របាយការណ៍ពីក្រសួងសុខាភិបាលបានឲ្យដឹងថា គិតត្រឹមថ្ងៃទី២៣ ខែសីហា អ្នកឆ្លងថ្មីមានចំនួន ៤១០នាក់ និងអ្នកស្លាប់មានចំនួន ១៦នាក់ ដែលចំនួនអ្នកឆ្លងថ្មីនេះ គឺមានការថមថយចុះបន្តិចហើយ ខណៈដែលការចាក់វ៉ាក់សាំងវិញ កម្ពុជាឈរលេខរៀងទី២ក្នុងតំបន់អាស៊ានដែលបានចាក់វ៉ាក់សាំងជូនប្រជាពលរដ្ឋច្រើនជាងគេផងដែរ ពោលគឺសម្រេចបានជាង៨៧%ហើយនៃផែនការចាក់ឲ្យបាន១០លាននាក់។
ទោះជាយ៉ាងណាក្ដី គេសង្កេតឃើញថា បញ្ហាឆ្លងរីករាលដាលនៃមេរោគបំប្លែងថ្មី ឌែលតា នៅតែបន្ដរកឃើញនៅកម្ពុជាទាំងករណីនាំចូលនឹងឆ្លងក្នុងសហគមន៍ ហើយវាក៏ជាក្ដីបារម្ភធំសម្រាប់កម្ពុជាផងដែរ។ ជាក់ស្ដែង តួលេខពីក្រសួងសុខាភិបាល នៅត្រឹមថ្ងៃទី ២១ ខែសីហា កម្ពុជារកឃើញអ្នកឆ្លងមេរោគបំប្លែងថ្មីឌែលតាចំនួន៩៩៩នាក់ហើយ ដែលមានរកឃើញនៅរាជធានី-ខេត្តចំនួន២៣នៅទូទាំងប្រទេស។
ដោយគិតត្រឹមថ្ងៃទី២៣ ខែសីហា ករណីឆ្លងសរុបនៅកម្ពុជាកើនឡើងជិត៩ម៉ឺនករណី និងករណីស្លាប់សរុបប្រមាណជិត ១ពាន់ ៨រយនាក់។
អត្ថបទគួរអាន
សូមបញ្ជាក់ថា យោងតាមលទ្ធផលនៃការវិភាគដោយវិទ្យាស្ថានប៉ាស្ទ័រកម្ពុជាតាំងពីថ្ងៃទី៣១ ខែមីនា ឆ្នាំ២០២១ រហូតមកដល់ថ្ងៃទី២១ ខែសីហា បានរកឃើញករណីឆ្លងមេរោគបំប្លែងថ្មីឌែលតាក្នុងប្រទេសសរុបចំនួន ៩៩៩ករណី ទាំងលើអ្នកដំណើរមកពីបរទេសតាមជើងហោះ ពលករខ្មែរត្រឡប់ពីប្រទេសថៃ ពីវៀតណាម និងប្រជាជនក្នុងសហគមន៍។
គួរកត់សម្គាល់ដែរថា រាជធានី-ខេត្តចំនួន ៤ ដែលត្រូវបានរកឃើញករណីឆ្លងមេរោគឌែលតាច្រើនជាងគេ ក្នុងនោះភូមិសាស្រ្តរាជធានីភ្នំពេញមានករណីឆ្លងឌែលតារហូតដល់ ២៣៨ករណី បន្ទាប់មកឧត្តរមានជ័យ ១៧៦ករណី, បន្ទាយមានជ័យ ១៤៦ករណី, សៀមរាប ១៣៨ករណី និងបណ្ដាខេត្តផ្សេងៗទៀត លើកលែងតែ២ខេត្តប៉ុណ្ណោះ គឺខេត្តកែប និង ខេត្តក្រចេះ។ នេះបើយោងតាមសេចក្ដីជូនព័ត៌មានរបស់ក្រសួងសុខាភិបាល។
ស្របពេលករណីឆ្លងកូវីដ១៩នៅកម្ពុជាមានការថយចុះ កម្ពុជាបាន និងកំពុងពង្រីកវិសាលភាពចាក់វ៉ាក់សាំងកាន់តែធំទៅៗ ពោលកម្ពុជាឈរលេខរៀងទី២ក្នុងតំបន់អាស៊ានដែលបានចាក់វ៉ាក់សាំងជូនប្រជាពលរដ្ឋច្រើនជាងគេ។ បើគិតត្រឹមថ្ងៃទី២២ ខែសីហា អ្នកចាក់វ៉ាក់សាំងក្របខណ្ឌទូទាំងប្រទេស ចំពោះដូសទី១មានចំនួនជិត ៩លាន ៨សែននាក់ ដោយឡែកដូសទី២មានប្រមាណ ៧លាន ៨សែននាក់ និងដូសជំរុញឬដូសទី៣មានជាង ៤សែន ៨ម៉ឺននាក់។
ស្របពេលថ្មីៗនេះ ក្រសួងប្រៃសណីយ៍នឹងគ្រោងលក់ឧបករណ៍តេស្ដរកកូវីដ-១៩ជូនពលរដ្ឋទូទៅសម្រាប់លក្ខណៈគ្រួសារ ដើម្បីអាចប្រើប្រាស់និងអាចទប់ស្កាត់ការឆ្លងបានទាន់ពេលវេលា ដែលនឹងរួមចំណែកកាត់បន្ថយការឆ្លងនៅកម្ពុជាផងដែរ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
