ករណីវិជ្ជមានវីរុស កូវីដ១៩ ០២ករណីថ្មីនេះ ត្រូវបានរកឃើញលើបុរសជនជាតិកាណាដា អាយុ ៤៩ឆ្នាំ និងបុរសជនជាតិប៊ែលហ្សិក អាយុ ៣៣ឆ្នាំ ដោយលទ្ធផលតេស្តរកឃើញនៅវេលាម៉ោង ៤រសៀល ថ្ងៃទី១៣ មីនា ២០២០នេះ។
ប្រកាសព័ត៌មានរបស់ក្រសួងសុខាភិបាលដដែល ឲ្យដឹងថា បុរសវិជ្ជមានវីរុស កូវីដ១៩ ទាំងពីរនាក់នេះ ត្រូវបានយកមកដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ហើយក្រុមការងារក្រសួង កំពុងសកម្មក្នុងការតាមស្រាវជ្រាវរកអ្នកដែលប៉ះពាល់ផ្ទាល់ ឬប្រយោលជាមួយបុរសជនជាតិកាណាដា និងជនជាតិប៊ែលហ្សិក ទាំងពីរនាក់នេះ។
អត្ថបទទាក់ទង
គិតត្រឹមថ្ងៃទី១៣ មីនា ២០២០នេះ កម្ពុជាបានរាយការណ៍ករណីវិជ្ជមាន វីរុសកូវីដ១៩ ចំនួនសរុប ៧ករណីហើយ ដោយក្នុង ៧ករណីនេះ មានឆ្លងទៅលើជនជាតិខ្មែរ ០១នាក់ និងក្រៅពីនេះ គឺលើជនបរទេសទាំងអស់។
ករណីវិជ្ជមានវីរុស កូវីដ១៩ លើកដំបូងបង្អស់ កើតលើជនជាតិចិន អាយុ ៦០ឆ្នាំ នៅខេត្តព្រះសីហនុ ប៉ុន្តែ ក្រោយមក បានព្យាបាលជាសះស្បើយនិងវិលត្រឡប់ទៅប្រទេសចិនវិញហើយ។ ករណីទី២ កើតលើបុរសជនជាតិខ្មែរ អាយុ ៣៨ឆ្នាំ នៅខេត្តសៀមរាប, ករណីទី៣ ទី៤ និងទី៥ លើជនជាតិអង់គ្លេស ដែលស្ថិតនៅលើនាវាទេសចរណ៍ Viking Cruise ដែលធ្វើដំណើរមកពីវៀតណាម ចូលមកចតនៅលើទន្លេមេគង្គនៃខេត្តកំពង់ចាម និងករណីទី៦ និងទី៧ គឺលើបុរសជនជាតិកាណាដា និងប៊ែលហ្សិក ដែលប្រកាសរកឃើញនៅថ្ងៃ១៣ មីនា ២០២០នេះ៕
