អាមេរិក នឹងដាក់ចេញវិធានការបន្ថែមទៀតលើការនាំចេញបច្ចេកវិទ្យាទៅប្រទេសចិន ដើម្បីកុំឱ្យធ្លាក់ដល់ដៃយោធាចិន

យោងតាមប្រភពដែលទម្លាយប្រាប់ភ្នាក់ងារព័ត៌មាន Reuters ឱ្យដឹងថា ផលិតផលបច្ចេកវិទ្យាដែលអាមេរិកនឹងរឹតត្បិតការនាំចេញនោះ មានដូចជា បច្ចេកវិទ្យាបន្ទះសៀគ្វីដែលមានសមត្ថភាពខ្ពស់ និងមីក្រូឈីបជាដើម។ ទន្ទឹមនឹងនេះ បើតាមការរាយការណ៍ដោយកាសែង New York Times ការរឹតត្បិតជាថ្មីនេះ អាចនឹងធ្វើឡើងឆាប់ៗនៅក្នុងសប្ដាហ៍នេះ។ ទោះយ៉ាងណា ការលើកឡើងទាំងនេះ មិនទាន់ត្រូវបានបញ្ជាក់ពីសេតវិមាននៅឡើយទេ។

កាលពីខែមុន Reuters បានចេញផ្សាយថា រដ្ឋបាលលោក ចូ បៃឌីន គ្រោងកាត់បន្ថយបន្ថែមទៀតនូវការនាំចេញបន្ទះសៀវគ្គី ដែលប្រើប្រាស់សម្រាប់បច្ចេកវិទ្យា AI និងសម្រាប់ការផលិតបន្ទះឈីបទៅកាន់ប្រទេសចិនក្នុងខែតុលានេះ។

គួរកត់សម្គាល់ថា ការចេញវិធានការផ្អាកនាំចេញគ្រឿងបច្ចេកវិទ្យារបស់អាមេរិក ទៅប្រទេសចិន ត្រូវបានគេមើលឃើញថា ដើម្បីបង្អាក់សមត្ថភាពយោធាចិនតែម្ដង។ យ៉ាងណាមិញ កាលពីខែមុននេះ លោក Jake Sullivan ទីប្រឹក្សាសន្តិសុខជាតិអាមេរិក បាននិយាយថា ការគ្រប់គ្រងការនាំចេញបច្ចេកវិទ្យាទៅកាន់ប្រទេសចិន និងរុស្ស៊ី អាចជាយុទ្ធសាស្រ្តថ្មីរបស់អាមេរិក និងសម្ព័ន្ធមិត្ត ដើម្បីកំណត់សមត្ថភាពប្រកួតប្រជែងរបស់គូប្រជែងដ៏ស្រួចស្រាល់ទាំងពីរប្រទេសនេះ។

ផែនការរឹតត្បិតនេះ ធ្វើឡើងតែ១ខែប៉ុណ្ណោះ បន្ទាប់ពីអាជ្ញាធរសហរដ្ឋអាមេរិក បានបញ្ជាឱ្យក្រុមហ៊ុន Nvidia Corp បញ្ឈប់ការនាំចេញបន្ទះឈីបកុំព្យូទ័រ ២ប្រភេទទៅកាន់ប្រទេសចិន។

ដោយឡែក កាលពីខែសីហាកន្លងទៅ សហរដ្ឋអាមេរិកនាពេលនោះក៏បានពិចារណាដាក់កំហិតការនាំចេញឧបករណ៍សម្រាប់ការផលិតបន្ទះឈីបទៅឲ្យក្រុមហ៊ុនចិនមួយចំនួន ក្នុងនោះរួមមានក្រុមហ៊ុន Yangtze Memory Technologies ផងដែរ ដែលជាក្រុមហ៊ុនបន្ទះឈីបអង្គចងចាំដែលទទួលបានជោគជ័យបំផុតរបស់ប្រទេសចិន និងជាក្រុមហ៊ុនដ៏សំខាន់ក្នុងការជំរុញឱ្យប្រទេសចិន អាចបង្កើតឧស្សាហកម្មបន្ទះឈីបដោយខ្លួនឯងបាន៕

អត្ថបទ៖ នៅ សំភី