សមាគមអ្នកនាំចេញ និងផលិតគ្រឿងសមុទ្រវៀតណាម បានលើកឡើងថា តម្លៃបង្គាវៀតណាម កំពុងស្ថិតនៅក្នុងទំនោរកើនឡើងជាលំដាប់ ដោយសារតែ ទីផ្សារសំខាន់ៗ ដូចជា ជប៉ុន អាមេរិក និងសហភាពអឺរ៉ុប មិនបានស្តុកទុកបង្គា ច្រើនដូចមុននោះទេ ដូច្នេះហើយ ការនាំចេញបង្គាវៀតណាម អាចនឹងកើនឡើងបន្តទៀត នៅក្នុងរយៈពេល ៣ ទៅ៤ខែខាងមុខទៀត។
ក្នុងនោះតម្លៃបង្គាស កើនឡើង ១១% ហើយបរិមាណនាំចេញបង្គាស ស្មើនឹង ៧០% នៃការនាំចេញសរុប ខណៈតម្លៃបង្គារផ្សេងទៀតធ្លាក់ចុះ ១៥%។
សហរដ្ឋអាមេរិកនៅតែជាអ្នកទិញបង្គាវៀតណាមច្រើនជាងគេបង្អស់ រហូតដល់ទៅ ២១% នៃការនាំចេញបង្គាសរុបរបស់វៀតណាម ហើយក្នុងឆមាសទី ១នេះ វៀតណាម នាំចេញបង្គា ដែលមានតម្លៃសរុបជាង ៣២៣លានដុល្លារអាមេរិកទៅកាន់អាមេរិក កើនឡើង ២៩% ធៀបនឹងរយៈពេលដូចគ្នាកាលពីឆ្នាំមុន។
អត្ថបទទាក់ទង!
បង្គាវៀតណាម មានសមត្ថភាពប្រកួតប្រជែងខ្លាំង នៅក្នុងទីផ្សារអាមេរិក ដោយសារតែ វៀតណាម អាចរក្សាស្ថិរភាពផលិតកម្មបានលឿនជាងគេបំផុត អំឡុងពេលកូវីដ-១៩នេះ ខណៈអ្នកនាំចេញបង្គាផ្សេងៗដូចជា ឥណ្ឌា និងអេក្វាទ័រ នៅតែបន្តទទួលរងគំនាបពីវិធានការបិទទីក្រុង និងកង្វះខាតកម្មកររោងចក្រ។
ដោយឡែក ការនាំចេញបង្គាទៅកាន់ទីផ្សារចិនក្នុងខែមិថុនាកន្លងទៅ មានការកើនឡើង ២៣% ដោយសារតែអ្នកផ្គត់ផ្គង់បង្គាសំខាន់ៗទៅកាន់ចិន បានជួបប្រទះនឹងបញ្ហា បន្ទាប់ពី រកឃើញមេរោគកូវីដ-១៩ នៅលើទំនិញរបស់ពួកគេ ដែលវាជាការបើកឱកាសឲ្យបង្គាវៀតណាម អាចចូលទៅក្នុងទីផ្សារចិន បានកាន់តែច្រើន។
គួរជម្រាបថា វៀតណាម គឺស្ថិតនៅក្នុងចំណោមបណ្តាប្រទេស ដែលនាំចេញបង្គាធំជាងគេបំផុតលើសកលលោក ដោយបាននាំចេញបង្គាក្នុងតម្លៃជាង ៣,៤ ពាន់លានដុល្លារអាមេរិក កាលពីឆ្នាំ ២០១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
