ការស្រាវជ្រាវរកប្រភពដើមកូវីដ-១៩លើកនេះ ប្រហែលជាលើកចុងក្រោយហើយ

អង្គការសុខភាពពិភពលោកនៅថ្ងៃពុធទី១៣តុលា បានស្នើបង្កើតឡើងនូវក្រុមប្រឹក្សាអ្នកវិទ្យាសាស្ត្រផ្នែកជំងឺឆ្លងថ្មីមួយក្រុម ជាមួយនឹងសមាជិកសរុប ២៦នាក់ សម្រាប់ការស្រាវជ្រាវរកប្រភពដើមកូវីដ ១៩ ក្នុងលើកទី២នេះ។ ក្នុងចំណោមសមាជិកទាំងនោះ រួមមាន អ្នកវិទ្យាសាស្ត្រសំខាន់ៗ មកពីលោកខាងលិច រួមជាមួយនឹង អ្នកវិទ្យាសាស្ត្រចិនដែលធ្លាប់បានចូលរួមក្នុងការស្រាវជ្រាវរកប្រភពដើមកូវីដ១៩ លើកដំបូង នៅក្រុងវូហានប្រទេសចិនកាលពីដើមឆ្នាំ២០២១។

លោកស្រី ម៉ារីយ៉ា វ៉ាន់ គឺកហូវ (Maria van Kerkhove) អ្នកដឹកនាំផ្នែកបច្ចេកទេសវិទ្យាសាស្ត្រកូវីដ១៩ របស់ WHO បានបង្ហាញក្តីសង្ឃឹមថា ការស្រាវជ្រាវលើកនេះនឹងត្រូវដឹកនាំដោយអង្គការសុខភាពពិភពលោក ព្រមទាំងមានការចូលរួមសហការពីបណ្តាប្រទេសទាំងអស់ដែលពាក់ព័ន្ធផងដែរ។

លោកស្រីបានគូសបញ្ជាក់ថា ការសិក្សាស្រាវជ្រាវបីដំណាក់កាលទៀត ត្រូវតែធ្វើជាចាំបាច់ ដើម្បីរកឲ្យឃើញថា តើកូវីដ១៩ បានឆ្លងពីសត្វមកមនុស្សបានដោយរបៀបណា? លោកស្រី គឺកហូវ សង្កត់ធ្ងន់ថា ទិន្នន័យអ្នកឆ្លង និង ករណីសង្ស័យដំបូងនៅលើប្រជាជនក្រុងវូហានកាលពីខែធ្នូឆ្នាំ២០១៩ គឺត្រូវការជាចាំបាច់ ខណៈដែល មន្ទីរពិសោធនៅក្បែរតំបន់ នៃការផ្ទុះឆ្លងដំបូង ក៏ត្រូវបានចាត់ទុកជាគោលដៅស្រាវជ្រាវផងដែរ។

ដោយឡែក លោក ម៉ែក រ៉ាយអិន មន្ត្រីជាន់ខ្ពស់ WHO មួយរូបទៀតបាននិយាយថា កិច្ចខិតខំប្រឹងប្រែងលើកនេះ ទំនងជាលើកចុងក្រោយហើយ ក្នុងការស្វែងរកប្រភពដើម កូរ៉ណា ឬ កូវីដ១៩។

សូមរំឭកថា ការស្រាវជ្រាវលើកទី១ នៅដើមឆ្នាំ២០២១ បានចំណាយពេលអស់តែ ៤សប្តាហ៍ប៉ុណ្ណោះ ក្នុងការចុះទៅស្រាវជ្រាវនៅក្រុងវូហានដោយផ្ទាល់ និងដឹកនាំដោយអ្នកវិទ្យាសាស្ត្រចិន ហើយបានប្រកាសលទ្ធផលស្រាវជ្រាវកាលពីខែមីនា ត្រូវបានគេជឿជាក់ជាងគេបំផុតមួយនោះគឺ រីវុសកូរ៉ូណាឆ្លងពីសត្វប្រជៀវ រួចឆ្លងមកសត្វមួយប្រភេទទៀត មុននឹងឆ្លងមកមនុស្សលោក។ យ៉ាងណាមិញ ភាគីចិនជារឿយៗបានច្រានចោលទាំងស្រុងនូវសេណារីយ៉ូដែលថា រីរុសកូរ៉ូណាលេចធ្លាយចេញពីមន្ទីរពិសោធនៅក្រុងវូហាន៕