ការកើនឡើងនៃអត្រាកម្ចីទិញលំនៅដ្ឋាននៅអាមេរិក កំពុងបន្ថែមបន្ទុកទៅលើវិស័យលំនៅដ្ឋាន ដែលមានអត្រាការប្រាក់ខ្ពស់រួចទៅហើយនោះ ខណៈដែលធនាគារកណ្ដាលបានជំរុញឲ្យមានការបង្កើនការចំណាយខ្ពស់ថែមទៀត ចំពោះការទទួលបានប្រាក់កម្ចីពីធនាគារ សម្ដៅដល់ការទប់ទល់នឹងការកើនឡើងខ្ពស់នៃអតិផរណា។ ជាក់ស្ដែង ធនាគារកណ្ដាលអាមេរិក បានដំឡើងអត្រាការប្រាក់គោល ២,២៥% បើគិតតាំងពីខែមីនាមក។
កិច្ចសន្យាជាមធ្យមនៅលើអត្រាកម្ចីទិញផ្ទះ ក្នុងអត្រាថេររយៈពេល ៣០ឆ្នាំមកនេះ បានកើនឡើង ០,០៧%បន្ថែមទៀត នាំឲ្យអត្រាការប្រាក់កម្ចីទិញផ្ទះ បានកើនដល់ ៦,០១% ក្នុងមួយឆ្នាំ បើគិតត្រឹមថ្ងៃទី ៩ខែកញ្ញាកន្លងទៅ ដោយអត្រាការប្រាក់កើនឡើងនេះ គឺជាអត្រាមួយដែលមិនធ្លាប់បានឃើញឡើយ គិតចាប់តាំងពីការបញ្ចប់នូវវិបត្តិហិរញ្ញវត្ថុសកល និងការដួលរលំទីផ្សារលំនៅដ្ឋានកាលពីអំឡុងឆ្នាំ២០០៧-២០០៩មក។
អត្ថបទគួរអាន
ការមើលឃើញពីអត្រាអតិផរណាដ៏អាក្រក់ជាងការរំពឹងទុករបស់សហរដ្ឋអាមេរិក ដែលបានបង្ហាញតួលេខឡើងកាលពីដើមសប្ដាហ៍នេះ បានធ្វើឲ្យគេជឿជាក់ថា ធនាគារកណ្ដាលអាមេរិក នៅកិច្ចប្រជុំគោលនយោបាយហិរញ្ញវត្ថុនៅសប្ដាហ៍ក្រោយនេះ នឹងត្រូវបង្ខំចិត្តដំឡើងអត្រាការប្រាក់ ០,៧៥% បន្ថែមទៀត ដែលនេះនឹងក្លាយជាការដំឡើងលើកទី៣ជាប់ៗគ្នាហើយ ខណៈដែលអ្នកវិនិយោគមួយចំនួនបានព្យាករថា ធនាគារកណ្ដាលអាមេរិក នឹងធ្វើការដំឡើងអត្រាការប្រាក់យ៉ាងឆាប់រហ័ស និងធ្វើឡើងលើសពីអ្វីដែលបានគិតទុកពីមុនទៅទៀត។
សូមបញ្ជាក់ថា ផលប៉ះពាល់នៃការកើនឡើងអត្រាកប្រាក់ គឺបានបង្កឡើងនៅទូទាំងវិស័យលំនៅដ្ឋានទាំងអស់នៅអាមេរិក។ ក្នុងនោះ ការលក់លំនៅដ្ឋានថ្មីៗ ក៏បានធ្លាក់ចុះដល់កម្រិតទាបផងដែរ ប៉ុន្ដែ តម្លៃលំនៅដ្ឋាននៅតែកើនខ្ពស់ ចំពេលដែលការផ្គត់ផ្គង់លំនៅដ្ឋានតម្លៃសមរម្យមានការខ្វះខាតខ្លាំង៕
