រាជរដ្ឋាភិបាលថៃ បង្ហាញពីផែនការ នឹងចូលរួមជាសមាជិកក្នុងកិច្ចព្រមព្រៀង វឌ្ឍនភាព និងគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក (CPTPP) ដើម្បីក្ដាប់ឱកាសនៃសក្ដានុពលលូតលាស់សេដ្ឋកិច្ច និងបង្កើននូវភាពប្រកួតប្រជែង សម្រាប់ការវិនិយោគ និងពាណិជ្ជកម្មនៅក្នុងប្រទេស។ ផែនការនេះ នឹងប្រកាសឡើងជាផ្លូវការ នៅក្នុងខែមីនាខាងមុខនេះ នាអំឡុងដំណើរទស្សនកិច្ចរបស់ឧបនាយករដ្ឋមន្ត្រីថៃ លោក Samkid Jatusripitak នៅប្រទេសជប៉ុន។ នេះបើតាមការបញ្ជាក់ឲ្យដឹងពីសារព័ត៌មានក្នុងស្រុកថៃ បាងកកប៉ុស្ដិ៍។
ថ្លែងប្រាប់សារព័ត៌មានក្នុងស្រុកថៃ លោក Somkid បានឲ្យដឹងថា នៅក្នុងដំណើរទស្សនកិច្ចប្រទេសជប៉ុន ដែលនឹងធ្វើឡើងនៅពាក់កណ្ដាលខែមីនា ខាងមុខនេះ តំណាងឲ្យរាជរដ្ឋាភិបាលថៃ លោក នឹងធ្វើការប្រកាសជាផ្លូវការ នូវផែនការ ក្នុងការដាក់ពាក្យស្នើសុំធ្វើជាសមាជិកនៃកិច្ចព្រមព្រៀង វឌ្ឍនភាព និងគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក (CP TPP) ។
អត្ថបទទាក់ទង!
លោក Somkid បានបន្ថែមទៀតថា វិនិយោគិនជប៉ុន ដែលមានមូលដ្ឋានរោងចក្រផលិតនៅប្រទេសថៃ ជាច្រើនមានការព្រួយបារម្ភ ថា ប្រទេសថៃ អាចនឹងបាត់បង់នូវភាពប្រកួតប្រជែងរបស់ខ្លួន ប្រសិនបើនៅតែពន្យាពេល ក្នុងការដាក់ពាក្យស្នើសុំធ្វើជាសមាជិកនៃកិច្ចព្រមព្រៀង CP TPP នេះ។ វិនិយោគិនជប៉ុនទាំងនោះ ក៏បារម្ភទៀតថា ប្រទេសថៃ អាចនឹងតាមមិនទាន់ដៃគូប្រជែងរបស់ខ្លួនឡើយ ពិសេសប្រទេសវៀតណាម ដែលគេចាត់ទុកថា ជាដៃគូប្រជែងធំបំផុតរបស់ថៃ ក្នុងការទាក់ទាញការវិនិយោគ។
មន្ត្រីរាជរដ្ឋាភិបាលថៃ រូបនេះ បានបញ្ជាក់ថា លោកបានទទួលការអនុញ្ញាតពីក្រសួងពាណិជ្ជកម្មរួចហើយ ដើម្បីបំពេញលក្ខខណ្ឌនានា ដើម្បីស្នើសុំភាពជាសមាជិកនៃកិច្ចព្រមព្រៀង CP TPP នេះ។
ក្រសួងពាណិជ្ជកម្មថៃ ត្រូវបានកំណត់កាលបរិច្ឆេតរួចហើយ ដែលនឹងត្រូវបញ្ចប់សំណើនេះ នៅដើមខែមីនានេះ ដើម្បីផ្ញើសំណើបន្ដ ទៅកាន់គណៈរដ្ឋមន្ត្រី សម្រាប់សម្រេចចុងក្រោយ ហើយកាលណាសំណើនេះ ត្រូវបានអនុម័ត នោះការដាក់ស្នើផ្លូវការសម្រាប់ភាពជាសមាជិកនៃកិច្ចព្រមព្រៀង CP TPP នឹងត្រូវបានធ្វើឡើងយ៉ាងពិតប្រាកដ។
កិច្ចព្រមព្រៀង CP TPPនេះ មានប្រទេសសមាជិកចំនួន ១១ រួមមាន អូស្ត្រាលី ប្រុយណេ កាណាដា ឈីលី ជប៉ុន ម៉ាឡេស៊ី ម៉ិចសិកកូ ញ៉ូស័រឡែន ប៉េរូ សាំងហ្គាពួរ និងវៀតណាម។ កិច្ចព្រមព្រៀងនេះ បានចូលជាធរមានកាលពីថ្ងៃទី ៣០ខែធ្នូឆ្នាំ២០១៨ ហើយវាក៏ត្រូវបានគេដឹងថា ជាកិច្ចព្រមព្រៀងពាណិជ្ជកម្មធំបំផុតមួយរបស់ពិភពលោកផងដែរ ដែលគ្របដណ្ដប់លើទំហំសេដ្ឋកិច្ចពិភពលោក ១៦% ជាមួយនឹងចំនួនប្រជាជន៥០០ លាននាក់។ លើសពីនេះ កិច្ចព្រមព្រៀង CP TPP នឹងរួមបញ្ជូលនូវការកាត់ចេញនូវរបាំងពន្ធគយ និងមិនមែនពន្ធគយ ក្នុងចំណោមប្រទេសជាសមាជិកទាំងអស់។
អត្ថបទគួរឲ្យចាប់អារម្មណ៍!
នាពេលថ្មីៗនេះដែរ ប្រទេសវៀតណាម ដែលជាសមាជិកក្នុងកិច្ចព្រមព្រៀង CP TPP នេះ ក៏បានបង្ហាញពីក្ដីសង្ឃឹមរំពឹងផ្លែផ្កាខ្ពស់ ក្រោយពីកិច្ចព្រមព្រៀងនេះ បានចូលជាធរមាននៅបំណាច់ឆ្នាំ២០១៨។ ក្នុងនោះដែរ វៀតណាមរំពឹងថា កិច្ចព្រមព្រៀងនេះ អាចនឹងជំរុញដល់កំណើនសេដ្ឋកិច្ចវៀតណាមរហូតដល់ជាង ២% ឯណោះ។
ក្នុងនោះ វិស័យកាត់ដេរសម្លៀកបំពាក់ និងស្បែកជើងវៀតណាម ត្រូវបានគេរំពឹងថា នឹងទទួលបានប្រយោជន៍ច្រើនជាងគេ ពីកិច្ចព្រមព្រៀង CP TPP នេះ។ ពោលគឺ វិស័យកាត់ដេរសម្លៀកបំពាក់ និងស្បែកជើង ត្រូវបានព្យាករថា នឹងមានកំណើននាំចេញចន្លោះពី ជាង ៨% ទៅជិត ១១% ដោយសារតែតម្លៃមានភាពប្រកួតប្រជែង។
បន្ថែមពីនេះ កិច្ចព្រមព្រៀង CPTPP ក៏ត្រូវបានគេរំពឹងដែរថា នឹងជួយឲ្យការនាំចេញរបស់វៀតណាម នឹងកើនឡើងប្រហែល ៤% ខណៈដែលការនាំចូលវិញអាចនឹងពង្រីកកំណើនជិតដល់ ៣,៨%ដែរ៕
ដោយឡែក សម្រាប់កម្ពុជាយើងវិញ មិនមានវត្តមាននៅក្នុងកិច្ចព្រមព្រៀងនេះ នោះទេ ប៉ុន្ដែ បើតាមរបាយការណ៍មួយ របស់ធនាគារជាតិនៃកម្ពុជា ធ្លាប់បានគូសបញ្ជាក់ផងដែរថា វត្តមានកិច្ចព្រម CP TPP នេះ គឺជាកត្តាប្រឈមមួយរបស់កម្ពុជា សម្រាប់ការប្រកួតប្រជែងជាមួយប្រទេសក្នុងតំបន់មួយចំនួន ពិសេសគឺប្រទេសជិតខាង ដែលមានភាពជាសមាជិកក្នុងកិច្ចព្រមព្រៀងនេះ តួយ៉ាងប្រទេសវៀតណាមតែម្ដង ព្រោះសមាជិកទាំងអស់នៅក្នុងកិច្ចព្រមព្រៀង CP TPP អាចមានឱកាសក្នុងការនាំចេញទំនិញ កាន់តែងាយស្រួលដោយមិនមានជាប់របាំងពន្ធគយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
