ការនាំចេញរបស់វៀតណាម ភាគច្រើន ទៅកាន់ប្រទេសឡាវ មានដូចជា ប្រេង ហ្គាស និងដែកថែប ហើយបើរួមបញ្ជូលទាំងមធ្យោបាយដឹកជញ្ជូន ផងនោះ មានទំហំប្រមាណជាង៤០% នៃការនាំចេញទៅឡាវសរុប។ ក្នុងនោះដែរ មានទឹកប្រាក់ប្រមាណជិត ១៣ លានដុល្លារអាមេរិក បានមកពីការនាំចេញប្រេង និងហ្គាស។
តាមរបាយការណ៍បញ្ជាក់ថា ទំហំពាណិជ្ជកម្មទ្វេភាគីរវាងវៀតណាម និងឡាវ កាលពីឆ្នាំ២០១៨ មានការកើនឡើងដល់ ជាង ១ពាន់លានដុល្លារអាមេរិក កើនឡើង ១៤ភាគរយធៀបនឹងឆ្នាំ២០១៧។
ជាមួយគ្នានេះ វៀតណាម គឺដៃគូពាណិជ្ជកម្មធំបំផុតទី៣របស់ប្រទេសឡាវ បន្ទាប់ពីប្រទេសចិន និងថៃ។
អត្ថបទទាក់ទង!
បច្ចុប្បន្នរដ្ឋាភិបាលឡាវ កំពុងលុបបំបាត់នូវបទប្បញ្ញាតិ និងនីតិវិធីរដ្ឋបាលស្មុគស្មាញនានា ដើម្បីកាត់បន្ថយពេលវេលាក្នុងការចុះបញ្ជីក្រុមហ៊ុន កាន់បន្ថយពន្ធ និងបង្កើនភាពប្រសើរឡើងនៃប្រព័ន្ធហេដ្ឋារចនាសម្ព័នជាដើម សំដៅដល់ការធ្វើឲ្យបរិយាកាសធ្វើអាជីវកម្មកាន់តែមានភាពអំណោយផលដើម្បីទាក់ទាញវិនិយោគទុនបរទេស។
គួរជម្រាបថា ក្នុងរយៈពេល ២ខែ ពោលគឺខែមករា និងខែកុម្ភៈ ឆ្នាំនេះ វៀតណាមសម្រេចបានការនាំចេញ ក្នុងទំហំទឹកប្រាក់ប្រមាណជាង៣៦ ពាន់លានដុល្លារអាមេរិក កើនឡើងជាង៤% ធៀបនឹងរយៈពេលដូចគ្នាកាលពីឆ្នាំ២០១៨ ខណៈដែលការនាំចូលវិញ ក៏មានក្នុងរង្វង់ជាង ៣៦ ពាន់លានដុល្លារអាមេរិកដូចគ្នាដែរ ដែលមានកំណើនជិត៦%។ ទីផ្សារបរទេសធំ៥ ដែលវៀតណាមនាំចេញទៅច្រើនជាងគេ មានដូចជា អាមេរិក អឺរ៉ុប ចិន ជប៉ុន និងកូរ៉េខាងត្បូង។
គួរបញ្ជាក់ថា នៅឆ្នាំ២០១៩នេះ ប្រទេសវៀតណាម ព្យាករថា នឹងមានឱនភាពពាណិជ្ជកម្មប្រមាណ ៣ ពាន់លានដុល្លារអាមេរិក ខណៈកាលពីឆ្នាំ ២០១៨ វៀតណាម មានអតិរេកពាណិជ្ជកម្មខ្ពស់បំផុត មិនធ្លាប់មានឡើយ បើគិតត្រឹម១ទសវត្សរ៍កន្លងមកនេះ ពោលគឺមានប្រមាណជាង ៧ពាន់លានដុល្លារអាមេរិក។ នេះបើតាមការព្យាករពីក្រសួងឧស្សាហកម្ម និងពាណិជ្ជកម្មវៀតណាម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
