អត្ថបទទាក់ទង
អ្នកនាំពាក្យសាលាដំបូងរាជធានីភ្នំពេញ បាននិយាយនៅក្នុងសេចក្ដីប្រកាសព័ត៌មាន នៅថ្ងៃចន្ទ ទី៩ ខែធ្នូនេះ យ៉ាងដូច្នេះថា «ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ ដែលទទួលបន្ទុកចាត់ការលើសំណុំរឿងព្រហ្មទណ្ឌលេខ ៤៧៧៧ ចុះថ្ងៃទី០៣ ខែធ្នូ ឆ្នាំ២០១៩ ដែលមានជនជាប់ចោទឈ្មោះ កឹម សុខា ភេទប្រុស សញ្ជាតិខ្មែរ កើតថ្ងៃទី២៧ ខែមិថុនា ឆ្នាំ១៩៥៣ ជាប់ចោទពីបទ សន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ បានសម្រេចកំណត់ដាក់កាលបរិច្ឆេទ ជំនុំជម្រះលើសំណុំរឿងនេះ នៅថ្ងៃទី១៥ ខែមករា ឆ្នាំ២០២០ វេលាម៉ោង០៨ និង៣០នាទីព្រឹក នៅសាលសវនាការទី១ នៃសាលាដំបូងរាជធានីភ្នំពេញ។»
នេះជាការប្រកាសលើកទីមួយហើយ ចាប់តាំងពីមានការចាប់ខ្លួនរបស់លោក កឹម សុខា ពីបទក្បត់ជាតិ ដែលមានរយៈពេលជាង២ឆ្នាំមកហើយ ខណៈដែលសហគមន៍អឺរ៉ុបបានចាប់ផ្តើមដំណើរការនីតិវិធីផ្អាកជាបណ្តោះអាសន្ន នូវកម្មវិធីអនុគ្រោះពន្ធ EBA បន្ទាប់ពីមានការព្រួយបារម្ភអំពីលទ្ធិប្រជាធិបតេយ្យនិងសិទ្ធិមនុស្សនៅកម្ពុជា។
កាលពីខែវិច្ឆិកា កន្លងមកនេះ គណៈកម្មការអឺរ៉ុបបានបញ្ចប់នូវរបាយការណ៍បឋមស៊ើបអង្កេតរបស់ខ្លួនអំពីប្រព័ន្ធអនុគ្រោះពន្ធសម្រាប់កម្ពុជា និងទុកពេលឲ្យកម្ពុជា ០១ខែ ដើម្បីឆ្លើយតប មុនថា សម្រេចដក EBA ឬអត់ ពីកម្ពុជា នៅខែកុម្ភៈឆ្នាំក្រោយ៕
