វៀតណាមនឹងជំរុញការនាំចេញបង្គារឲ្យបានដល់ជាង៤ពាន់លានដុល្លារ នៅឆ្នាំ២០២១

ព័ត៌មានក្នុងស្រុកមួយរបស់វៀតណាមចុះផ្សាយនៅថ្ងៃទី ៧ ខែមករានេះបានឲ្យដឹងថា វៀតណាមមានលទ្ធភាពអាចជំរុញការនាំចេញផលិផលបង្គាររបស់ខ្លួនទៅក្រៅប្រទេស ក្នុងរង្វង់កើនឡើង ១៥%ជារៀងរាល់ឆ្នាំ ចាប់ពីឆ្នាំ២០២១នេះ គិតជាទំហំទឹកប្រាក់កើនឡើងប្រមាណជាង ៤ពាន់លានដុល្លារអាមេរិក។

កម្មការរៀបចំបង្គារក្នុងរោងចក្រមួយនៅវៀតណាម (រូបភាព៖ Shutterstock)

បើយោងតាមសមាគមផលិត និងនាំចេញគ្រឿងសមុទ្រវៀតណាម ការនាំចេញបង្គាររបស់ខ្លួនអាចនឹងកើនឡើងបានដោយ សារតែតម្រូវការទីផ្សារសកលនៅមានស្ថិរភាពល្អ ខណៈប្រទេសដៃគូប្រកួតប្រជែង នាំចេញបង្គាផ្សេងទៀតកំពុងរងផលប៉ះពាល់ដោយកូវីដ-១៩។ ជាក់ស្តែងប្រទេសចិន ដែលជាប្រទេសនាំចេញបង្គារធំជាងគេនៅអាស៊ីក៏ជួបបញ្ហាខ្វះខាតផលិតផលនាំចេញនិងកែច្នៃផងដែរ។

ប៉ុន្តែនេះមិនមែនជាមូលហេតុតែមួយ ដែលអំណោយផលដល់ការនាំចេញរបស់វៀតណាមប៉ុណ្ណោះទេ ខណៈដែលវៀតណាមក៏ទទួលបានផលចំណេញផងដែរពីកិច្ចព្រមព្រៀងពាណិជ្ជកម្មសេរី (FTAs) ជាមួយប្រទេសនានា ដែលអនុញ្ញាតឲ្យវៀតណាមអាចនាំចេញទៅក្រៅប្រទេសបានដោយមិនគិតពន្ធ។

យ៉ាងណាមិញ អាជ្ញាធរវៀតណាម ក៏បានព្រមានផងដែរពីបច្ច័យអាក្រក់ដែលអាចកើតមាន ខណៈប្រទេសឥណ្ឌាដែលជាគូប្រជែងទីផ្សាររបស់ខ្លួនមានលទ្ធភាពអាចផលិតបង្គារ និងនាំចេញបានក្នុងតម្លៃថោកជាង៕