លោក ជូរីន ឡាក់សាណា វិសិទ្ធ រដ្ឋមន្រ្តីក្រសួងពាណិជ្ជកម្មថៃ បានគូសបញ្ជាក់ថា តម្លៃស៊ុតនៅតាមបណ្តាខេត្តជាច្រើនបានកើនឡើង ៣ ទៅ ៤ដង បន្ទាប់ពីប្រជាជនចាប់ផ្តើមទិញស៊ុតស្តុកទុកច្រើន ធ្វើឲ្យមានកង្វះខាតស៊ុតនៅលើទីផ្សារ។
លើសពីនេះ កសិករនិងឈ្មួញកណ្តាលបានបន្ទោសគ្នាទៅវិញទៅមកអំពីរឿងរក្សាស៊ុតទុក មិនព្រមបញ្ចេញទៅលើទីផ្សារ ដើម្បីទុកលក់យកផលចំណេញច្រើន នៅពេលមានតម្រូវការខ្ពស់។
បើតាមក្រសួងពាណិជ្ជកម្មថៃ បានបញ្ជាក់ថា បើទោះបីជាមានការផ្ទុះឡើងនូវមេរោគកូវីដ១៩ ការផលិតស៊ុតនៅតែបន្តជាធម្មតា ដោយគ្មានផលប៉ះពាល់នោះទេ គឺប្រមាណ ៤០លានស៊ុតក្នុងមួយថ្ងៃ ដែលអាចនឹងផ្គត់ផ្គង់បានគ្រប់គ្រាន់ សម្រាប់ទីផ្សារក្នុងស្រុក។
អត្ថបទទាក់ទង
យ៉ាងណាក៏ដោយ ដោយសារតែមេរោគកូវីដ១៩ ប្រជាជនថៃបានចាប់ផ្តើមទិញស៊ុតច្រើនជាងធម្មតា រហូតដល់ទៅ ៣ដង ដែលធ្វើឲ្យតម្រូវការកើនឡើងខ្លាំង។
រាជរដ្ឋាភិបាលថៃ បានព្រមានថា បើសិនជាអ្នកលក់ស៊ុតដំឡើងថ្លៃហួសហេតុ ត្រូវប្រឈមមុខនឹងការជាប់គុក រហូតដល់ទៅ ៧ឆ្នាំ និងពិន័យជាទឹកប្រាក់រហូតដល់ទៅ ៤ពាន់ ២រយដុល្លារអាមេរិក។
ជាចុងក្រោយ លោក ជូរីន គូសបញ្ជាក់ថា ស៊ុត គួរតែមានតម្លៃ ៣៥០រៀល ក្នុងមួយគ្រាប់ ហើយត្រូវចែកចាយឲ្យបានលឿនបំផុត ដើម្បីចៀសវាងការឆ្លៀតឱកាសដំឡើងថ្លៃ រហូតមិនអាចគ្រប់គ្រងបាន៕
