កិច្ចខិតខំប្រឹងប្រែងថ្មីពិសេសនេះ គឺជាការពង្រឹងនិងពង្រីកកម្លាំងយោធាដ៏បំផុតក្នុងប្រវត្តិសាស្ត្រមិនធ្លាប់មានរបស់អង្គការសម្ព័ន្ធយោធាដ៏មានឥទ្ធិពលមួយនេះ ចាប់តាំងពីក្រោយសម័យសង្គ្រាមត្រជាក់មកម្ល៉េះ។ ហេតុផលនេះ គឺដើម្បីជាការឆ្លើយតប និងត្រៀមលក្ខណៈការពារខ្លួនរបស់ណាតូ នៅចំពោះមុខការឈ្លានពានរបស់រុស្ស៊ីមកលើអ៊ុយក្រែន ហើយជាពិសេសវាក៏ធ្វើឲ្យរុស្ស៊ីត្រៀមប្រុងជើងការកាន់តែខ្លាំងឡើងដែរ។
ការប្តេជ្ញាចិត្តរបស់លោកចូ បៃឌិន ប្រធានាធិបតីអាមេរិកនៅឯកិច្ចប្រជុំកំពូលអង្គការសម្ព័ន្ធយោធាណាតូក្នុងប្រទេសអេស្បាញត្រូវបានលោកបៃឌិនអះអាងច្បាស់ថា គឺដើម្បីការពារគ្រប់មីលីម៉ែត្រទាំងអស់នៃទឹកដីរបស់សម្ព័ន្ធមិត្តអាមេរិក ហើយវាក៏ស្របពេលដែល សម្ព័ន្ធមិត្តយោធាដឹកនាំដោយសហរដ្ឋអាមេរិកមួយនេះ កំពុងដាក់ចេញនូវផែនការថ្មីមួយ ដើម្បីពង្រឹងយោធានៅតាមរដ្ឋតំបន់សមុទ្របាល់ទិក ពិសេសប្រទេសប៉ូឡូញ ដើម្បីប្រឆាំងនឹងការវាយប្រហារណាមួយរបស់រុស្ស៊ីនាពេលអនាគត។
ជាមួយនឹងកងទ័ពរបស់អាល្លឺម៉ង់ ចក្រភពអង់គ្លេស និងសម្ព័ន្ធមិត្តជាច្រើន បានដាក់ពង្រាយកងទ័ពឱ្យប្រុងជើងការទៅភាគខាងកើតនោះ សហរដ្ឋអាមេរិកឯណោះវិញក៏កំពុងបន្ថែមកងទ័ព ឱ្យបានដល់១០ម៉ឺននាក់ ផងដែរនៅក្នុងទ្វីបអឺរ៉ុប។ ក្នុងនោះអាមេរិកនឹងបញ្ជូននាវាចម្បាំងបន្ថែមទៀតទៅកាន់ប្រទេសអេស្ប៉ាញ យន្តហោះចម្បាំងទៅចក្រភពអង់គ្លេស គ្រឿងសព្វាវុធទៅកាន់រដ្ឋបាល់ទិក និងបញ្ជូនទាហានបន្ថែមទៅប្រទេសរ៉ូម៉ានី។
អត្ថបទគួរអាន
បន្ថែមពីលើនេះ សហរដ្ឋអាមេរិកក៏នឹងបង្កើតទីបញ្ជាការកងទ័ពអចិន្ត្រៃយ៍ថ្មីមួយនៅក្នុងប្រទេសប៉ូឡូញ ដែលវាត្រូវបានសម្តែងការស្វាគមន៍ភ្លាមៗដោយប្រធានាធិបតីប៉ូឡូញ លោក Duda ខណៈដែលប៉ូឡូញតែងតែចង់បានទីបញ្ជាការអចិន្ត្រៃយ៍របស់សហរដ្ឋអាមេរិកបែបនេះនៅលើដីរបស់ខ្លួន ជាយូរណាស់មកហើយ។
អគ្គលេខាធិការអង្គការណាតូលោក Jens Stoltenberg បានប្រាប់សន្និសីទសារព័ត៌មានថា៖ សង្គ្រាមរបស់លោកពូទីនលើអ៊ុយក្រែន បានបំផ្លាញសន្តិភាពនៅអឺរ៉ុប ហើយបានបង្កើតវិបត្តិសន្តិសុខដ៏ធំបំផុតនៅអឺរ៉ុប ចាប់តាំងពីសង្គ្រាមលោកលើកទីពីរមក។ អង្គការណាតូប្តេជ្ញាចិត្តថា នឹងឆ្លើយតបដោយកម្លាំងយ៉ាងម៉ឺងម៉ាត់ ប្រសិនបើមានការវាយប្រហារ។
គួរជម្រាបថា ទាំងសហរដ្ឋអាមេរិក និងសម្ព័ន្ធមិត្តអង្គការសម្ព័ន្ធយោធាណាតូទាំងអស់មកទល់នឹងពេលនេះ បានព្រមព្រៀងគ្នា ពីការដាក់ពង្រាយកងទ័ពសរុបជាង ៣០ម៉ឺននាក់ ក្នុងន័យ ប្រុងជើងការខ្ពស់តែម្តង។ ចំនួនដាក់ពង្រាយកងទ័ពនេះមានការកើនឡើងយ៉ាងសម្បើមតែម្តង បើធៀបនឹងចំនួនទ័ពដែលអង្គការណាតូដាក់ឱ្យប្រុងជើងការដំបូង មានតែជាង៤ម៉ឺននាក់ប៉ុណ្ណោះ៕
