លោកមេធាវី សេក សោភ័ណ្ឌ ដែលការពារក្តីឲ្យអ្នកសារព័ត៌មានទាំងពីររូបនេះ បាននិយាយថា តុលាការបានពន្យារពេលសវនាការហើយ ប៉ុន្តែ មិនបានដាក់ថ្ងៃថ្មី ថាកាត់ក្ដីនៅពេលណានោះទេ។
កាលពីថ្ងៃទី១៣ ខែធ្នូ សាលាដំបូងខេត្តរតនគិរី បានកំណត់ថ្ងៃទី២៥ ខែធ្នូ ជាថ្ងៃជំនុំជម្រះក្ដី លើរូបលោក អូន ភាព អាយុ ៥៥ ឆ្នាំ និង លោក Zsombor Peter អាយុ ៤១ ឆ្នាំ។ បច្ចុប្បន្ន អ្នកទាំងពីរនេះ មិនរស់នៅក្នុងប្រទេសកម្ពុជានោះទេ បន្ទាប់ពីមានការភ័យខ្លាចពីការចាប់ខ្លួន។
សាលាដំបូងខេត្តរតនគិរី បានចោទប្រកាន់លោក អូន ភាព និងលោក Zsombor Peter ពីបទញុះញង់ឲ្យប្រព្រឹត្តបទឧក្រិដ្ឋ នៅថ្ងៃទី២៨ ខែសីហា ឆ្នាំ២០១៧ ហើយប្រសិនជារកឃើញថាមានទោស ពួកគេប្រឈមមុខជាប់ពន្ធនាគាររយៈពេល២ឆ្នាំ។
អត្ថបទទាក់ទង
អង្គការឃ្លាំមើលសិទិ្ធមនុស្ស បានអំពាវនាវឱ្យអាជ្ញាធរកម្ពុជា ទម្លាក់ចោលការចោទប្រកាន់ប្រឆាំងនឹងលោក អូន ភាព និង លោក Zsombor Peter។
លោក Phil Robertson បាននិយាយដូច្នេះថា «ការធ្វើទុក្ខបុកម្នេញលើអ្នកកាសែតនៅកម្ពុជាកំពុងផ្ញើសារថា ការរាយការណ៍ព័ត៌មានបែបស៊ើបអង្កេតឯករាជ្យ មិនត្រឹមតែមិនត្រូវបានស្វាគមន៍ប៉ុណ្ណោះទេ ប៉ុន្តែ អាចធ្វើឱ្យអ្នកជាប់គុកផងដែរ។“
លោក Phil Robertson បាននិយាយបន្តថា ”សហគមន៍អឺរ៉ុប និងរដ្ឋាភិបាលបរទេសដទៃទៀត គួរតែអំពាវនាវជាសាធារណៈចំពោះការចោទប្រកាន់ទាំងនេះ ហើយត្រូវជំរុញឱ្យរដ្ឋាភិបាលអនុញ្ញាតឱ្យអ្នកសារព័ត៌មានធ្វើការងាររបស់ពួកគេដោយគ្មានការយាយី៕”
