របាយការណ៍ក្រសួងពាណិជ្ជកម្ម និងក្រសួងដឹកជញ្ជូនវៀតណាម ឲ្យដឹងថា ក្រុមហ៊ុនបម្រើសេវាតាក់ស៊ីអនឡាញទាំងពីរ Uber និង Grab មិនត្រូវបានគ្រប់គ្រងដោយច្បាប់តែមួយដូចគ្នានឹងអ្នកផ្ដល់សេវាដឹកជញ្ជូន ដូចជា ក្រុមហ៊ុនតាក់ស៊ីនៅក្នុងស្រុក ទេ។
ក្រសួងទាំងពីរ ចង់ឲ្យមានការកែប្រែក្របខ័ណ្ឌច្បាប់ ដើម្បីធានាការប្រកួតប្រជែងដោយត្រឹមត្រូវ។ នេះបើតាមការចុះផ្សាយរបស់សារព័ត៌មានក្នុងស្រុករបស់វៀតណាម។
បច្ចុប្បន្ន ក្រុមហ៊ុនតាក់ស៊ីអនឡាញ Uber មកពីអាមេរិក និង Grab ដែលមានមូលដ្ឋាននៅសិង្ហបុរី បាននិងកំពុងប្រតិបត្តិការនៅក្នុងប្រទេសវៀតណាម ជាផ្នែកមួយនៃគម្រោងសាកល្បង ដែលអនុញ្ញាតឲ្យមានកម្មវិធីទូរស័ព្ទដៃបម្រើសេវាតាក់ស៊ីអនឡាញចំនួន១០ រួមទាំងកម្មវិធីដែលបង្កើតនិងដាក់ឲ្យប្រើដោយក្រុមហ៊ុនតាក់ស៊ីក្នុងស្រុក Vinasun និង Mai Linh ផងដែរ មិនស្ថិតក្រោមការទទួលខុសត្រូវចំពោះសុវត្ថិភាពចរាចរណ៍ និងអ្នកដំណើរ។
តើអ្នកបានអានអត្ថបទនេះ ឬនៅ?
មួយរយៈចុងក្រោយនេះ ហាក់មានការតវ៉ាជាច្រើនពីសំណាក់ក្រុមហ៊ុនតាក់ស៊ីក្នុងស្រុកនៅប្រទេសវៀតណាម ប្រឆាំងទៅនឹងក្រុមហ៊ុន Uber និង Grab ដោយពួកគេត្អូញត្អែរថា "ឆ្នាំងបាយ"របស់ពួកគេកំពុងត្រូវបានគេដណ្ដើម។
ប៉ុន្តែ ទោះយ៉ាងនេះក្ដី ក្រសួងដឹកជញ្ជូនវៀតណាមនិយាយថា ការបញ្ឈប់ប្រតិបត្តិការរបស់ Uber និង Grab ទាំងស្រុង គឺមិនអាចធ្វើបានទេ ប៉ុន្តែថា រដ្ឋាភិបាលគួរតឹងតែងក្នុងការផ្ដល់អាជ្ញាប័ណ្ណដល់ក្រុមហ៊ុនតាក់ស៊ីដែលបម្រើសេវាដោយប្រើកម្មវិធីទូរស័ព្ទដៃ។
សព្វថ្ងៃ នៅក្នុងទីក្រុងហាណូយ និងទីក្រុងហូជីមិញ ក្រុមហ៊ុន Uber និង Grab មានរថយន្តតាក់ស៊ីចុះបញ្ជីជាង ៥ម៉ឺនគ្រឿងទៅហើយ។
តើអ្នកបានអានអត្ថបទនេះឬនៅ?
កាលពីខែកញ្ញា នាយកដ្ឋានពន្ធដារទីក្រុងហូជីមិញ បានទាមទារឲ្យ Uber បង់ពន្ធដែលជំពាក់ជាង ៤សែន ៦ម៉ឺនដុល្លារអាមេរិក។
កន្លងមក ក្រុមហ៊ុនតាក់ស៊ីក្នុងស្រុកនៅវៀតណាម តែងតែចោទប្រកាន់ថា ក្រុមហ៊ុន Uber និង Grab ប្រកួតប្រជែងមិនស្មើភាពគ្នា ឬមិនយុត្តិធម៌ជាមួយពួកគេ ដែលនាំឲ្យពួកគេមានការខាតបង់ក្នុងរបររកស៊ី។ ប៉ុន្តែ ទាំង Uber និង Grab បានបដិសេធជារឿយៗថា ខ្លួនមិនបានរំលោភច្បាប់ណាមួយរបស់ប្រទេសវៀតណាមទេ។
ក្នុងឆ្នាំនេះ ក្រុមហ៊ុនតាក់ស៊ីធំជាងគេបំផុតនៅវៀតណាម គឺ Vinasun បានបាត់បង់បុគ្គលិក ១ម៉ឺននាក់ ហើយចំណូល៩ខែរបស់ខ្លួន បានតែ ៥៨% ប៉ុណ្ណោះនៃទិសដៅប្រចាំឆ្នាំរបស់ក្រុមហ៊ុន ខណៈដែលក្រុមហ៊ុនដៃគូប្រជែង ឈ្មោះ Mai Linh បានបាត់បង់បុគ្គលិក ៦ពាន់នាក់ ស្មើនឹង ២០% នៃបុគ្គលិកទាំងអស់របស់ខ្លួន៕
