ការធ្វើសង្គ្រាមពាណិជ្ជកម្មរវាង រដ្ឋាភិបាលនៃប្រទេសទាំងពីរ បានអូសបន្លាយពេលជាង ១៦ខែទៅហើយ ដោយក្នុងនោះ ការនាំចេញផលិតផលរបស់ចិន ទៅកាន់ អាមេរិក ដែលត្រូវរងសម្ពាធពន្ធ បានធ្លាក់ចុះមកនៅត្រឹម ៩៥ពាន់លានដុល្លារអាមេរិក ក្នុងពាក់កណ្តាលឆ្នាំ ២០១៩នេះ គឺមានការធ្លាក់ចុះខ្លាំង ដែលកាលពីពាក់កណ្តាល ឆ្នាំ២០១៨ មានរហូតដល់ទៅ ១៣០ពាន់លានដុល្លារអាមេរិក។
លោក អាឡេស សានដ្រូ នី ស៊ីតា សេដ្ឋកិច្ចវិទូមកពី អង្គការសហប្រជាជាតិ បានអះអាងថា ការខាតបង់របស់អ្នកនាំចេញចិន នឹងបន្តរីកកាន់តែធំ ដោយសារតែសម្ពាធពន្ធ ហើយគ្រឿងម៉ាស៊ីនក្នុងការិយាល័យ និងឧបករណ៍ទំនាក់ទំនង ធ្លាក់ចុះខ្លាំងជាងគេរហូតដល់ទៅ ១៥ពាន់លានដុល្លារអាមេរិក។
អត្ថបទទាក់ទង!
របាយការណ៍ដដែល បានបញ្ជាក់ថា តៃវ៉ាន់ ទទួលផលចំណេញច្រើនជាងគេ ក្នុងរយៈពេល ៦ខែ ដើមឆ្នាំនេះ ដោយបាននាំចេញគ្រឿងម៉ាស៊ីនក្នុងការិយាល័យ និងឧបករណ៍ទំនាក់ទំនង ដែលមានតម្លៃជាង ៤,២ ពាន់លានដុល្លារអាមេរិក ទៅកាន់ សហរដ្ឋអាមេរិក ដើម្បីបំពេញចន្លោះប្រយោង ដែលចិនមិនបាននាំចេញ។
លោក អាឡេស សានដ្រូ ក៏បានព្រមានដែរថា បើសិនជា សង្គ្រាមនេះ នៅតែអូសបន្លាយពេលយូរទៀតនោះ ឱកាសនៃការខាតបង់ជាអចិន្រ្តៃយ៍ នឹងបន្តកើនឡើង។
កាលពីពេលថ្មីៗនេះ តាមការអះអាងពី នាយកគ្រប់គ្រងមូលនិធិរូបិយវត្ថុអន្តរជាតិ IMF ក៏បានបញ្ជាក់ដែរថា សង្គ្រាមពាណិជ្ជកម្មអាមេរិក និងចិន អាចនឹងធ្វើឲ្យខាតបង់ដល់សេដ្ឋកិច្ចសកលប្រមាណ ៧០០ពាន់លានដុល្លារអាមេរិក ឬស្មើនឹងប្រមាណ ០,៨ភាគរយនៃ GDP របស់ពិភពលោក នៅឆ្នាំ ២០២០ខាងមុខ ដោយសារតែ អត្រាកំណើនសេដ្ឋកិច្ចសកល ធ្លាក់ចុះដល់កម្រិតទាបបំផុតមិនធ្លាប់មាន។
សេដ្ឋកិច្ចសកល កំពុងតែជួបបញ្ហាប្រេះឆា ដែលនឹងនាំមកនូវ ការប្រែប្រួលដ៏ប្លែកសម្រាប់អ្នកជំនាន់ក្រោយ ជាពិសេស សេដ្ឋកិច្ចសកល គឺដើរយឺតជាលក្ខណៈប្រព័ន្ធ ពាក់ព័ន្ធគ្នារវាងប្រទេសជាច្រើន ហើយក្នុងឆ្នាំ ២០១៩នេះ សឹងតែ ៩០% នៃសេដ្ឋកិច្ចសកល កំពុងជួបនឹងកំណើនដ៏យឺតជាងមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
