បើតាមការអះអាងរបស់ អនុប្រធាននាយកដ្ឋានសហប្រតិបត្តិការអន្តរជាតិ នៃក្រសួងហិរញ្ញវត្ថុ លោក Ha Duy Tung បានអះអាងនៅក្នុងសារព័ត៌មាន Vietnam Express ថា បច្ចុប្បន្ន វៀតណាមមានកិច្ចព្រមព្រៀងពាណិជ្ជកម្មចំនួន១២ កំពុងអនុវត្ត ដែលវៀតណាមបានចំណាយជាង ១ពាន់លានដុល្លារអាមេរិកហើយ ក្នុងការកាត់បន្ថយ ឬលុបបំបាត់ចោលពន្ធនាំចូល។ ទន្ទឹមនឹងនេះ វៀតណាម ក៏កំពុងស្ថិតនៅក្នុងកិច្ចចរចាកិច្ចព្រមព្រៀងពាណិជ្ជកម្មសរុបប្រមាណ២០ផងដែរ។
ទោះយ៉ាងណា លោក Duy Tung បញ្ជាក់ទៀតថា វិស័យគយនៅតែបន្តមានប្រាក់ចំណូលកើនឡើង ពីពន្ធជាច្រើនប្រភេទផ្សេងទៀត រួមទាំងការការពារបរិស្ថាន ការប្រឆាំងនឹងការលក់បង្ខូចថ្លៃ និងពន្ធលើការប្រើប្រាស់ពិសេសជាដើម។ បើទោះបីជាវៀតណាម ត្រូវតម្រូវឲ្យកាត់ពន្ធនាំចូលក៏ដោយ ប៉ុន្ដែវៀតណាមនៅតែអាចយកពន្ធលើប្រភេទពន្ធផ្សេងទៀតបាន។
អត្ថបទទាក់ទង!
ចំណូលពន្ធគយបានបន្តកើនឡើងមែន ប៉ុន្ដែ សមាមាត្រនៃពន្ធនាំចូលទៅនឹងប្រាក់ចំណូល គឺមានការធ្លាក់ចុះ។ តួយ៉ាង នៅឆ្នាំ២០១៧ ពន្ធនាំចូល មានចំនួនជិត២២% នៃចំណូលពន្ធគយសរុប បន្ទាប់មកធ្លាក់មកនៅ ជាង ១៧% នៅឆ្នាំ២០១៨ និងបន្ដធ្លាក់ចុះមកនៅ តែជិត១៧% ប៉ុណ្ណោះ នៅ១១ខែឆ្នាំ២០១៩នេះ។
១១ខែ ឆ្នាំនេះ វិស័យគយវៀតណាម ប្រមូលចំណូលបានជិត១៤ពាន់លានដុល្លារអាមេរិក ខណៈដែលចំណូលពន្ធគយសរុបកាលពីឆ្នាំ២០១៨មានជាង១៣ពាន់លានដុល្លារ និងឆ្នាំ២០១៧ មានជិត១៣ពាន់លានដុល្លារ។ នេះបើតាមទិន្នន័យពីគយវៀតណាម។
ពន្ធគយវៀតណាម កើនឡើង ដោយសារតែមានកំណើននៃចំណូលនាំចូលពិសេសលើទំនិញទាក់ទងនឹងវិស័យយានយន្ដ ក្រៅពីនេះ គឺបានមកពីពន្ធលើប្រេងសាំង ពន្ធការការពារបរិស្ថាន និងពន្ធការប្រើប្រាស់ពិសេស។
ទន្ទឹមនឹងនេះ កិច្ចព្រមព្រៀងពាណិជ្ជកម្មសេរីរវាងអឺរ៉ុប និងវៀតណាម ដែលបានចុះហត្ថលេខាកាលពីខែមិថុនា ឆ្នាំ២០១៩នេះ ក៏ត្រូវបានដាក់ជូនទៅរដ្ឋសភាជាតិ និងសភាអឺរ៉ុប សម្រាប់ការផ្ដល់សច្ចាប័នផងដែរ។ កិច្ចព្រមព្រៀងពាណិជ្ជកម្មសេរីនេះ ត្រូវបានគេរំពឹងថា នឹងចូលជាធរមាន នៅពាក់កណ្ដាលឆ្នាំ២០២០ខាងមុខនេះ។
ក្រោមកិច្ចព្រមព្រៀងពាណិជ្ជកម្មសេរីអឺរ៉ុប វៀតណាមនេះ ប្រទេសវៀតណាម បានសន្យា នឹងលុបចោលពន្ធគយ ជាង៤៨% នៃបន្ទាត់ពន្ធនាំចូលរបស់ខ្លួន នៅពេលដែលកិច្ចព្រមព្រៀងនេះ ចូលជាធរមាន ដោយលក្ខខណ្ឌលុបចោលពន្ធគយនេះ នឹងត្រូវអនុវត្តលើការនាំចូលជាង៦៤% ពីសហភាពអឺរ៉ុប។ បន្ទាប់មក នៅ១០ឆ្នាំក្រោយ បន្ទាត់ពន្ធគយ ៩៩% ដែលនឹងត្រូវអនុវត្តលើ៩៩,៨%នៃចំណូលនាំចូល នឹងត្រូវបានលុបចោល។
សូមបញ្ជាក់ថា នៅឆ្នាំ២០១៩នេះ វៀតណាម បានចុះហត្ថលេខាលើកិច្ចព្រមព្រៀងពាណិជ្ជកម្មចំនួន៤ រួមមាន កិច្ចព្រមព្រៀងពាណិជ្ជកម្មសេរីអឺរ៉ុប-វៀតណាម, អាស៊ាន-ហុងកុង, កិច្ចព្រមព្រៀងពាណិជ្ជកម្មសេរីចិន, កិច្ចព្រមព្រៀងពាណិជ្ជកម្មវៀតណាម-គុយបា, និងកិច្ចព្រមព្រៀងលើកកម្ពស់ពាណិជ្ជកម្មទ្វេភាគីវៀតណាម-កម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
