នាប៉ុន្មានឆ្នាំចុងក្រោយនេះ វិនិយោគិនជនជាតិចិន និងទេសចរជនជាតិចិនជាច្រើន បានងាកមុខព្រួញមកធ្វើការវិនិយោគ និងមកកម្សាន្ដកាន់តែច្រើនឡើងៗ នៅក្នុងតំបន់អាស៊ីអាគ្នេយ៍។ ក្នុងនោះ មិនត្រឹមតែ កម្ពុជានោះទេ ដែលទទួលរងឥទ្ធិពលពីប្រទេសចិន វៀតណាម ថៃ ម៉ាឡេស៊ី ឡាវ ជាដើម សុទ្ធតែទទួលឥទ្ធិពលពីប្រទេសចិនដូចគ្នា។
ទោះយ៉ាងណា មានប្រទេសខ្លះ មើលឃើញពីចំណុចវិជ្ជមាន ហើយក៏មានចំណុចអវិជ្ជមានផងដែរ អំពីលំហូរវិនិយោគ និងទេសចរជនជាតិចិននេះ។
អត្ថបទទាក់ទង!
ជាក់ស្ដែង ប្រទេសម៉ាឡេស៊ី ថ្មីៗនេះ បានសម្រេចផ្អាកគម្រោងវិនិយោគ ដោយប្រទេសចិនជាច្រើន ក្នុងតម្លៃរាប់ពាន់លានដុល្លារអាមេរិក ដោយសារតែខ្លាចពីរឿងបំណុលវ័ណ្ដក។ នៅកម្ពុជាយើង ឯណេះវិញ ក៏មិនសូវជាមានអ្នកសារទផុសផុល ពីរឿងការវិនិយោគរបស់ចិន ឬជនជាតិដែលមករស់នៅ និងមកកម្សាន្ដនៅកម្ពុជានោះដែរ។ នៅក្នុង បណ្ដាញសង្គម បញ្ហាជនជាតិចិនដែលមករកស៊ី និងរស់នៅកម្ពុជានេះ ត្រូវបានមតិមហាជន លើកមកជជែកយ៉ាងបែកអូរហូរស្ទឹង មិនចេះចប់ ពិសេស គឺរឿងចិននៅខេត្តព្រះសីហនុតែម្ដង។
ស្លេះរឿងចិននៅកម្ពុជាត្រឹមប៉ុណ្ណេះសិន ដោយយើងមកចាប់អារម្មណ៍នៅប្រទេសថៃឯណោះវិញ បានបើកចំហរទ្វារកាន់តែធំឡើងៗ សម្រាប់ជនជាតិចិន ទាំងវិស័យធុរកិច្ច និងទេសចរណ៍។
អត្ថបទទាក់ទង!
ថ្មីៗនេះ នាយកដ្ឋានកិច្ចការកុងស៊ុលថៃបានប្រកាសថា នឹងចាប់ផ្ដើមដាក់ឲ្យដំណើរការនូវប្រភេទ ទិដ្ឋាការអេឡិចត្រូនិក(E-Visa) លើកដំបូងរបស់ខ្លួន នៅដើមឆ្នាំក្រោយនេះ ដោយក្នុងនោះ ជនជាតិចិន នឹងត្រូវបានអនុញ្ញាតឲ្យទទួលបាន E-visa នេះដំបូងគេបង្អស់ ហើយនៅរយៈពេល ៣ឆ្នាំ រាជរដ្ឋាភិបាលថៃ ក៏គ្រោងនឹងពង្រីកសេវានេះ ទៅដល់ប្រទេសផ្សេងៗជាច្រើនទៀតផងដែរ។ នេះបើតាមការចុះផ្សាយ ពីសារព័ត៌មានក្នុងស្រុកថៃ។
តាមការបញ្ជាក់ពី នាយកដ្ឋានកិច្ចការកុងស៊ុលថៃ ការដាក់ដំណើរការនូវ E-Visa នេះនឹងចាប់ផ្ដើមឡើង នៅខែកុម្ភៈ ឆ្នាំ២០១៩។ អាជ្ញាធរថៃ បានសហការជាមួយនឹងធនាគារក្នុងស្រុក គឺ ធនាគារ កសិករ ដើម្បីគ្រប់គ្រងលើការទូទាត់ និងដំណើរការសេវាកម្មទិដ្ឋាការថ្មីនេះ។
អត្ថបទគួរឲ្យចាប់អារម្មណ៍!
តាមប្រភពព័ត៌មាន បានឲ្យដឹងថា ចាប់ពីថ្ងៃទី ១៥ ខែកុម្ភៈតទៅ ជនជាតិចិន ដែលជាអ្នកដាក់ពាក្យស្នើសុំទិដ្ឋាការនៅក្នុងទីក្រុងប៉េជីង ប្រទេសចិន មិនចាំបាច់ទៅកាន់ស្ថានទូតថៃ ដើម្បីបំពេញបែបបទ ដើម្បីស្នើសុំទិដ្ឋាការទៀតទេ។ ជនជាតិចិន អាចធ្វើការស្នើសុំតាមរយៈប្រព័ន្ធអនឡាញបាន ហើយសេវានេះ នឹងត្រូវបានពង្រីកនៅក្នុងទីក្រុងផ្សេងៗទៀត នៃប្រទេសចិន នាពេលខាងមុខ។
លោក ចាត់ទ្រី អាចចាន់ ណាណាន់ (Chatri ArchJannanun) អគ្គនាយក នៃនាយកដ្ឋានកិច្ចការកុងស៊ុលថៃ បានប្រាប់កាសែតក្នុងស្រុកថា ការជ្រើសរើសយកប្រទេសចិន ដើម្បីដាក់ដំណើរការនូវសេវា E-Visa ដំបូងគេបង្អស់នេះ ពីព្រោះតែជនជាតិចិន ត្រូវបានរកឃើញថា មានចំនួនច្រើនជាងគេ នៃចំនួនជនជាតិដទៃទៀត ដែលបានស្វែងរកការស្នើសុំ Visa ដើម្បីចូលមកក្នុងប្រទេសថៃ។
ជាមួយគ្នានេះ ជនជាតិចិន ក៏ស្ថិតនៅក្នុងលំដាប់កំពូល នៃភ្ញៀវទេសចរអន្តរជាតិ ដែលបានធ្វើដំណើរចូលទៅក្នុងប្រទេសថៃផងដែរ។
សូមជម្រាបថា បើតាមការបញ្ជាក់ពី អាជ្ញាធរថៃ ការផ្ដល់សេវា E-Visa របស់ថៃ សម្រាប់ជនបរទេសនេះ អាចនឹងត្រូវបានពង្រីកទៅកាន់ចក្រភពអង់គ្លេសនៅខែ មីនា និងបារាំង នៅខែបន្ទាប់ទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
