លោក Blinken បានធ្វើការអត្ថាធិប្បាយកាលពីថ្ងៃចន្ទ ដែលជាខួបលើកទីប្រាំមួយនៃសេចក្តីសម្រេចរបស់តុលាការអន្តរជាតិ ដែលសម្រេចចាត់ទុកសមុទ្រចិនខាងត្បូងជាដែនទឹកអន្តរជាតិ ដែលជាផ្លូវទឹកមួយដ៏សំខាន់មានតម្លៃប្រហែល ៣ទ្រីលានដុល្លារ បើគិតពីពាណិជ្ជកម្មតាមកប៉ាល់ឆ្លងកាត់ផ្លូវសមុទ្រនេះជារៀងរាល់ឆ្នាំ។
យ៉ាងណាក្តី ប្រទេសចិនបានទាត់ចោលការសម្រេចរបស់តុលាការអន្តរជាតិ ហើយតែងចាត់ទុកថា សមុទ្រចិនខាងត្បូងនេះ គឺជាដែនទឹកប្រវត្តិសាស្ត្ររបស់ខ្លួនតាំងពីបុរាណមក។
មួយវិញទៀត លោក Blinken បាននិយាយនៅក្នុងសេចក្តីថ្លែងការណ៍មួយ ដែលសង្កត់ធ្ងន់ទៅលើកិច្ចព្រមព្រៀងនៃសន្ធិសញ្ញាការពារទៅវិញទៅមករវាងសម្ព័ន្ធមិត្តរបស់ខ្លួន គឺហ្វីលីពីន ជាមួយអាមេរិកតាំងពីឆ្នាំ ១៩៥១ ថា៖ «សហរដ្ឋអាមេរិកសូមបញ្ជាក់ជាថ្មីថា បើមានការវាយប្រហារណាមួយទៅលើយោធាហ្វីលីពីន នោះនឹងមានការអំពាវនាវឲ្យអាមេរិកឆ្លើយតបទៅវិញជាមិនខាន»។
អត្ថបទគួរអាន
លោកបញ្ជាក់ច្បាស់ៗថា «អាមេរិកបានអំពាវនាវម្តងទៀតឱ្យសាធារណៈរដ្ឋប្រជាមានិតចិន (PRC) គោរព និងអនុវត្តតាមកាតព្វកិច្ចរបស់ខ្លួនក្រោមច្បាប់អន្តរជាតិ និងបញ្ឈប់អាកប្បកិរិយាបង្ករឿងរបស់ខ្លួនជាបន្ទាន់»។
ទោះបីជាបែននេះក្តី គេចាំមិនភ្លេចទេថា ការសង្គ្រប់យករបស់ចិននៃដែនសមុទ្រចិនខាងត្បូងស្ទើរតែទាំងស្រុង ដោយទីក្រុងប៉េកាំងតែងលើកឡើងពីអ្វីដែលខ្លួនហៅថាជាផែនទីប្រវត្តិសាស្ត្រនោះ បានធ្វើឲ្យមានជម្លោះ ក៏ដូចជាភាពតានតឹងឥតស្រាក់ស្រាងជាមួយប្រទេសសមាជិកអាស៊ានមួយចំនួន ដែលបានហៅការការទាមទាររបស់ចិននេះ គឺជាការបំពាននឹងច្បាប់អន្តរជាតិយ៉ាងពិតប្រាកដ។
សូនជម្រាបថា សេចក្តីថ្លែងការណ៍ខ្លាំងៗរបស់លោក Blinken រដ្ឋមន្ត្រីការបរទេសអាមេរិកខាងលើនេះ បានធ្វើឡើងចំថ្ងៃតែមួយ ដែលរដ្ឋមន្ត្រីការបរទេសចិនលោក Wang Yi បានថ្លែងនៅក្នុងកិច្ចប្រជុំនៃសមាគមប្រជាជាតិអាស៊ីអាគ្នេយ៍ (អាស៊ាន) នៅរដ្ឋធានីឥណ្ឌូនេស៊ី ដោយបានព្រមានថា ប្រទេសក្នុងតំបន់អាស៊ីគួរតែជៀសវាងត្រូវគេយកធ្វើជា «កូនអុក» ដោយមហាអំណាចពិភពលោក បើទោះបីជាលោកវ៉ាង យី បានបញ្ចេញឈ្មោះឲ្យចំថាមហាអំណាចនោះជាប្រទេសណា ក៏គេអាចដឹងថា គឺលោក ចង់សំដៅទៅសហរដ្ឋអាមេរិកតែម្តង ដោយសារតែកន្លងមកអាមេរិក ហើយនិងចិនតែងតែមានការប្រជែងឥទ្ធិពលគ្នាយ៉ាងខ្លាំងក្លានៅក្នុងតំបន់៕
