លោក ដូណាល់ ត្រាំ បានផ្តល់កិច្ចសម្ភាសន៍ផ្តាច់មុខមួយដល់ សារព័ត៌មាន CBS ហើយបានបញ្ជាក់ថា លោកមិនចាប់អារម្មណ៍ចរចាជាមួយចិនទៀតទេ ក្នុងពេលឥឡូវនេះ ពោលគឺ លោកគ្មានគម្រោងចរចាជាមួយប្រធានាធិបតីចិន លោក ស៊ី ជិនពីងនោះទេ។
ប្រធានាធិបតីអាមេរិក បានបន្ទោសទៅលើប្រទេសចិន ដែលបរាជ័យ ក្នុងការគ្រប់គ្រងមេរោគកូវីដ-១៩ កុំឲ្យរាតត្បាតដល់ប្រទេសដទៃ ជាហេតុនាំឲ្យទំនាក់ទំនងរវាងប្រទេសទាំង ២ កាន់តែតានតឹង និងមិនមានឆន្ទៈក្នុងការចរចាពាណិជ្ជកម្មបន្តទៅមុខទៀត។
អត្ថបទទាក់ទង!
ជាក់ស្តែង ប្រទេសចិន បានបង្ហាញពីឆន្ទៈ ក្នុងការទិញទំនិញ និងសេវាកម្មពីអាមេរិក ជាង ២០០ពាន់លានដុល្លារអាមេរិក ក្នុងរយៈពេល ២ឆ្នាំ ទៅតាមកិច្ចព្រមព្រៀងដំណាក់កាលទី ១ ក៏ប៉ុន្តែ លោកដូណាល់ ត្រាំ បានបញ្ជាក់ថា បញ្ហាជំងឺរាតត្បាត បានធ្វើឲ្យគាត់ផ្លាស់ប្តូរគំនិត អំពីកិច្ចព្រមព្រៀងនេះវិញ។
បើយើងក្រឡេកទៅមើល ទំហំពាណិជ្ជកម្មទ្វេភាគីរវាងអាមេរិក និងចិន ក្នុងឆមាសទី ១ ដើមឆ្នាំ ២០២០នេះ ឃើញថា មានការធ្លាក់ចុះគួរឲ្យកត់សម្គាល់ ដោយក្នុងនោះ ការនាំចេញទំនិញពីចិនទៅកាន់អាមេរិក ធ្លាក់ចុះ ៨% ហើយការនាំចូលទំនិញអាមេរិកមកកាន់ចិនវិញ ក៏មានការធ្លាក់ចុះ ១,៥% ផងដែរ។
លោក លី គូវ៉េន ប្រធាននាយកដ្ឋានស្ថិតិ និងវិភាគនៃរដ្ឋបាលគយទូទៅចិន បានគូសបញ្ជាក់ថា ទំហំពាណិជ្ជកម្មរបស់ចិនក្នុងឆមាសទី ១ សម្រេចបានប្រមាណ ២ទ្រីលានដុល្លារអាមេរិក ធ្លាក់ចុះ ៣,២% ធៀបនឹងពេលដូចគ្នា កាលពីឆ្នាំមុន ក៏ប៉ុន្តែវាធ្វើបានល្អជាងការរំពឹងទុក ដោយក្នុងខែមិថុនា កន្លងទៅនេះ គឺទទួលបាននូវកំណើនវិជ្ជមាន ដោយការនាំចេញទំនិញទៅក្រៅប្រទេស កើនឡើង ៤% ហើយការនាំចូលទំនិញមកកាន់ប្រទេសចិន កើនឡើង ៦%។
គួរជម្រាបដែរថា បណ្តាប្រទេសក្នុងតំបន់អាស៊ាន បានក្លាយជាដៃគូពាណិជ្ជកម្មធំជាងគេបង្អស់របស់ ចិន ក្នុងអំឡុងពេល ៦ខែនេះ ដោយទំហំពាណិជ្ជកម្មសម្រេចបានជាង ៣០០ពាន់លានដុល្លារអាមេរិក កើនឡើង ៥% ធៀបនឹងរយៈពេលដូចគ្នាកាលពីឆ្នាំមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
