ធនាគារសិកម្ម និងកិច្ចសហប្រតិបត្តិការកសិកម្ម BAAC ដែលគ្រប់គ្រងដោយរដ្ឋថៃ នឹងដាក់ចេញនូវវិធានការសង្គ្រោះបន្ទាន់មួយ ជួយដល់កសិករថៃ នៅរដូវគ្រោះរាំងស្ងួតនៅឆ្នាំនេះ ដោយផ្ដល់ឲ្យកសិករអាចធ្វើការបង់សងការប្រាក់ ទៅឲ្យធនាគារវិញ ជាដំណាក់កាលតាមលទ្ធភាព ឬហៅថា Instalment Plan ក្នុងរយៈពេល ៣ឆ្នាំ។
ត្រូវបានស្រង់សម្ដី ដោយកាសែតបាងកកប៉ុស្ដិ៍ ប្រធានធនាគារសិកម្ម និងកិច្ចសហប្រតិបត្តិការកសិកម្ម BAAC លោក អាភីរម្យ សុខប្រាសឺត Apirom Sukprasert បាននិយាយថា វិធានការនេះ គឺត្រូវបានរៀបចំសម្រាប់អនុវត្តតែនៅរដូវរាំងស្ងួតឆ្នាំនេះ ប៉ុណ្ណោះ ព្រោះកាលៈទេសៈនេះបានធ្វើឲ្យសមត្ថភាពសងបំណុលរបស់ពលរដ្ឋ ទៅកាន់ធនាគារ គឺ កំពុងកាន់តែលំបាកលំបិន។
អត្ថបទទាក់ទង!
កាលពីឆ្នាំមុន ទីស្ដីការគណៈរដ្ឋមន្ត្រីថៃ បានអនុម័តវិធានការពីររួចមកហើយ ក្នុងការជួយដល់ កសិករ ដោយវិធានការទី១ គឺពន្យារការសងបំណុលរយៈពេល៣ឆ្នាំ សម្រាប់អ្នកខ្ចីប្រាក់ពីធនាគាររដ្ឋថៃ BAAC ចំនួនជាង ៣លាន ៨សែននាក់។
និងវិធានការទី២នោះ គឺកាត់អត្រាប្រាក់កម្ចី សម្រាប់រយៈពេល១ឆ្នាំ ទៅឲ្យកសិករខ្នាតតូច នៅចន្លោះថ្ងៃទី១ សីហា ២០១៨ ដល់ថ្ងៃទី៣១ ខែកក្កដា ឆ្នាំ២០១៩ នេះ។ ហើយ ការកាត់អត្រាកម្ចីនេះ គឺសម្រាប់តែកសិករដែលខ្ចីប្រាក់ដំបូង ចំនួន ៣០ម៉ឺនបាត ឬស្មើនឹងប្រមាណ ៩.៥០០ ដុល្លារអាមេរិក ប៉ុណ្ណោះ។ ខណៈដែលអ្នកខ្ចីលើសពី ៣០ម៉ឺនបាត គឺនឹងត្រូវបង់សងការប្រាក់ដូចធម្មតា។
អត្ថបទគួរអាន!
រដ្ឋថៃ បានឧបត្ថម្ភធនចំនួន ២,៥% នៃការប្រាក់ប្រចាំឆ្នាំរបស់កសិករ ខណៈដែលខាងធនាគារកសិកម្មដែលមានរដ្ឋនៅពីក្រោយ ក៏មានឧបត្ថម្ភធន ០,៥% ក្នុងមួយឆ្នាំផងដែរ។
របាយការណ៍ពីធនាគារកសិកម្មថៃ BAAC បានបង្ហាញថា កសិករខ្នាតតូចថៃ បានជំពាក់ប្រាក់ធនាគារសរុប មានចំនួន ៦៥០ ពាន់លានបាត ស្មើនឹងប្រមាណជាង ២០ពាន់លានដុល្លារអាមេរិក។ ក្នុងនោះ រាជរដ្ឋាភិបាលថៃ រំពឹងថា នឹងមានកសិករខ្នាតតូច ប្រមាណ ១០លាននាក់ នឹងមានសិទ្ធិទទួលបានអត្ថប្រយោជន៍ ពីវិធានការសង្គ្រោះបន្ទាន់ថ្មីរបស់រាជរដ្ឋាភិបាលនេះ។
អត្ថបទគួរឲ្យចាប់អារម្មណ៍!
មជ្ឈមណ្ឌលស្រាវជ្រាវ កសិករ កាលពីថ្មីៗនេះ បានព្យាករថា រដូវប្រាំងហួតហែងខ្លាំងនៅឆ្នាំនេះ អាចនឹងបង្ករឲ្យមានការខូចខាត គិតជាទឹប្រាក់មានរហូតដល់ជាង ១៥ ពាន់លានបាត ឬស្មើនឹងប្រមាណជិត ៥០០ លានដុល្លារអាមេរិក។ ក្នុងនោះ គ្រោះរាំងស្ងួតឆ្នាំនេះ គឺប៉ះពាល់ធំ លើការផលិតស្រូវ និងការផលិតស្ករធ្លាក់ចុះ និងអាចធ្វើឲ្យប៉ះពាល់ក្នុងតម្លៃផលិតផលក្នុងស្រុកសរុប GDPប្រមាណ ០,១%ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
