ថៃនឹងខាតបង់ប្រាក់ជាង៤ពាន់លានដុល្លារ អំឡុងពេលបិទការដ្ឋានសំណង់ និងផ្ទះកម្មកររយៈពេល១ខែ

ប្រាកដណាស់ការបិទខ្ទប់រយៈពេល៣០ថ្ងៃនេះនៅក្នុងទីក្រុងបាងកកធ្វើឲ្យថៃខាតបង់គិតជាទឹកប្រាក់ប្រមាណជាង៤ពាន់៣រយលានដុល្លារអាមេរិក។ លើសពីនេះទៀត វាក៏បានធ្វើឲ្យខាតបង់ និង មានការប៉ះពាល់យ៉ាងខ្លាំងទៅលើខ្សែចង្វាក់ផ្គត់ផ្គង់នៅក្នុងការដ្ឋានសំណង់ និង វិស័យអចលនវត្ថុក្នុងទំហំខាតបង់ ដែលបានមិនអាចប៉ាន់ស្មានបាន។ នេះបើតាមការរាយការណ៍សារព័ត៌មានបាងកកប៉ុស្ដិ៍របស់ថៃ។

លោក សារុន រូចលឺត ចាន់យ៉ា (Sarun Rojlertjanya) អគ្គលេខាធិការងនៃសមាគមអ្នកម៉ៅការសំណង់ថៃ បាននិយាយថាការខាតបង់ពីការបិទខ្ទប់នៅក្នុងវិស័យសំណង់ថៃអាចនឹងមានកាន់តែធំធេងជាងតម្លៃដែលវិស័យនេះបានចូលរួមចំណែកក្នុងផលិតផលក្នុងស្រុកសរុបទៅទៀត។ អគ្គលេខាធិការងនៃសមាគមអ្នកម៉ៅការសំណង់ថៃបន្ថែមថា ខ្សែចង្វាក់ផ្គត់ផ្គង់ក្នុងវិស័យសំណង់គឺមានទំហំធំធេងណាស់ ដែលវិស័យនេះមានជាប់ទាក់ទងយ៉ាងច្រើនជាមួយនឹងរោងចក្រផលិតសម្ភារៈសំណង់ផ្សេងៗ រួមទាំងអ្នកម៉ៅការសំណង់តូចៗ និង សេវាដឹកជញ្ជូនផងដែរ។

ក្នុងមួយឆ្នាំៗ វិស័យសំណង់ថៃបានរួមចំណែកប្រមាណ៨% នៃទំហំផលិតផលក្នុងស្រុកសរុបរបស់ប្រទេសថៃ ហើយការខាតបង់នៅរយៈពេល១ខែ នៃការបិទខ្ទប់អាចនឹងមានប្រហែល ០,៦៦% នៃទំហំផលិតផលក្នុងស្រុកសរុប ពោលគឺមានប្រហែលជាង៣ពាន់លានដុល្លារ នៃទំហំផលិតផលក្នុងស្រុកសរុបរបស់ថៃដែលមានប្រមាណ ៤៩០ពាន់លានដុល្លារកាលពីឆ្នាំ២០២០។

មិនតែប៉ុណ្ណោះ បញ្ហាបិទខ្ទប់នេះ ក៏បានធ្វើឲ្យប៉ះពាល់ទៅដល់ការងារនៅក្នុងវិស័យសំណង់ជាច្រើនផងដែរ ប្រសិនបើការព្យួការងារកម្មករសំណង់នេះ មិនបានធ្វើឡើងដោយត្រឹមត្រូវ ពិសេសការងារនៅក្នុងគម្រោងសំណង់អគារខ្ពស់ៗ និង ការងារសំណង់ក្រោមដីជាដើម។

អ្នកជំនាញនៅក្នុងវិស័យម៉ៅការសំណង់បានលើកឡើងទៀតថា បទបញ្ជាបិទខ្ទប់របស់អាជ្ញាធរថៃនេះ បានធ្វើឡើងលឿនរហ័យពេក គឺបានដាក់ចេញថ្ងៃទី ២៥ ខែមិថុនា ហើយចាប់ផ្ដើមចូលធរមាននៅថ្ងៃទី ២៨ខែមិថុនាតែម្ដង ដែលវាពិបាកក្នុងការរៀបចំខ្លួនជាមុនសម្រាប់អ្នករកស៊ីក្នុងវិស័យសំណង់ ក៏ដូចជាកម្មករសំណង់ផងដែរ។

បញ្ហាមួយទៀតនោះ គឺការផាកពិន័យចំពោះការពន្យារពេលនៃគម្រោងសាងសង់។ សម្រាប់គម្រោងក្នុងវិស័យឯកជន ពួកគេអាចសម្របសម្រួលគ្នាបាន ប៉ុន្ដែ សម្រាប់គម្រោងសាធារណៈវិញ ភ្នាក់ងាររដ្ឋាភិបាលខ្លះ មានការស្ទាក់ស្ទើរក្នុងការផ្ដល់ការពន្យារពេលដោយគ្មានការផាកពិន័យ ដោយសារតែពួកគេបារម្ភខ្លាចធ្វើខុសបទបញ្ញត្តិរបស់រដ្ឋ។

ជាមួយគ្នានេះ ទីផ្សារទិញលក់អចលនវត្ថុក៏អាចនឹងប្រឈមការខាតបង់ដូចគ្នាដែរ ពោលគឺនៅរយៈពេល១ខែនៃការបិទខ្ទប់នេះ ចរន្ដនៃការទិញលក់ផ្ទះសម្បែងនៅក្រុងបាងកកអាចនឹងខាតបង់ក្នុងរង្វង់ប្រមាណ១ពាន់លានដុល្លារអាមេរិក។

ដូច្នេះ សរុបជារួមទាំង ការខាតបង់នៅក្នុងវិស័យសំណង់ បូករួមទាំងការខាតបង់នៅក្នុងទីផ្សារទិញលក់អចលនវត្ថុទៀតនោះ ថៃត្រូវខាតប្រមាណជាង៤ពាន់លានដុល្លារអាមេរិកនៅក្នុងរយៈពេលបិទខ្ទប់ក្រុងបាងកក ៣០ថ្ងៃនេះ៕