លោក Rohit Mahajan អនុប្រធានផ្នែកទំនាក់ទំនងរបស់វិទ្យុ អាស៊ីសេរី បាននិយាយនៅក្នុងសេចក្តីថ្លែងការណ៍ដូច្នេះថា ៖ «អតីតអ្នកយកព័ត៌មានវិទ្យុអាស៊ីសេរី លោក អ៊ួន ឈិន និងលោក យៀង សុធារិន បានរងទុក្ខរួចហើយ ក្នុងរយៈពេលជាប់ពន្ធនាគារ ៩ខែ ហើយឥឡូវ ប្រឈមនឹងការចោទប្រកាន់គ្មានមូលដ្ឋានទៀត ដែលមិនគួរត្រូវបានចោទតាំងពីដំបូង។»
លោក Rohit Mahajan បានបន្តថា ៖ «តុលាការក្រុងភ្នំពេញអាចកែសម្រួលស្ថានភាពដែលមិនចាំបាច់និងជាបញ្ហានេះ ដោយច្រានចោលករណីនិងការចោទប្រកាន់ទាំងអស់ ប្រឆាំងនឹងពួកគាត់ដោយមិនបង្អង់យូរ។»
លោក អ៊ួន ឈិន បានសំណូមឲ្យតុលាការទម្លាក់ការចោទប្រកាន់ទាំងអស់ ដើម្បីឲ្យពួកគាត់អាចរកការងារជាអ្នកសារព័ត៌មានឡើងវិញបាន។
លោក អ៊ួន ឈិន បាននិយាយដូច្នេះថា ៖ «ជាសំណូមពរ គឺជាធម្មតាទេ គឺពួកយើងចង់មានសេរីភាពពេញលេញ ផុតពីការចោទប្រកាន់អីទាំងអស់ ដើម្បីយើងប្រកបការងារធ្វើការ ជាពិសេស គឺអាចមានលទ្ធភាពបំពេញវិជ្ជាជីវៈជាអ្នកសារព័ត៌មានហ្នឹងឡើងវិញ។»
អត្ថបទទាក់ទង
លោក អ៊ួន ឈិន បានបន្តថា ៖ «សេរីភាពពេញលេញ ចង់មានន័យថា យើងអាចចេញធ្វើអីប្រកបការងារអីដោយពេញមុខពេញមាត់ កុំឲ្យគេទើសទាល់ក្នុងការទទួលពួកយើងធ្វើការ ធ្វើងារ។»
លោក យាង សុធារិន និងលោក អ៊ួន ឈិន ត្រូវបានគេចាប់ខ្លួនកាលពីខែវិច្ឆិកា ឆ្នាំ២០១៧ និងចោទពីបទផ្តល់ព័ត៌មាន ដែលបំផ្លិចបំផ្លាញដល់ការការពារជាតិទៅក្រៅប្រទេស និងពីបទផលិតរូបអាសអាភាស។ ពួកគាត់ទាំងពីរនាក់ បានបដិសេធការចោទប្រកាន់ទាំងអស់នេះ។
អ្នកទាំងពីរត្រូវបានគេដោះលែងឲ្យនៅក្រៅឃុំបណ្តោះអាសន្ន នៅខែសីហា ឆ្នាំ២០១៨ ក៏ប៉ុន្តែការចោទប្រកាន់ផ្លូវតុលាការ នៅដដែល។
វិទ្យុ អាស៊ីសេរី ដែលរដ្ឋាភិបាលតែងតែចោទថា មានភាពលម្អៀងទៅរកគណបក្សប្រឆាំងនោះ បានបិទការិយាល័យរបស់ខ្លួននៅភ្នំពេញ កាលពីខែកញ្ញា ឆ្នាំ២០១៧។
អ្នកនាំពាក្យតុលាការក្រុងភ្នំពេញមិនបានឆ្លើយតបនឹងសំណួរអ្នកសារព័ត៌មានដើម្បីសុំប្រតិកម្មនោះទេ នៅថ្ងៃពុធ ទី២៤ ខែកក្កដានេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
