នៅក្នុងចំណោមថវិកាចំណាយសរុបជាង ៤ពាន់៦រយលានដុល្លារអាមេរិកនោះ មានជាង ២ពាន់៧រយលានដុល្លារនឹងចំណាយទៅលើការធានាតម្លៃស្រូវអង្ករឲ្យល្អសមរម្យ បូករួមទាំងការចំណាយលើធនាគាររដ្ឋកសិកម្មផងដែរ BAAC។ រីឯ ការចំណាយជាង ១ពាន់៦រយលានដុល្លារទៀត នឹងចំណាយលើការគ្រប់គ្រងការឧបត្ថម្ភធន និង ថ្លៃដើមលើការប្រមូលផលស្រូវរបស់កសិករថៃ ខណៈដែលទឹកប្រាក់ចំណាយជាង ២៣៥លានដុល្លារអាមេរិកទៀត គឺសម្រាប់ឧបត្ថម្ភធនទៅលើអត្រាការប្រាក់កម្ចីសម្រាប់កសិករ ការធ្វើឲ្យប្រសើរឡើងនូវតម្លៃស្រូវអង្ករ និង ធ្វើឲ្យស្រូវអង្ករកសិករថៃមានស្ថិរភាពថ្លៃ។
យ៉ាងណាក៏ដោយចុះ លោកនាយករដ្ឋមន្ត្រីថៃ ប្រាយុទ្ធ ចាន់ អូចារ បានចាត់ទុកថា ថវិកានេះ គឺមានកម្រិតខ្ពស់ ហើយលោកក៏បានបញ្ជាឲ្យទីភ្នាក់ងាររដ្ឋាភិបាលដែលទទួលបន្ទុកកិច្ចការនេះ ត្រូវពិចារណាឡើងវិញ ដើម្បីកំណត់កញ្ចប់ថវិកាចំណាយដែលសមស្របជាងនេះ មុននឹងដាក់ស្នើទៅកាន់គណៈរដ្ឋមន្ត្រីពិនិត្យបន្ដ។
រដ្ឋាភិបាលថៃបានឲ្យដឹងថា រដ្ឋាភិបាលទំនងជាប្រឈមមុខនឹងបន្ទុកហិរញ្ញវត្ថុបន្ថែមទៀត ដោយសារតែការធ្លាក់ចុះនៃតម្លៃស្រូវអង្ករ ព្រោះតែការផ្គត់ផ្គង់កើនឡើងកាន់តែខ្ពស់ ហើយការនាំចេញអង្ករមានការថមថយចុះ។
អត្ថបទគួរអាន
អ្នកនាំពាក្យរដ្ឋាភិបាលថៃ បានលើកឡើងថា គម្រោងធានាតម្លៃស្រូវអង្កររបស់រាជរដ្ឋាភិបាលថៃ នឹងគ្របដណ្ដប់លើគ្រួសារពលរដ្ឋប្រមាណ៤លាន៧សែនគ្រួសារ ដែលបានចុះឈ្មោះជាមួយនឹងនាយកដ្ឋានពង្រីកកសិកម្មថៃ។
សូមបញ្ជាក់ថា នៅរយៈពេល៦ខែដំបូងឆ្នាំ២០២១ ប្រទេសថៃសម្រេចបានការនាំចេញអង្ករ ២លាន២សែនតោន មានការធ្លាក់ចុះជាង ២១% ធៀបនឹងឆ្នាំមុន ដោយក្នុងនោះ តម្លៃទឹកប្រាក់ដែលបានមកពីការនាំចេញអង្ករមានជាង ១ពាន់៣រយលានដុល្លារ ធ្លាក់ចុះជាង២៨%។
ប្រទេសថៃនៅឆ្នាំនេះ មានគោលដៅនាំចេញ អង្ករឲ្យបានដល់ ៦លានតោន ជាមួយទឹកប្រាក់ប្រមាណ៥ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
