ថៃ ជំរុញការនាំចេញកៅស៊ូធម្មជាតិឡើងវិញ បន្ទាប់ពីផ្អាករយៈពេល ៤ខែ

លោក ជូរីន ឡាក់សាណា​ វីសិទ្ធ រដ្ឋមន្រ្តីនៃក្រសួង​ពាណិជ្ជកម្មថៃ បានបញ្ជាក់ថា ថៃ បានចរចា​លក់កៅស៊ូ​ជាង ២៦ម៉ឺនតោន ទៅឲ្យក្រុមហ៊ុន​ឯកជន​ក្នុងប្រទេសចិន​ និងហុងកុង ដែលមាន​ទំហំទឹកប្រាក់​ប្រមាណ ៤៣០លានដុល្លារ​អាមេរិក។

កាលពីពេលថ្មីៗនេះ ទៀតសោត ថៃ ក៏បានលក់កៅស៊ូ ១០ម៉ឺនតោន ដែលមានតម្លៃប្រហែល ២៥០លានដុល្លារ​អាមេរិក ទៅឲ្យ ប្រទេសឥណ្ឌា​ផងដែរ ហើយលោក ជូរីន ក៏គ្រោងនឹងបន្ត​ទៅចរចាជំនួញ​កៅស៊ូនេះ នៅប្រទេសទួគី និងអាល្លឺម៉ង់ ថែមទៀតផង។

ក្រុមប្រឹក្សាធនធាន​កៅស៊ូត្រីភាគីអន្តរជាតិ​ I.T.R.C ដែលរួមមាន ប្រទេសថៃ ឥណ្ឌូនេស៊ី​​ និងម៉ាឡេស៊ី បានយល់ព្រមគ្នា កាលពីខែមីនា កន្លងទៅ ថានឹងកាត់បន្ថយការ​នាំចេញកៅស៊ូ ២៤ម៉ឺនតោន ដើម្បីជួយស្រោចស្រង់​តម្លៃកៅស៊ូលើទីផ្សារអន្តរជាតិ ហើយកិច្ចព្រមព្រៀងនេះ ក៏បានបញ្ចប់កាល​ពីចុងខែកញ្ញា កន្លងទៅនេះដែរ។

បើតាមសេចក្តីប្រកាស​ព័ត៌មានរបស់ ​ITRC នេះគឺថា សមាជិកទាំង ៣នេះ អាចផលិត​កៅស៊ូបាន ៧០% នៃផលិតកម្មកៅស៊ូ​ទូទាំង​​សកលលោក ហើយជាក់ស្តែង ការសម្រេច​កាត់បន្ថយ​ការនាំចេញ​កៅស៊ូ គឺមាន រហូតដល់ទៅ ៤៤ម៉ឺនតោន​ឯណោះ ក្នុងរយៈពេល ៤ខែនេះ។

សូមជម្រាបថា ក្រុមប្រទេស​ទាំង ៣ ក៏បានព្រមព្រៀងគ្នាថា បើសិនជា​ មិនអាចស្រោចស្រង់​ស្ថានការណ៍​លំបាកបានទេ ពួកគេ នឹងផ្លាស់ប្តូរ​វិធានការ​ថ្មីទៀត ព្រោះពួកគេមិនអាចផ្តោត​ទៅលើ ការនាំចេញ​កៅស៊ូ តែមួយមុខនោះទេ គឺត្រូវពង្រីក​ការប្រើប្រាស់កៅស៊ូ​ ក្នុងស្រុក ឲ្យបាន​កាន់តែច្រើន៕