បច្ចុប្បន្ន គម្រោងវិនិយោគអគារ The Peak កំពុងតែសាងសង់យ៉ាងមមាញឹក វិនិយោគដោយក្រុមហ៊ុន វើលប្រ៊ីដ ឡែនដ៍ (WorldBridge Land) ដែលបានសហការជាមួយនឹងក្រុមហ៊ុនមកពីសិង្ហបុរី Oxley Holdings ដែលជាគម្រោងដ៏ធំ និងខ្ពស់ជាងគេបង្អស់មួយ របស់លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន Worldbridge Group ផងដែរ។ អគារ The Peak មានទីតាំងស្ថិតនៅមិនឆ្ងាយពីអគារភ្លោះ The Bridge នោះទេ។
លោកស្រី ជិន ចាន់ឡែន នាយិកាក្រុមហ៊ុន FURI រៀល អេស្ទេត បានគូសបញ្ជាក់ថា ហេតុផលដែលធ្វើឲ្យក្រុមហ៊ុន FURI សម្រេចទិញអគារការិយាល័យ The Peak គឺដោយសារតែមើលឃើញពីឱកាសវិនិយោគ និងភាពទាក់ទាញនៃអគារនេះដែលមានស្តង់ដារលក្ខណៈអន្តរជាតិ បណ្តុំទៅដោយផ្សារទំនើប សណ្ឋាគារលំដាប់ផ្កាយប្រាំ ខុនដូ និងកន្លែងកម្សាន្តផ្សេងៗទៀត។
យ៉ាងណាក្រុមហ៊ុន FURI មិនបានប្រាប់ពីតម្លៃទឹកប្រាក់វិនិយោគទិញអគារការិយាល័យ The Peak នោះឡើយ ពោលគឺគ្រាន់តែប្រាប់ថា ចំណែកនៃអគារ The Peak ដែលក្រុមហ៊ុនទិញ មានចំនួន ២៥០យូនីត និងតម្លៃលក់ចេញក្នុងមួយយូនីត ថ្លៃចាប់ពី២០ម៉ឺនដុល្លារឡើងទៅ អាស្រ័យលើទំហំ និងទីតាំង។
តើអ្នកបានអានអត្ថបទនេះ ឬនៅ?
លោកស្រី ជិន ចាន់ឡែន បន្ថែមថា តាមពិត អគារការិយាល័យនេះគិតមកដល់ពេលនេះ លក់អស់ ៩០% ហើយ ពោលគឺសល់តែ ២០យូនីត ចុងក្រោយប៉ុណ្ណោះ ដែលប្រកាសលក់នៅថ្ងៃនេះ។ ភាគច្រើននៃអតិថិជនដែលបានទិញ មានទាំងខ្មែរ និងបរទេស ពិសេសគឺជនជាតិចិនតែម្តង។
The Peak បានបោះទុនវិនិយោគទឹកប្រាក់ចំនួន ៥៨០លានដុល្លារអាមេរិក មានកម្ពស់ ៥៥ជាន់ ដែលក្នុងនោះ មានខុនដូ ផ្សារទំនើប កន្លែងការិយាល័យកម្រិត A មាន ៣៥ជាន់ និង ២០ជាន់ សរុបមានជាង ១ពាន់យូនីត នឹងចាប់ផ្តើមសាងសង់នៅអំឡុងចុងឆ្នាំ២០១៥។ នៅខាងលើ នឹងត្រូវរៀបចំសម្រាប់សណ្ឋាគារលំដាប់ផ្កាយ ៥ ឈ្មោះថា Shangri-La ជាសណ្ឋាគារដ៏ល្បីល្បាញនៅលើពិភពលោក ដែលមកពីទីក្រុងហុងកុង។
អគារនេះស្ថិតនៅក្នុងសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។ អគារ The Peak គ្រោងនឹងបញ្ចប់ការសាងសង់រួចរាល់នៅក្នុងឆ្នាំ២០២០ ខាងមុខនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
