក់ដំបូង។ ជាមួយគ្នានេះដែរ ថៃបានបង្ហាញពីផែនការចាក់វ៉ាក់សាំងមុនគេ ទៅឲ្យពលរដ្ឋក្នុងតំបន់ ដែលមានការឆ្លងរាលដាលខ្លាំងដូចជា ក្រុងបាងកក ខេត្តឈៀងម៉ៃ និង ខេត្តឈុនបុរី ដើម្បីរារាំងកុំឲ្យមានការឆ្លងលឿនរហ័សពេក។
អ្វីដែលគួរឲ្យចាប់អារម្មណ៍នោះ គឺនៅត្រង់ថា មិនត្រឹមតែរដ្ឋាភិបាលថៃនោះទេ ដែលញ៉ាប់ដៃញ៉ាប់ជើងរៀបចំកម្មវិធីចាក់វ៉ាក់សាំងដល់ពលរដ្ឋ សូម្បីតែវិស័យឯកជន និងមហាសេដ្ឋីគ្រាក់ៗនៅថៃ សុទ្ធតែបានស្ម័គ្រចិត្តចូលរួមជួយរដ្ឋាភិបាលក្នុងផែនការចាក់វ៉ាក់សាំងទូទាំងប្រទេសចាប់ពីខែមិថុនានេះ។
វិស័យឯកជនបានសន្យាថា នឹងសហការជាមួយរដ្ឋាភិបាល ដើម្បីពន្លឿនការចែកចាយវ៉ាក់សាំង និងស្វែងរកវ៉ាក់សាំងបន្ថែមទៀតផងដែរ។
នាយករដ្ឋមន្ត្រីថៃ លោក ប្រាយុទ្ធ ចាន់អូចា បានជួបជាមួយតំណាងសភាពាណិជ្ជកម្មថៃ សមាគមធនាគារថៃ និងក្រុមប្រឹក្សាទេសចរណ៍ថៃ និងបានកំណត់ពីតួនាទីជាក់លាក់ ដែលវិស័យឯកជននឹងចូលរួមនៅក្នុងយុទ្ធនាការចាក់វ៉ាក់សាំងនេះ និងគ្រោងនឹងចាក់ឲ្យប្រជាជនឲ្យបាន ៧០% ក្នុងចំណោមប្រជាជនសរុប នៅត្រឹមដំណាច់ឆ្នាំនេះ ។
ក្រៅពីនោះគេឃើញមាន ក្រុមហ៊ុន CP Group របស់មហាសេដ្ឋីដ៏ល្បីល្បាញបំផុតមួយរូបនៅប្រទេសថៃ គឺលោក ថានិន ជរ៉ាវ៉ានុន្ទ ក៏ស្ថិតក្នុងចំណោមក្រុមហ៊ុនធំៗ ដែលបានយល់ព្រមចូលរួមនៅក្នុងកម្មវិធីចាក់វ៉ាក់សាំងនេះដែរ។ ម្ចាស់ផ្សារទំនើប អគារអចលនទ្រព្យ និងឧទ្យានឧស្សាហកម្មធំៗ នឹងជួយផ្ដល់ទីតាំងសម្រាប់ធ្វើជាកន្លែងចាក់វ៉ាក់សាំង នៅពេលដែលប្រទេសថៃទទួលបានវ៉ាក់សាំងច្រើនថែមទៀតចាប់ពីខែមិថុនាទៅ។
ទោះបីរដ្ឋាភិបាលថៃបានបង្ហាញពីសញ្ញាល្អនៃកម្មវិធីចាក់វ៉ាក់សាំងរបស់ខ្លួនយ៉ាងណា ក៏ក្រុមបក្សប្រឆាំងនៅប្រទេសថៃ មិនបានបង្ហាញការពេញចិត្ត និងគាំទ្រនោះទេ។
ជាក់ស្តែង បក្សប្រឆាំងនៅប្រទេសថៃបន្ទាប់ពីបានទាមទារឲ្យរដ្ឋមន្ត្រីសុខាភិបាលថៃចុះចេញពីតំណែងហើយនោះ ពេលនេះពួកគេបានទាមទារឲ្យលោក ប្រាយុទ្ធ ចាន់អូចារចុះចេញពីតំណែងថែមទៀត។ នេះបើតាមការចុះផ្សាយ TheThaiger។
ការអះអាងមិនខុសគ្នាពីពេលដែលគេទាមទារឲ្យរដ្ឋមន្ត្រីសុខាភិបាលចុះចេញពីតំណែងនោះទេ ពេលនេះ ក្រុមប្រឆាំងបានអះអាងដូចគ្នាដែរថា លោកប្រយុទ្ធបានធ្វើឲ្យប្រទេសជាតិស្ថិតក្នុងគ្រោះថ្នាក់ និងបានបរាជ័យក្នុងការទប់ស្កាត់កូវីដ-១៩ម្តងទៀត ដែលបណ្តាលឲ្យមានឆ្លងរាលដាលម្តងទៀតក្នុងពេលដ៏ខ្លី បន្ទាប់ពីរលកឆ្លងលើកមុនទើបនឹងបានស្រាកស្រាន្ដបន្តិច។
សូមបញ្ជាក់ថា ប្រទេសថៃហាក់មានការយឺតយ៉ាវនៅឡើយក្នុងការចាក់វ៉ាក់សាំងឲ្យប្រជាជនដើម្បីទប់ការរាលដាលនៃជំងឺកូវីដ-១៩ ដោយគិតមកដល់ពេលនេះ វ៉ាក់សាំងទើបតែ ១,៣លានដូសប៉ុណ្ណោះ ដែលបានចាក់ឲ្យប្រជាជនរួចរាល់ ដែលស្មើនឹង ១% នៃប្រជាជនសរុប។ បច្ចុប្បន្ន រដ្ឋាភិបាលថៃកំពុងចរចាទិញវ៉ាក់សាំងបន្ថែម ដើម្បីឲ្យបានដល់ ១០០លានដូស នៅត្រឹមឆ្នាំនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
