ប្រធានសមាគមអ្នកនាំចេញអង្ករថៃ បានគូសបញ្ជាក់ថា សកម្មភាពនាំចេញអង្ករថៃ នៅក្នុងខែកក្កដានេះ គឺមានសភាពស្ងប់ស្ងាត់ខុសប្លែកពីធម្មតា បន្ទាប់ពីក្រុមហ៊ុន Phoenix Commodities ដែលជាក្រុមហ៊ុនជួញដូរទំនិញដ៏ធំមួយលើសកលលោក បានប្រកាសក្ស័យធន ដោយសារតែមេរោគកូវីដ-១៩។
ក្រុមហ៊ុន Phoenix Commodities ដួលរលំ បានប៉ះពាល់ដល់អ្នកនាំចេញអង្ករថៃ សឹងតែទាំងអស់ ដោយសារតែក្រុមហ៊ុនមួយនេះ ជាដៃគូពាណិជ្ជកម្មដ៏សំខាន់ និងជាអ្នកនាំចេញអង្ករថៃ ទៅកាន់ទីផ្សារអាហ្វ្រិក ហើយក្រុមហ៊ុនមួយនេះ ក៏បានជំពាក់បំណុលពាណិជ្ជករថៃ ជាង ៣០លានដុល្លារអាមេរិកផងដែរ។
អត្ថបទទាក់ទង!
លើសពីនេះទៅទៀត ក្រុមហ៊ុនជួញដូរអង្ករធំៗ នៅជុំវិញសកលលោក កំពុងតែជួបប្រទះនឹងបញ្ហាលំហូរសាច់ប្រាក់ និងទំនងជាអាចជួបនឹងបញ្ហាហិរញ្ញវត្ថុ នាពេលឆាប់ៗខាងមុខ ហើយក្រៅពីនោះ អ្នកទិញ និងប្រើប្រាស់អង្ករសំខាន់ៗ ក៏ផ្អាកការទិញអង្ករ ក្នុងពេលនេះដែរ។
បន្ថែមលើនេះ អង្ករថៃ មានតម្លៃខ្ពស់ជាងអង្ករមកពីប្រទេសដទៃ ដែលបង្កជាការលំបាកក្នុងការប្រកួតប្រជែង ដោយអង្ករបាក់របស់ថៃ មានតម្លៃប្រហែល ៤៥០ដុល្លារអាមេរិក ក្នុងមួយតោន ខណៈអង្ករ មកពីវៀតណាម ឥណ្ឌា និងមីយ៉ាន់ម៉ា ដាក់លក់ក្នុងតម្លៃ ៣៦០ដុល្លារអាមេរិក ក្នុងមួយតោន។
យ៉ាងណាក៏ដោយ ក្នុងរយៈពេល ៥ខែ ដើមឆ្នាំ២០២០នេះ ថៃ បាននាំចេញអង្ករជាង ២លាន ៥សែនតោន គិតជាទឹកប្រាក់ប្រមាណ ១,៧ ពាន់លានដុល្លារអាមេរិក ថយចុះប្រមាណ ១៣% ធៀបនឹងពេលដូចគ្នា កាលពីឆ្នាំមុន។
សមាគមអ្នកនាំចេញអង្ករថៃ បានកំណត់គោលដៅនាំចេញអង្ករ ៧លាន ៥សែនតោន សម្រាប់ឆ្នាំ ២០២០នេះតែទំនងជាមិនអាចសម្រេចបាន ទើបប្រកាសកំណត់គោលដៅជាថ្មីម្តងទៀត នៅចុងខែកក្កដានេះ។
សូមជម្រាបថា កាលពីឆ្នាំ ២០១៩កន្លងទៅ ថៃ សម្រេចការនាំចេញអង្ករជាង ៧លាន ៥សែនតោន ដែលមានតម្លៃសរុបជាង ៤ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
